استفتــــــــــاء على التعديلات ..

السلام عليكم جميعااااااا

الموضوع باين من عنوااانه

ايه رايك في التعديلات الدستورية ...

مش لازم تكتب انت قلت ايه ....

دايما انت كدة يا بيبو مش قاري افكاري
لا سارقها
انا بجد كنت هعمل نفس التصويت دة حالا بس كنت هزود اختيار كمان اسمه
عندي بطاقة رقم قومي بس الموضوع مش فارق معايا اوي ومش هروح
لان في شريحة من الناس كدة
..............
تم التصويت

و الله .. انا باشكركم يا جماعة لانى كان نفسى اشارك ف الاستفتاء


------------
لسه يا آية فى ناس مش فاهمة انها تقدر تشارك فى صنع المستقبل

وانهم مسؤلين عن البلد دى .. من اول المزارعين فى الغيطان وعمال اليومية

لحد اساتذة الجامعة والمستثمرين

ماشين بمنطق جحا ..( وانا مالى )

ومش هايتحركوا غير لما تلسعهم النار ف ضهرهم


تم التصــــــــــــــــــــــــــــــــويت

الحل بقي دلوقت في التوعية وحماس الشباب
حماس الشباب مضمون
بس التوعية غلط في غلط
رغم اني هصوت بنعم
بس مستفزني قوي اللي بيعمله الاخوان
عمالين يعملوا مؤتمرات
ويصرفوا فلوس علي المنشورات الملونة اللي متظبطة علي الكمبيوتر
علشان يروجوا لنعم بطريقة غبية جدا
بيفكروني ببلطجية الحزب الوطني
المفروض دورنا كلنا نفهم الناس بمنتهي الموضوعية ونسيبهم يختاروا
انا والدتي ست مش جاهلة وبتشتغل
وبتشتغل كمان في المحليات يعني المفروض يبقي عندها خلفية ومع ذلك مش فاهمة بالظبط ايه اللي بيحصل
ان فتحت معاها النت ووريتها كلام الناس وسبتها تختار وهي قالت هقول لا ومع ذلك
ما علقتش علي دة خالص
كمان أئمة المساجد افي خطبة الجمعة دورهم مهم جداااااا ولازم يكون حيادي
انا شايفة شباب كتير خايفين بيقولوا يا تري الشيوخ بتوع الخطب هيقولوا ايه
ويا رب يكونوا حيادين وهكذا
طبعا دور الشباب بقي مهم جدا
انا مثلا شجعت والدتي وكل اخواتي
والدي للاسف مسافر
عملت ايفنت علي الفيس بوك ودعيت فيه كل زميلاتي اللي كانوا معايا في ثانوي واللي ما شوفناش
بعض من زمان علي اختلاف جامعاتنا وقلتلهم انها فرصة نشوف بعض
واتفقنا نتقابل في مكان وميعاد محدد نسلم علي بعض وبعدها نروح اللجان سوا
قد ايه الفكرة دي مشجعة جدا وفي ناس كانت مكسلة تروح
دلوقت حابين يروحوا علشان بس هنتقابل ونشوف بعض
وما اهتمش حد فينا يسأل التاني انت هتقول ايه
يا ريت نشوف كدة في كل مكان
وزي ما قلت التوعية تبقي حيادية علشان كدة ولا كدة المستقبل بايد الله واحنا مش عارفين الخير فين بالظيط

ربنا يقدم الا فيه الخييييييير ياجماعة
استعينوا بالله واتوكلوووو عليه

والله يا محمود ويا آية انا متنرفزة جداااااا من اللي بيقولك قول لا او قول اه

من غير اما يفهم الناس

وكاننا رجعنا تاااني من الاول .. 99.9% لا وشوفتوا الطامة الكبرى

بعض الناس على الفيسبوك بيروجو دلوقتي ان لو الاستفتاء انتهى التصويت عليه بـ "لا"

المجلس العسكري هايعلن دستور جديد دون الاستفتاء عليه.. يعني هايجبر الشعب عليه..

وكانهم بيلووا دراع اللي بيقول لا.

