مليونية المحاكمة والتطهير..!!

انا والله شفت المظاهرة علي التلفزيون
اكييييييد في هدف مهم يريده المظاهرون
بالنسبة لمحاكمة الرئيس السابق مبارك هدا حق الشعب في محاكمته

انا قريت الموضوع دة ودخلته زي 4 مرات
وفي كل مرة باجي اكتب وبمسح اللي كتبته
انا وصلت لمرحلة بقيت مش عارفة مين الصح ومين الغلط
الكل بقي بيخون بعضه
انا نفسيا ضد اللي بيحصل دة
لكن لما برجع وبفكر بعقلي بقول ما هو يمكن لو سكتوا فعلا الدنيا تنام من تاني
بس انا مثلا قريت مقال من كام يوم لكاتب مش فاكرة اسمه
بيقول عفوا ايها الجيش لقد نفذ رصيدكم
وكله اتهامات للجيش وللقيادات في المجلس العسكري
طيب لو خوننا الجيش
دة يبقي مصر بقي ما فيهاش حاجة عدلة
اللي غايظني في كل دة الناس اللي بتتكلم بلسان ناس تانيين
ليه الناس المتظاهرين دول ما يهتموش بأراء الناس التانية العادية اللي في البيوت
بجد انا وصلت لمرحلة بقيت فيها محتارة قوي وبقيت بكره سيرة الثورة دي اساسا
عارف من كام يوم قريت تعليق عجبني وفي نفس الوقت احزنني
واحد بيقول طالما بتوع التحرير كل يوم جمعة هيعملوا مظاهرة علشان يخلصوا مطالبنا
يا رب كل الايام تبقي جمعة علشان يخلصوا بدري
التعبير عجبني كنوع من انواع الفكاهة والهم اللي يضحك
بس اتضايقت لاني حسيت ان مصر بقت ناجيتين
ناحية شغالة وناحية تانية تحت رحة الناحية الاولي كأن في جزء مسير وجزء مخير
حتي وان كان الجزء التاني دة بيجيب لنا حقوقنا

انا معك يا ايوته في الي كتبته
بس انا الي بتمناه انو مصر تحرر من الظلم والفساد

أولا بالنسبة ان المتظاهرون يعملوا محكمة فى ميدان التحرير
و طلعوا هما الأحكام ده شئ انا كنت رافضاه من الاول
و باعدين مهما كانوا بيقولوا ان يحيى الجمل ده كان كويس
دلوقتى بقى كوخة
لما كل شوية يطلعوا واحد عايزين يقيلوه هيتبقى مين فى البلد
أما بقى بالنسبة لطلباتهم فى الاسراع فى اصدار الحكم ده انا متفقة معاه تماما
أما بخصوص ان الجيش متواطئ أو متباطئ ده أكبر دليل على انه فيه مظاهرة مضادة
يعنى أكيد معظم اذا ماكانش الكل مش فى محلها
و بصراحة انا ضد استمرار المظاهرات ديه لحد دلوقتى

بصراحة انا رايي في الموضوع ان احنا لسه بيتلعب بينا
انا شكلي كده هاعمل ثورة ضد الجيش بجد
علشان النظام الفاسد يتلغي فعلا لازم كل القيادات سواء داخلية او جيش لازم تتغير صدقوني
الكل متواطئ في كل حاجه والله مشير ده اكبر عميل لحسني
ومعظم مشاريع مشير طنطاوي معمولة مع صاحبنا جمال ممبارك
وانا متأكد انه بينظف نفسه دلوقتي اعرف قيادات كبيرة في الجيش بيحكولي
على فضايح الجيش والبلاوي اللي فيه وعلى فكرة انا كنت متوقع خطاب مبارك ان كان هايكون قريب واللي اكد لي ذلك انهم الاسبوع اللي فات نشرو الفيلا بتاعته في شرم الشيخ والغريب ان الناس انبهرو بها وانا بصراحة شايفها متواضعه جدا جدا جدا انا في نظري قولت عمرها ماتليق بالرئيس وده اللي خلاني اقول ان حسني مبارك هايبدا يستعطف قلوب المصريين من جديد والله الراجل ده داهية بجد انا بصراحة شايف اذا الحكومة الحالية اذا مأخذتش قرارات حاسمه في قضايا الفساد صدقوني مصر ده هاتضيع انا عايز واحد بس من الرؤوس الكبيرة يقع وهو هايوقع كل اللي معاه

ياليت تتابعو التقرير ده يمكن نستوعب ايه اللي بيحصل حولينا
نظام مبارك جنة المنحرفين على الارض

يا محمود انا مع المطالبات دي..

لأن للأسف المجلس الأعلى للقوات المسلحة بيرتكب نفس الغلطة الأزلية للمسئولين المصريين

ألا وهي انه بيتخذ القرار ببطء.. ومش بيتحرك الا بعد الضغط..

