اللي حصل امبارح مليونية اتوبيسات

السلام عليكم

هو ميدان التحرير اللي حرر مصر من حاكم فاسد واعوانه

هو نفسه اللي حاصل فيه مليونية الاتوبيسات دي ؟؟؟؟؟؟؟

هو نفس اللي حاصل فيه التكسير والضرب ده ؟؟؟؟؟؟؟

هو نفسه اللي فيه قنابل وتدمير للعربات والمحلات ؟؟؟؟

_

هما الناس دول عاوزين ايه ؟؟؟؟؟؟؟؟؟

بلااش دي

الناس اللي شايفه نفسها مؤهله للحكم ليه ملهمشي دور فاللي بيحصل

ده ؟؟؟؟؟؟؟ مش دلوقتي وقتهم ولا امتي وقتهم ؟؟؟؟؟؟؟؟؟

المفترض ان الناس اللي نازلين فالانتخابات دول ربنا هيكون مفوضهم

لخدمة الناس في الارض والعدل ...هما فين ؟؟؟؟؟؟؟؟؟

_

الحكومة

عاملة ازمة الغاز عشان تلهي الناس شوية عن السياسية !!!1

لا دي بتعمل مشكلة اكبر وهي مش حاسة

والناس مش هتبعد عن السياسة والناس الطمعانة فالحكم هتفضل طمعانة

فيه والله اعلم بيهم وبافكارهم

_

انا عاوزة افهم مرشحي الرئاسة فييييييييييييييييييييييييييييييييييين ؟؟؟؟؟؟؟؟؟؟

لو ملكشي دور دلوقتي مش عاوزينك لانك مش هتاخدها عالجاهز

وهي مش بالساهل

الرئيس القادم

ماينفعشي يتعامل زيه زي اي مواطن

لازم يثبت وجوده والا ملوش لازمة للنهاية

_

عصام شرف يتصرف كما لو انه يزال مواطن من المواطنين

الله يكون في عونه تقريبا نايم من امبارح ولسه نايم

بدي اعطيكي رد على هالموضوع مع اني فلسطيني اعيش التجربة

اي حكومة واي رئيس قادم للشعب المصري موش هيغير اي حاجة لان السياسة العالمية

مربوطة باجندات خارجية حتى ولو حكم الاخوان مصر لن يتغير اي شيئ في المستقبل

ويبقى الوضع كما هو

انا هنا لا اريد ادخل في السياسة ولا جوابي هو احباط لكم ولكن هي الحقيقة المرة القادمة

الريح77

كلامك صح فعلا

وده الواقع اصلا ولو مش ده الواقع

كانت المشكلة دي اتحلت ....عدي سنة عالثورة وايه اللي حصل

في يوم حسينا انها بدأت تتعدل ؟؟؟؟؟؟؟؟؟؟؟

انا محبطة جدا وما حدش يقولي انا متفائل ربنا يستر

في ناس بتشعللها جامد واحنا شايفين بس نص المشهد

ياريت يا شباب او بنات

لو اللى بيحصل مش واضح قداكم ومش عارفين

تحددوا هو في ايه .....

يبقا الحل الوحيد ... انكم تنزلوا ميدان التحرير وانتو تعرفوا

يا سلام يا رحال ننزلوا نعملوا ايه بقي ؟؟؟؟؟؟؟

انا شايفه ان افضل حاجة تتعمل هي اننا نصببببببببببببببببببببببر

كل واحد يرجع شغله ونفضوا الميدان ونستني نصبر شوية لحد الانتخابات

بالشكل ده مافيش انتخابات ومافيش فايدة بس احتمال كبير يحصل موقعه الجمل تاني!!!!!!!!!!!!1

_

والنبي يا رحال بس فهمني

الناس اللي فالتحرير عاااااااااااااااوزين ايه ؟؟؟؟؟؟؟؟

دا وقته ؟؟؟؟؟؟؟؟؟؟

اقتباس :