طيب اذا كان زي ما بيقولوا.. طيب ايه لازمة الاستفتاء؟؟؟؟؟؟

للأسف الشعب مش واثق في بعضه.. ومش واثق يدي الحرية للمواطنين الاخرين

وكل واحد فاكر ان قراره ورأيه هو الصح

نفسي كل واحد يشرح وجهة نظره دون خناق ولا تهديد ولا لوي دراع ولا زرع مشاعر الخوف في قلوب الاخرين

مشكور بيبو على الاستفتاء دا

وتم التصوييييت

::::::::::::::

باشمهندس حسام

والله كان نفسي ان حضرتك وكل المغتربين يشاركوا في التصويت

شئ محزن اوي ان يتمنع التصويت عنهم

بجد مش لاقية اي مبرر للاجراء دا!!!

::::::::::::::

سوسو

مشكورة يا قمر على شعورك الطيب

وعقبال فلسطين الحرة

سوسو

مشكورة يا قمر على شعورك الطيب

وعقبال فلسطين الحرة


لا شكر علي واجب
احنا اخوة واهل والله ومافي بينا اي شكر او الكلام هدا
وان شاء الله ياربي فلسطين تتحرر
وينصر مصر علي كل اعدائها

يا ناس الحقووووووووونى انا فى حالة لخبطة شديدة

انا كنت هقول نعم عشان الاستقرار والكلام دة

فسمعت انه اكيد لما ييجى رئيس دولة جديد هيحط دستور جديد

يبقى انا مش فاهمة هما ليه اصلا عاملين الاستفتاء دة

طب اقول نعم ولا اقول لا

وفعلا زى ما ايوتة بتقول الاخوان عاملين دوشة وعربيات بتلف وميكروفونات يقولك قولوا نعم

لدرجة انى قلت طب بالعند فى الرخامة بتاعتهم دى بقى هقول لا

بس دة طبعا تفكير اى كلام وممكن ييجى فى دماغ اى حد مش بيحب الاسلوب المستفز دة

وكمان زى ما سومة قالت

قالك لو نتيجة الاستفتاء طلعت لا القوات المسلحة هتحطلنا دستور رخامة كدة من غير ما تاخد رأينا

