يوميات شاب عادي (الحلقة الثالثة )

نام صاحبنا عبد الرحمن وراحت عيناه فى النوم من كثرة التفكير وإذا وهو نائم
يرن جرس التليفون


ذهبت الأخت الصغيرة عائشة لترد



عائشة : ألو



المتصل : السلام عليكم



عائشة : وعليكم السلام مين معايا



المتصل : أنا محمد صاحب عبد الرحمن فى الكلية
كنت عايزه فى حاجه وقلت ألحقه قبل ما يصلى



عائشة : يصلى !!!عبد الرحمن يصلى !!!
هههههههههه صلى على النبى



محمد : عليه الصلاة والسلام طب هو موجود



عائشة : هو نايم





محمد : طيب أما يصحا قوليله أنى أتصلت بيه


عائشة : طيب !!!!!!!



ومرت ثلاث ساعات وقام صاحبنا من النوم



عبد الرحمن : ماما حطيلى أكل


الأم : أنت مكلتش لما جيت من الكلية


عبد الرحمن : لأ مكانش لية نفس


الأم : طيب أنا هصلى المغرب وحطلك
عبد الرحمن : ماشى بس ماتصليش التراويح أنا هفتح التلفزيون عبال ماتخلصى



ودخل صاحبنا فوجد أخته عائشة قدام التلفزون



عبد الرحمن : أنتِ موراكيش حاجة



عائشة : لأ أنا قاعدة فى مانع؟؟



عبد الرحمن : قومى ذاكرى



عائشة : خلصت مذاكرة
صحيح فى واحد أتصل بيك اسمه محمد



عبد الرحمن : محمد !!! وكان عايز إيه


عائشة : معرفش مقالش لكن دا قالى أنه كان عايز يلحقك قبل ما تصلى
أنت بتصلى من ورانا ولا إيه
وبعدين أنت من أمتى بتصاحب النوعيات دى



عبد الرحمن : أنتى هتفتحيلى محضر وبعدين أنتى فاكرانى كافر مابصليش ولا إيه



ثم جاء صوت من الخلف وكان صوت والد عبد الرحمن
:طب كويس أن أنت عارف أن ألى مبيصليش يبأى كافر



عبد الرحمن : يووووووووووووووه أنا داخل أفتح الكمبيوتر



الأم : مش هتاكل



عبد الرحمن : ملياش نفس



دخل عبد الرحمن حجرته وقفل على نفسه وقعد يفكر شوية
الغبية عائشة دى أل يعنى هية ألى مقطعه نفسها فى قيام الليل
هتعملى فيها شيخة




وعدا اليوم وجاء اليوم الثانى وإذا بمحمد فى وشه
أول ما عبد الرحمن شافه حاول يتجنبه ويعمل نفسه بيكلم واحد صاحبه
إلا أن محمد جاء وسلم عليه وولا كأن حاجة حصلت
ثم
محمد : أنا رايح أصلى الضحى تيجى معايا



عبد الرحمن (بصوت مرتفع) : بص بأى أنا مبصليش



أبتسم محمد وقاله : طيب وماله مش أنت مسلم واسمك عبد الرحمن


عبد الرحمن : أه



محمد : طيب يعنى ممكن تصلى فى أى وقت



شعر محمد بالأحراج أمام صاحبه ولم يعرف ماذا يقول



محمد : أنا رايح أتوضى تيجى معايا المحاضرة الأولى أتلغت بيقولو الدكتور مش جاى
أهم الدكاتره كده يجوا فى أول شهر ويتملكعوا وأحنا نيجى فى آخر شهر ونحتاس
هتيجى معايا



ضحك عبد الرحمن وقال : ماشى



ذهب الأثنين لمسجد الكلية للوضوء
وبدأ كل واحد منهم بالوضوء
لاحظ محمد بعض الأخطاء فى وضوء عبد الرحمن



فقال : عبد الرحمن ممكن أقولك حاجة ولا هتزعأ زى مزعقت لى بره



ضحك عبد الرحمن : قول فى إيه



محمد : بص ياسيدى أنا بس عايزك ترتب أركان الوضوء عشان الترتيب فرض
يعنى ممكن أنا أنسى أتمضمض لكن وضوئى صحيح
لكن لو مرتبتش الوضوء يبأى الوضوء غير صحيح وبالتالى هتبوظ الصلاة



عبد الرحمن : طيب وأرتبهم الزاى بأه



محمد : بسيطة خالص
" أول حاجة تقول بسم الله ودى سُنة وبعد كده تغسل كفك 3مرات وخلى بالك كفك
مش أيدك كلها وبعدين تتمضمض 3 مرات وتستنثر 3 مرات ودول يا سيدى سُنه برضه
وبعد كده تغسل وشك 3 مرات وخلى بالك خلى المية تيجى على وشك كله
تلاقى البت من دول تغسل وشها وخايفة تبل الطارحة والمية لا تصل لكل الوش
وده كله غلط"


