موضوع رائع ياسمينا وان كنت اتمني ان كل انسانة ربنا يرزقها بزوج صالح وما تضطرش تعمل كل دة
او تعمله في بيتها ولزوجها ان شاء الله
بس كان عندي تعليق علي بعض النقاط
- اقتباس :
- إعلمى ان الحب موجود فى كل مكان لكن يريد من يفتش عنه، لاتحاولى أن تمنعى شعاع الحب من الوصول اليك، بل يأعطي الفرصة لنفسك للإختيار والتنقيب عن الشخص المثالى الذى تتمنيه ليكون شريك لحياتك.
طبعا الحب بصورته النقية الطاهرة موجود في كل مكان حوالينا
والانسان اللي بيرضي ربنا هيحس ان الدنيا كلها بتحبه وهيبقي عنده اقبال غير عادي علي الحياة
بس الجزئية دي مش عايزين انها تتفهم غلط بمعني
ان في ديننا الاسلامي سبحان الله ربنا لما حط قواعد ومباديء لينا كبنات او نساء
نمشي علينا كرم فيها المرأة بشكل غير معقول
عايزين نفهم صح يعني ايه اعطي لنفسك الفرصة للاختيار والتنقيب مش معناه بقي ان البنت اول
مثلا ما تدخل جامعة يبقي شغلها الشاغل انها تصاحب
فلان او توقع فلان زي ما بيتقال دي حاجات ضد مباديء ديننا وفيها اهانة كبيرة للبنت
وهي مش بتبقي حاسة
الصح ان البنت تبقي محترمة معززة مكرمة في بيتها لغاية ما ييجي
الانسان اللي شاريها فعلا وتحس انه هيحافظ عليها ويصونها وهيديها الحب زي
ما هي كانت عايزة وقتها بقي تبقي تفكر كويس وتختار
هنا بقي من بين كل اللي هيتقدمولها تبتدي تنقب وتختار تشوف هو دة اللي هيسعدها ولا لا
دة اللي اتربينا عليه والله اعلم دة مقصد صاحب او صاحبة المقال ولا لا
- اقتباس :
- فقط إحذرى من التنازل عن المبادىء والسمات التى تبحثين عنها وتقومى بالخضوع للتقاليد الظالمة التى يدعو لها المجتمع وهى ان الزواج شىء حتمى حتى لو كان الزوجين غير مناسبين لبعضهما البعض.
لاتخضعى للعادات التى تملى عليك الزواج فقط لتجنب القيل والقال بل يجب ان تقنعى العالم بوجهة نظرك حتى لو ستحاربين من اجلها
النقطة دي بقي مهمة جدا جدا
للأسف الاهل غالبا اول ما بييجي عريس لبنتهم يفضلوا يقولولها دة فرصة وم هتعوضيه
وهتندمي وهتكبري وتعنسي وغيره
والكلام دة قد ايه بيفرق مع البنات
مش بيقولوا عندنا الزن امر من السحر
الاهل مش بيفهموا ان دة ممكن يكون انسان محترم وكويس وما فيهوش غلطة
بس سبحان الله مش متوافق مع بنتهم او مش قابلاه
بجد لازم الاهل يحترموا ارادة بناتهم ودي حاجة في الدين يعني مش تقليد غربي ولا حاجة
والتوافق شيء مهم جدااااااااااااااااا
توافق علمي واجتماعي وثقافي
ودة انا سمعته من كذا شيخ
بس البنت لازم برده تبقي عارفة كويس ان اهلها عايزين مصلحتها
وانها باي حال من الاحوال مش لازم تعمل حاجة خارجة عن رضاهم
فقط الحوار الجاد والمناقشة هي الحل وعن تجربة
يعني لو كل واحد قال اراؤه اكيد حد في النهاية هيقتنع
وعلي فكرة بعضالاهل بيفتكروا ان البنات ما بيبقوش عارفين مصلحتهم
لكن انا شفت كذا حالة عكس كدة تماما يعني استنوا كتير ورفضوا كذا حد
لانهم مش حاسين بتوافق وفي الاخر ربنا كرمهم بانسان هما شايفينه مناسب
ومتفق عليه الاهل والبنت في نفس الوقت
نقطة اخيرة حابة اعلق عليها
- اقتباس :
- دائما كونى من النساء اللاتى يعكسن الجديد والمتطور فى مظهرهن.
حاولى تغيير الألوان التى تعودت عيناك عليها حتى لا تشعرين بالملل، كما يمكن ان تغيرى طريقة ملابسك، ويمكنك أيضا تجديد قصة شعرك وطريقة مكياجك.
للتوضيح بس الكلام دة المفروض يبقي طبعا في البيت بس
يعني بما اننا مسلمات
وعلي فكرة مش شرط البنات اللي حابين يغيروا من شكلهم او من قصة شعرهم او غيره
يبقم متزوجات بس طبعا لازم دة يبقي في البيت بس ومن غير ما يغضبوا ربنا
- اقتباس :
- كل هذه الأشياء التى تبدو بسيطة فى عملها لها تأثير سحرى يمنحك الشعور بنبض الحياة المتغير من حولك.
دة صحيح
واخيرا العمل التطوعي فكرة اكثر من رائعة
وفعلا بيخلي الواحدة تحس بذاتها وبأن لها قيمة
موضوع قيم ياسمينا واسفة علي الاطالة
الأربعاء مارس 16, 2011 4:59 pm
