السلام عليكم
ياسمينا حبيبتي
بصراحة انا مش عارفة ارد عليكي بصفتي مشروع طبيبة ولا بصفتي انسانة وعضوة في المنتدي
عامة هو في الحالتين غالبا هيبقي نفس الرد
بداية انا مقدرة مدي انفعالك
بس ما ينفعش ندعي دعوة صعبة زي دي وعامة وجماعية
- اقتباس :
- دول ملائكة الرحمة ؟؟؟؟؟؟؟؟؟؟؟
دول ربنا يحرقهم ببنزين في مقبرة جماعيه
ربنا مايرحمهم ابدااااااا اللي معندهمشي ضمير دول ولا قلب
بداية انتي ما تعرفيش ظروفهم بالظبط ايه
انا شايفة ان حسام كان اولي بيه ياخد والدة زميله الله يرحمها علي المستشفي
وهناك الدكتور بارادته او بغيرها لازم يقوم باللازم لانه في وقت عمله
ولو في المستشفي قصروا ودة وارد يبقي نبتدي نلومهم ونعاتبهم ونحاسبهم كمان
عارفة يا ياسمينا انا كنت خايفة ابقي دكتورة لحسن الناس تدعي عليا
لأن وداني من وانا صغيرة شبعت دعوات علي الدكاترة واهانة لهم والدكتور دة حمار ودة غبي
وانا بعذر الناس في كدة لان مهنة الطب مهنة حساسة لأنها بتتعامل مع روح وجسد ومعنويات
الدكتور يقدر يتحكم في الجسد والروح دي بايد ربنا انما المعنويات دي هي اللي بتفرق
- اقتباس :
- تحس انه فعلا زي ماقولت قلبهم اتجمد تلاقيهم سابوه فالتلاجات مع الجثث
للدرجة دي خلاص مابقاش في رحمة
عارفة يا ياسمينا انا اول ما دخلت طب كنت بعيط لماما واقولها يا ماما انا اتعودت علي منظر الجثث انا خايفة لقلبي يجمد ويبقي ما عنديش ضمر ولا احس بالناس
والدتي قالتلي يا بنتي تعاملك مع الناس غير تعاملك مع الاموات
وفعلا دة انا شفته لما دخلت المستشفي حقيقي احساس مختلف ببقي متعاطفة مع الناس
لدرجة غير عادية لأن المرض دة حاجة من الحاجات اللي تضعف وتذل الانسان ولو كان طاغية
انا بحكم دراستي يا ياسمينا قابلت دكاترة ما يتعدوش واتعاملت معاهم
اؤكدلك ان اللي عندهم ضمير فيهم اكتر من اللي ما عندهمش
انا شفت دكاترة بعيني راميين العيانين علي البلاط
وشفت دكاترة بيضربوا المرضي
وشفت دكاترة بيفرقوا في المعاملة للمرضي حسب مستواهم المادي
لكن اطمنك يا ياسمينا لسة في ضمير والناس اللي عندها ضمير اكتر من اللي ما عندهمش
ما تخليش موقف حصل يخليكي تصدري حكم انا شايفاه ظالم نوعا ما
- اقتباس :
- بالمناسبه عمرو اديب كان بيتكلم م يومين ع الدكاترة
معظمهم بيجربوا فالمرضي يدديله دواء جاب نتيجه كويس
مجبشي يبقي خد ده مشي حالك بيه
مشكلتنا بقي يا ياسمينا في مصر كلها حبنا للاثارة
ودة اللي بيعملوا الاستاذ عمر علشان يرضينا
سيادته بقي ما قالش الدكاترة بيعملوا كدة ليه
انا اقولك يا ستي
الميكروبات والبكتريا والفيروسات عندنا في مصر الله ينور
يعني انتي مثلا هتلاقي بكتريا عايشة في جسمك اسمها سالمونيلا
البكتريا دي موجودة بنسبة تخليكي مش مريضة بس هي موجودة
النسبة دي بقي لو موجودة في مواطن اوروبي
كان زمانه بيواري التراب حاليا الا اذا كان اتعالج
المشكلة بقي اني انا كدكتورة لو جاني عيان عنده البكتريا دي بنسبة زايدة
المفروض (ودة بيحصل في كل البلاد المتقدمة )
اخد عينة من البكتريا دي في المعمل واجرب عليها مضاد حيوي معين اشوفه هينفع معاها ولا لا
ولو ما نفعش اجرب تاني
وتالت وهكذا
وعلي كل مريض
تخيلي بقي الشغلانة
والموضوع دة بياخد وقت
فالعيان عندنا ما عندوش صبر لكدة اساسا دي حاجة
ثانيا شركات الادوية بتنزل كذا مضاد حيوي للبكتريا الواحدة
فالبكتريا اللي في مصر بيبقي عندها مناعة لكل المضادات اللي نزلت
وبالتالي بيقض الدكتور يجرب في ادوية جديدة وهكذا
من الاخر يا ياسمين اصلحي منظومة الصحة في مصر وبعدين حاسبي الطبيب
علي فكرة انا مش متحفزة لا للطب ولا للاطباء
وانا اصلا ابعد ما اكون عن حب هذه المهنة لذاتها لكن انا هبقي دكتورة شاطرة وان شاء الله عندي ضمير لأن الطب اشرف المهن بعد العمل بالشريعة بشهادة الامام الشافعي
كما اني آمل ان ربنا يكتبلي بكل ابتسامة ارسمها علي شفاة مريض (ولو حتي ما قدرتش اساعده طبيا )حسنة
مقدرة شعورك الانساني بس انا حبيت اشهد شهادة حق في حق فئة مظلومة (طبعا مش مظلومة ماديا )
بس مظلومة شعبيا
وربنا يرحم هذه الام ويسكنها فسيح جناته