وخلو الناس كلها متلخبطة وانا اولهم

مع انى شفت الموضوع بتاع بيبو ولقيت ان التعديلات دى حاجة كويسة يعنى مش وحشة

وايه المشكلة فيها

طب اللى بيقول لا بيقووول لا لييييييييييييييه؟؟؟

ربنا يعدى بكرة على خييييييييييير

اهلا رحاااااال

نورت المنتدى


انا يا جماعة شفت الموضوع التانى

وفعلا اقتنعت وفهمت حاجات مكنتش فهماها

ودلـــــــــــــــــوقتى

تم التصويــــــــــــــــــــــــت

بصوا انا عايزة افضفضلكوا شوية
مبدايا انا والدتي النهاردة الصبح قالتلي مش رايحة
قلتلها ليه يا ماما؟؟
قالتلي خايفة اقول نعم او لا وربنا يحسبني عليها
حاولت اقنععها قالتلي لا انا محتارة جدا
انا نفسي صوتت بنعم
واللي هيسألني ليه
هقول
مبدايا انا مش مقتنعة باقتران الاستقرار بنعم او لا سواء نعم او لا احنا اللي ممكن نخلق الاستقرار دة
بس انا الفكرة اني قلت في نفسي
كلمة تعديل دي كلمة حلوة
افهمكم اكتر
لما الشعب يعمل ثورة ويطالب بتعديل الدستور
(ودة اللي طالب بيه متظاهرين التحرير)
والمطلب يتنفذ ويتعمل تعديلات في مجملها مقبولة
يبقي الاصل في الموضوع اننا نقول نعم
الا اذا
ظهرت حاجة تخليني اقول لا
فانا في الاص موافقة قعدت استني حاجة تخليني اقول لا ما لقيتش
اغلب المبررات كانت الاخوان واللي هيعملوه
الناس مدية للاخوان اكتر من حقهم
ايه دة بجد اللي انا شفته دة
محسسني ان مصر خلاص هتبوظ
لو قلنا نعم وان الاخوان هيسيطروا
هو مين اللي بينتخب وبيدلي بصوته
مش احنا؟؟
انا مش ضد اللي بيقول لا لاني ببساطة مش واثقة مليون المية مين الصح؟
لكن انا اتضايقت النهاردة لما لقيت زمايلي وناس اعرفهم كانوا بيقولوا نعم
والنهاردة قالوا لا
طيب ليه ؟؟
اصل احنا خايفين من الاخوان
اصل الاخوان ما بيصلوش غير ورا امام يكون منهم
اصل اصل
وحجج بجد انا شايفاها فارغة
اخوان ايه اللي هنعملم حساب للدرجة دي
ولو حتي وصلوا للرئاسة ايه يعني
مش هي دي الديمقراطية اللي انتوا عايزينها
ولو اني واثقة ان عمر ما ارادة الشعب ما توصل الاخوان للحكم مع احترامي لهم
انا غير مقتنعة بكل اللي قالوا لا بس علشان الاخوان والسلفيين
انما لو لهم اسباب تانية مقنعة فما فيش مشكلة طبعا
انا لغاية دلوقت مش عارفة مين الصح اللي بيقول نعم ولا اللي بيقول لا
بس بلاش احنا بقي نعمل شغل الحومة والنظام القدام
يعني مثلا
علي الفيس بوك امبارح واحدة من اللي بيقولوا لا
عمالة تقول خلي بالكوا الجيش عامل خدعة ومغير صيغة السؤال
بدل هل انت موافق علي تعديل الدستور
خلوها هل انت غير موافق وبالتالي اللي يجاوب بنعم كانه قال لا
يعني منتهي الاستخفاف بعقولنا وشغل حزب وطني ما فيش كدة
ما يمنعش اني في وسط كل السلبيات اللي عانيتها من امبارح
والناس اللي بتخسر بعش من امبارح بسبب الاستفتاء
والصاحب اللي ساب صاحبه امبارح بس علشان اكتشف انه من الاخوان
الا اني لقيت لاول مرة انتخابات من غير بلطجية والناس مش خايفين
علي الصناديق وما فيش زحام وعندنا مثلا في بلدي الشباب خصصوا لجان للبنات ودي كانت فكرة حلوة
بالنسبة للنتيجة فانا مش متوقعاها بصراحة بيبو
يعني امبارح كان في نسبة اكبر بتقول نعم في كل اللي اعرفها
النهاردة ناس كتير غيروا للا
كرها في الاخوان مش اكتر
انا رحت انا و8 من صاحباتي
5 قالوا نعم
3 قالوا لا
واحدة علمت علي الاتنين من كتر الحيرة والتوتر بس هي كانت داخلة في الاساس تقول لا
ربنا يقدم الخير لبلدنا سواء نعم او لا

اعتقد يا آية اننا كلنا بنجتهد .. علشان نقدم رأينا فى مصلحة البلد

ومادام ماحدش فينا صاحب مصلحة مباشرة
( مش مستفيدين ولا لينا اطماع فى حكم وسلطة وترشيح ) ..

يبقى موقفنا يصنف ............. اجتهاااااااااد

ويبقى لمن اخطأ اجر .. وللمصيب اجران .

نعم .. او .. لا

الفروق مش بعيدة ومش خطيرة .. بالدرجة اللى تخوف

نعم .. هاتودينا لانتخابات
ولاء .. هاتودينا لانتخابات

وف الحالتين .. هايتعمل دستور جديد

وانا معاكى ف كلامك عن الاخوان ..
مش هايدخلوا المجلس بالرقية ولا بالتزوير

يا اما الناس هاتنتخبهم ... بارادتهم الحرة

يا اما هما نفسهم عندهم انتشار لاعضاءهم

يكفل لهم الفوز .. وف الحالة دى يبقى حقهم ياخدوا مقاعد تمثلهم

ما دام ليهم انتشار ومؤيدين بالكترة دى

--------------

انا مصر .. ان اعظم مكاسب الثورة .. واجمل مافى التعديلات :

الحرية والنزاهة ..