فبيدي احساس انه مش هايتحرك ابدا الا لو الناس قاموا بمظاهرات واعتصامات..

في حاجات كتير فعلا الناس قدموا فيها طلبات للمجلس دون اي مظاهرة..

ومطالبهم متحققتش الا بعد الاعتصام..

طيب ليه كده؟؟

طيب ماهو دا اللي كان بيعيب تصرفات حسني مبارك بعد الثورة..

كان بياخد الاجراء بعد اما الدنيا تخرب والناس صوتها يتنبح

الناس دي مش هاتبطل تتظاهر الا اما يلاقوا رد الفعل اسرع من كده


تاني حاجة بقى انا مكنتش مصدقة موضوع التواطؤ.. على الرغم من اني لا اثق في المشير طنطاوي ابدا لانه عليه ما على النظام السابق من مآخذ.. ودا مش عشان هو بينتمي ليه وخلاص.. لا كفاية القانون اللي تم اصداره وكان بيسمح لوزير الدفاع ورئيس الجمهورية انهم ياخدوا نسبة من صفقات الاسلحة

قانون متفصل زي باقي القوانين.. بس كفاية انه قبلها.. يبقى دا اتجاهه.. وفي حاجات تانية كتير تؤخذ عليه..


اللي عرفته دلوقتي حالا بقى وحارق دمي

ان سجن المزرعة ابتدى يتحول إلى منتجع.. الباشوات اللي احنا فاكرينهم بيقضوا فيه عقوبة متهنين فيه وبيقضوا اجازة..

هشام طلعت مصطفى بنى ملعب كورة (عادي).. وملعب تنس (اهو رياضة).. وحمام سباحة (لا تعليق) وكل يوم اكل من برا (دليفري).. دا غير انهم بيتفقوا على تكييفات تتركب في الصيف..

المعلومات دي من شخص شاف بعنيه.. والشخص دا انا اثق فيه 100% وكانه شاف بعنيا..

والله دمي محروق وعايزة اصرخ واروح اكسر السجن على دماغهم..

ونفسي اوصل الكلام دا للنائب العام يروح يعمل جولة في السجن .. قصدي المنتجع

حسبي الله ونعم الوكيل

لو حد يعمل بلاغ للنائب العام.. انا مش عارفة ممكن اعمله ازاي..

خصوصا ان الشخص اللي قاللي مكانش عايزني اقوووول..

ممكن نروح على صفحة النيابة العامة على الفيسبوك ونقول؟؟


احنا بس عاوزينه يروح في جولة وهو هايشوف كل حاجة بعينه..

مش هانقول تفاصيل لاني مش هاقدر اقدم دليل ولا شهود

ولا ايه رأيك؟؟؟

beebooo2008 كتب:

اعتقد هما بيحتاجوا ادلة يا اسمااااااء
ومش عارف لو اتكلمنا خايف نعمل بلبلة وخلااااااص
وبعدين ما احنا بنشكك ف النائب العام نفسه
يبقى هو ال هيجيب التايهة ...
للاسف يااسمااااء بقى في حالة تشكيك ف كل الناس دلوقتي
بغض النظر بقى هو فعلا فلول او اذناب او ازيال ولا لا
وعجبتني اوووووي كلمة سمعتها اليومين ال فاتوا دول

الشعب يريد تغيير الشعب

لا يا بيبو.. التفتيش على السجون دا من مهام النائب العام ووكلائه..

والمفروض يقوموا بيه بشكل دوري لوحدهم من غير بلاغات.. لكن الواقع غير كده..

هم بيعتبروه حاجة روتينية ومش بينفذوه فعلا.. وبيكتفوا بتقارير من مأمور السجن وخلاص..

انا فعلا حطيت كومنت في الصفحة بتاعة النيابة العامة..

واضطريت لاني اقوله بصيغة فيها تهديد شوية..

وقلتلهم يا ريت يتحركوا قبل اما الشعب ياخد خبر.. عشان نتفادى اي اعتصامات او مظاهرات امام السجن..

ياااا رب يجيب نتيجة.. لان بجد بجد حسيت ان الثورة بتدفن ..!

يااااا رب يا بيبو

مصر تسجل سابقة عظيمة بمحاكمتها لرئيسها المخلوع مبارك .. وأما ما كان من محاكمة صدام حسين فإنما كانت تحت الاحتلال .. وهنا أقول : لا مجال للشماتة عند الموت أو المرض .. إلا أني أرجو أن لا يكون مرض مبارك المفاجئ محاولة لاستدرار عطف المصريين أو للابتعاد عن المثول أمام جهات التحقيقات فى أماكنها الطبيعية .. !!