عبد الرحمن : سيبك من البنات خلينا فى الصبيان وبعدين كمل



محمد : " بعد وشك ودا طبعا فرض تغسل أيدك لغاية الكوع
ويستحسن تبدأ باليمين3 مرات وبعد كده تبلل يدك لتمسح رأسك من الأمام للخلف ودى فرض ومعاها أذنك من الظاهر والباطن ودى سنة والأثنين مرة واحدة وفى الأخر تغسل رجلك للكعبين ثلاثا "



عبد الرحمن : بس أنا ممكن أمسح على الشراب مش كده



محمد : أه طبعا لو كنت لبسه على وضوء



عبد الرحمن : بس أنا مش متوضى



محمد : يبأى لازم تقلعه يا بطل



عبد الرحمن : طيب متشكرين على وجع القلب ده ممكن أتوضى بأه



محمد : أتفضل هو أنا حايشك



أنتهت معركة الوضوء التى كانت تشبه معركة إستيقاظ عبد الرحمن
وذهب الأثنين للمسجد


وأول مادخل عبد الرحمن المسجد وقعت عينه على معاذ مرة ثانية
وكالعادة تَنّح أول مشافه بس المرادى كان بيصلى
ولاحظ فى ذقنه لحية سوداء لم تكتمل النمو بعد تزين وجهه
لم يلاحظها المرة السابقة لما أثاره من نور وجهه
وكأن عبد الرحمن أول مرة يشوف حد بيصلى
حس أن الراجل ده بيركع بجد بيسجد بجد
المهم دخلوا


والتفت لمحمد وقال : هو الأخ ده مقيم على طول فى المسجد



محمد : لأ أصل أنهاردة سمعت أن فى درس بعد صلاة الضحى فى المسجد
أنا هقوم أصلى




قام كل من عبد الرحمن ومحمد للصلاة
وطبعا صاحبنا نقرهم نقر الديك وخلص بدرى قبل محمد
ولما خلص وجد معاذ بيبصله



هو كان مراقبنى وأنا بصلى ولا إيه



ثانى مرة يشعر بالأحراج النهاردة
وهو لسه بيفكر


وجد معاذ فى وشه بسلم عليه



معاذ : السلام عليكم ورحمة الله وبركاته


عبد الرحمن : وعليكم السلام


معاذ : وحشتنى والله أنت فاكرنى ولا نسيت



عبد الرحمن قال فى باله " أنا أقدر أنسى مش أنتى بتاع الكهربا"


عبد الرحمن : أيوه فاكر أنت الأخ ألى كنت بتصلى جمبى أمبارح صح



معاذ : أيوه أنا صح إيه رأيك فى الكلية


عبد الرحمن : شغاله ..... يعنى .....


معاذ : معندكش محاضرات دلوقتى


عبد الرحمن : أتلغت


معاذ : طيب خير فى درس هنا فى المسجد بعد صلاة الضحى إيه رأيك تحضره معانا



عبد الرحمن : مش عارف هشوف



وبعد شوية قام واحد وقال إن شاء الله ياجماعة فى درس هيبدأ الأن بعنوان : التوبه



وبعد مخلص الأخ كلامه وجد عبد الرحمن معاذ قام من جنبه



أستغرب جدا وقال فى نفسه "هو مش قال أنه هيحض الدرس هو قام ليه"




ياترى معاذ قام ليه


وياترى عبد الرحمن هيحضر الدرس


ولا إيه ألى هيحصل

يا تري يا عبد الرحمن هتحضر ولا لا
مستنين بقية الحلقة القادمة علي احر من الجمر
جزاك الله خيرا ايمن

جزانا الله واياكي

على فكرة انا بتابعو معاكم انا لم اقرا جميع الحلقات قرات منه اربع حلقات بس
وانتظرت حتى يتم تنزيله في المنتدى لاستمتع به معكم

اكثر مايعجبني في هذا المسلسل الطرق الدعوية الغير مباشرة التي تحمل معها الابتسامة
مش عارف كلنا واخدين بالنا من الموضوع ده ولا لا

قعلا
في ناس جواها خير كتير بس محتاجين حد يساعدهم ويحببهم في الالتزام

وده دور كل مسلم انه يحاول ياخذ بإيدهم ويدلهم علىه
((ادعوا الى سبيل ربك بالحكمة والموعظة الحسنة ))

=========
سمسمة - dr_ayota
:شكرا على المرو

جزاك الله خيرا أيمن

بيبو -=== a white rose

شكرا ليكم على المتابعة الرائعة

جزاك الله خيراعلي مواضيعك
وننتظرمنكم ما هو جديد

قصة مشوقة كتير والله
قرتها كوييييس
وقلبي حاضر والله
بارك الله فيك

جزاك الله خير علي القصة الروعة
جعلها الله في ميزان حسناتك

جزاك الله خيرا يا ايمن

جميل جميل يا ايمن

قصة جميلة بجد وأسلوبها فى الدعوة حلو اووووى

وانا اتوقع ان معاذ قام لانه هوا اللى هيلقى الدرس

ومتابعيييييييين بقية الحلقات

والشكر موصول لسلوووووومة

الشكر فعلا لنسمة شموخ
ولجميع الاصدقاء اللي كتنو متابعين معانا
وانا متابع معاكم تاني