انا شاب جامد جدا

يعني ايه شاب جامد جدا فعلا لازم نعرف معناها لان شباب كتير قوي مش بيقولوها لكن بيحسوها وكل واحد فاكر نفسه اللي محصلش واللي بيلبس احسن اللبس ويعرف بنات معاهم عربيات وولاد ناس زي ما بيقولوا الموضوع انه احساس داخلي بالغرور وانه مش زي اي حد وان ليه دماغ غير الناس لان للاسف معظم شبابنا مش ناجح في حاجة غير انه ناجح جدا ازاي يبقي شاب تافه ويعمل شعره معرفش ازاي ويسقط البنطلون واهم حاجة السلسله وينزل يلعب جيم مش عشان رياضة والكلام الفاضي ده لاء عشان الصيف جاي يا جماعه ولما يروح المصيف البنات تشوفه وتقول وااااااو احنا عايزين نتصور معاك معظم شبابنا اللذيذ فاكر ان هي دي الحياة

طيب هو ازاي الشاب بيشوف نفسه انه محصلش نبدأها بالطبقات الاجتماعيه

طبقة الاغنياء
:
بيشوف نفسه لانه معاه فلوس فاكر انه هيشتري بيها الناس ويشتري اصحاب بيها لانه عارف ان طالما معاه البي ام والشاليهات ناس كتير هتتلزق ليه ويبقي هو كده عنده اصحاب بيسمعه كلامه في اي حاجة عشان يركبو معاه ولا يفرحهم ولما ينزل الجامعه يلاقي بنات ضعاف النفوس كل واحدة عايزة تكلمه واللي تترسم عليه عشان يتجوزها وطبعا غير نفوذ باباه اللي بيخليه فاكر ان مفيش حد يقدر يكلمه وانه فوق الناس ويقضي حياته كلها حفلات وخروجات بس طبعا مش كل الاغنياء بيعملوا ده بس فعلا الاغلبية منهم بيعمل ده لانه مش تعب في حاجة وشاف فلوس من ما يتعب فيها عشان كده بيبقي مستهتر بنفسه وبالناس

تعالوا نشوف الطبقة اللي بعد كده
:
الطبقة المتوسطة او الميسورين ماديا

ده بيشوف نفسه لما الشاب ينزل يشتري طقم من التوكيل وفاكر انه هو الوحيد اللي في مصر بيشتري من سيتي ستارز مثلا تلاقيه يبص للناس من فوق لتحت ولما يروح مارينا يقعد يفتي يعني هو بيبقي يا عيني حاسس بنقص جامد جدا وعايز يعوضه عشان كده تلاقيه بيعمل اي حاجة عشان الناس بس تشاور عليه ويقوله عليه ده ولد نضيف ويبدأ في انه يتمصلح علي الناس اللي معاها عربيات ولو حتي هو معاه عربية باباه تلاقيه بيسرقها منه ويخرج ومعاه الشباب السيس اصحابه ويعاكس بنات محترمه مش محترمه المهم ان هي دي الروشنه انه يعاكس ويحاول بكل جهده انه يتعرف علي بنات كتير وطبعا ده كله بسبب سوء التربية والاهم الدين اللي بقينا نشوف اي واحد بيصلي فرضين في الجامع نخليه شيخ مرة واحدة مع ان ده المفروض يتعمل

اخر طبقة اجتماعيه هي الطبقة اللي مستواها المادي قليل

ده نادرا لما الاقي حد شايف نفسه وعايز يعمل حاجة لانه ممكن يبقي من جواه عايز يشوف نفسه فعلا بس مفيش حاجة امكانيات تخليه يعمل حاجة يشوف نفسه بيها زي اللبس هيشتريه من اي مكان ولا حتي باقي الحاجات وبيعجبوني جدا ان في ناس منهم بيذاكروا ويجتهدوا عشان يكونوا من الاوائل ويعوضوا اهلهم عن اللي حصل معاهم واعرف ناس فعلا كده وماشاء الله عليهم دلوقتي احسن من ناس كتير جدا واشتروا شقق تمليك ليهم وعربيات وفي مناصب كويسة جدا ربنا يوفقهم

بجد الروشنه ولا ان يتقال عليك شاب نضيف ولا بالمنظر ولا العربية وفيه شباب وبيشوفوا شباب راكبين عربيات جامده جدا بس ولا يسوي شئ في نظرهم عشان عارفين انه انسان مش محترم وبيلعب ببنات الناس ومش بيحمد ربنا علي اللي ربنا وضعه في النعمه دي وغيره مش لاقي ياكل
الروشنه انك تبقي نضيف في كلامك واخلاقك صدقني اغني اغنياء العالم هيتمني انك تبقي صاحبه واي حد مستواه مش كويس يصبر لان ربنا مش بيظلم حد ويسعي انه يبقي احسن انسان وبلاش الغرور لان دايما الغرور نهايته مش كويسه ومن تواضع لله رفعه

اتمني من شباب العرب ان نجرب معني الاحترام ونجرب ان احنا بلاش نقول الفاظ مش كويسه نجرب نبقي ناس نضيفة بجد ونحافظ علي بنات الناس صدقوني والله احساس جامد جدا وشوف نظرة الناس هتتغير ازاي ليك بعد كده ونحمد ربنا علي النعمه اللي احنا فيها ونفتكر ان في ناس عايشة في الشارع مش لاقيه حاجة
ياريت بلاش نبقي مغرورين سواء معانا ولا مش معانا ونفكر في مستقبلنا وان هييجي اليوم اللي هنموت فيه ونشوف هنقول ايه لربنا عايزين نعمل اي حاجة اي حاجة بس نفتخر بيها ونقول احنا رجالة بجد

وكمان لازم تكون عارف ان الغرور نهايته السقوط وان التواضع بيكسب حب الناس وحب ربنا في الاول وهيزيد النجاح يوم بعد يوم طالما فينا التواضع

فكرة الموضوع جميلة يا هاله

تسلم ايدك

انا شايف ان الشاب الجامد جدا هو الشاب المتواضع يكون عندوا علم وغنى ولكن متواضع بيساعد الناس سواء بالعلم او المال من غير ما يتكبر عليهم وزى ما قولتى بالاحترام

والله عندك حق

موضوع في منتهى الروعة
انا برأيي الشاب الجامد هو الشاب الملتزم دينيا و اخلاقيا

شكرااااا عمرو وهمس
نووورتوووووني
انا شاب جامد جدا 291385

فعلا عمرو عند حقه وفكره الموضوع جميله جدا

يسلموووو
موضوعك روووعة

للرفع

بجد موضوووووووووووووووع هايل وروووووعة

سبحان الله
فعلا موضوع هايل
و انشالله كل الشباب العربى يتغير خصوصا بعد ثورات التغيير ديه
تسلم ايديكى يا جميل ... فكرة الموضوع هايلة