يبقى الصندوق موجود .. ورايك موجود ..

ان شاء الله ربنا مقدر لنا الخير
هو فعلا النهارده في ناس كتيرة غيرت رايها من كلا الجانبين بس ان شاء الله خير
ولازم نرضى بقضاء الله وقدره
ولازم ناخذ بالنا من حاجه
وهي تقوى الله عز وجل
لازم نتعظ من الرسالة الالهية اللي ربنا بعتها لينا
من الزلزال اللي حصل في اليابان على قد ماكان هذا الشعب متحضر
والعدل اللي كان منتشر فيه والامان وكلنا عارفين كده
بس لم يامن من عذاب الله وده بسبب ايه
الشرك بالله قال تعالى :(إذا قال لقمان لابنه وهو يعظه يا بنيّ لا تُشرك باللّه إن الشرك لظلم عظيم)

فامهما طلعت النتيجة لازم ان احنا نرجع لربنا ونحافظ على ايماننا
ونتوب اللى الله من الذنوب
وان شاء الله هانكون في امان وخير

كلامك مظبوط والله يا ايوتة

فيه ناس كتير اعرفهم كانوا هيقولوا نعم

وعشان خاطر الاخوان واللى بيعملوه قالوا لا

مش عارفة ايه المشكلة يعنى لو الاخوان وصلوا للرئاسة

لو عملوا حاجة مش كويسة ومش فى صالح البلد

ميدان التحرير مش هيطير

وشباب 25 موجودين

وفيه شباب تانيين طلعوا كان نفسهم يشاركوا فى 25 يناير

واللى مرحش هيروح

بالنسبة للتوقع فعلا زى ما ايه قالت الواحد مش متوقع ولا احساسه رايحة لحاجة معينة

تقريبا اللى قالو نعم قد اللى قالو لا

وعموما كلها يا اما بكرة بالليل او بعد بكرة الصبح

الخبر اللى بفلوس هيبقى ببلاش

بس انا شفت حاجة غربية اوى وانا بتفرج على التى فى ناووو

حوالى 70 % من الناس اللى جابوهم بيحلفوا انهم اول مرة فى عمرهم يشاركوا ويدلوا باصواتهم

اومال ازاى الانتخابات دووووما كان نتيجتها 99.9 %

ودايما كنت بقول اكيد انا اللى .1 اللى مصوتش دة

وفيه حاجة تانية شفتها وفرحتنى

ان البرداعى ا تم التعدى عليه فى اللجنة اللى ان رايح يصوت فيها

والله مش شماته

بس عشان يعرف ويحس انه مكروه والناس مش حباه

اكيييد التعديلااات لصالح مصر
ربنا يجييييب اللي فيه خيير للجميع وربنا ينصر امة محمد
انا والله ما عندي غير الدعاء الكم يا اهلنا في مصر
ربنا يثبتكم وينصركم علي من عاداكم

beebooo2008 كتب:

وكان في تعليق لطيف من واحد صاحبي كان بيقول
لا للتعديلات بيقولي يا اخي انا مكسوف اول مرة اقابل
الصندوق وهقوله لا .. هههههههههه ..

دى تانى مرة اواجهه فيه صندوق الاقتراع

بس اكيد المرات الجاية اكتر ان شاء الله

انا قررت مشهبقى سلبية تاااااااانى ابدااااااا

وهشجع كمان كل اللى حواليا يبقوا كدة

حلوة يا بيبو ..

ربنا يكتبهالى .. وانا اقوله كل اللى ف نفسى

-------------
نتيجة استفتاء المنتدى .. مشابهة للمؤشرات الاولية

واضح ان الاغلبية الصامتة ... ما حبوش يكسفوا الصندوق

مش زى صاحبك يا بيبو ...
-------------

اقتباس :

انا قررت مش هبقى سلبية تاااااااانى ابدااااااا

وهشجع كمان كل اللى حواليا يبقوا كدة

الله ينور عليك بيبو