احتمال كبير يحصل موقعه الجمل تاني!!!!!!!!!!!!1

ما هي تعتبر حصلت اساسا يا رحاب

علي الفكرة الوضع لغاية يوم الجمعة كان ماشي تمام

بس اللي غايظني في الموضوع حاجتين

الاولي ان ناس كانوا نازلين التحرير وناس كتير علشان يرفضوا وثيقة السلمي

والله ناس كتير منهم مش عارفين اساسا بتتكلم عن ايه

يعني كل ما اسأل حد انت نزلت ليه يقولك علشان وثيقة السلمي

تقوله وثيقة السلمي دي فيها ايه

يقولك هما مين اصلا علشان يحطولنا وثيقة دول بيشتغلوا عندنا

دي حاجة

الحاجة التاينة اللي بتغيظني شغل الهبل اللي بيحصل علي تويتر والفيس بوك وخلافه

تلاقي واحد داخل من غير احم ولا دستور ولا كان في اي حاجة اساسا ويقولك حي علي الجهاد انزلوا في الميادين

الناس ماتت

ناس بتشعلل الدنيا وخلاص كان وقتها يوم الجمعة بالليل ولا كان حصل حاجة اساسا

برضه الجزيرة ذاعت علي شريط الاخبار ان في قتل في سموحة وبلطجة والامن قاتل مش عارفة كام

والنت انتشر عليه الكلام دة وناس اصلا يعني انا توقعاتي انهم عمرهم ما شافوا سموحة اساسا

لانهم من بلاد بعيدة عن اسكندرية يقولك اه انا شوفتهم بعيني

ويحط اخبار مغلوطة علي الفيس بوك

وانا ليا زمايل وناس اعرفهم ساكنين في سموحة وعند مديرية الامن اللي فيها الشغل كله وبيقولوا ما فيش حاجة عناك غير شوية معتصمين واقفين حوالي 50 واحد

وجنبهم شوية عساكر امن مركزي والاتينين عايشين حياتهم مع بعض

علي الصعيد الاخر انا مستغربة قوي من موقف المجلس العسكري يعني دة مبارك كان بيقول خطابات يهدي الناس

انما دول ولا حتي طلعوا حد منهم يقول اي حاجة

التليفزيون المصري كمان باين قوي انه بيستهبل يعني

يجيب شوية ناس مع وشوية ناس ضد علشان يرضي الناس

وبعد كدة تلاقي خبر عاااااااااااجل يخرم عينك

ضبط 3 اجانب اثناء اعتداءهم علي ضباط حماية مديرية الامن

طيب فين صورهم مثلا علشان نبقي عارفين ؟؟

بلاش فين صورهم

يعني اشمعني الخبر دة يعني اللي مهتمين بيه قوي كدة

الوضع بقي سيء قوي

من الآخر كل واحد بقي بيدور علي مصلحته وبس

وربنا يستر علي بلدنا

صح يا اية

حلو يعني العطلة اللي الناس فيها دي ؟؟

حلو يعني عدم الاستقرار ده ؟؟ وقلة الامان وغلاء الاسعار

حلو الضحايا والموت والتخريب ده ؟؟؟؟؟؟؟؟؟؟

انتوا عاوزين ايه ؟؟؟؟؟؟؟؟؟

الناس اللي فالتحرير دي عاوزة ايه

السلام عليكم
طبعا انا مش ممكن هاحجر على راى حد
وكل واحد من حقه يعبر عن نفسه ويختلف زى ما يحب
بس ليا رجاء واحد ...
ممكن لما الموضوع يتعلق بدماء شباب زى الورد ( لا فيهم مسيس ولا بلطجى )
نحرص شوية فى كلامنا ........!!
انتوا طبعا عارفين ان مات - حسب المعلن -من 33 الى 40 شاب
وان الاصابات تقترب من 2000 ضحية فى 4 ايام فقط
وانتوا لازم تسالوا نفسكم مين المسؤل عن دم الناس دى
ولازم تفتكروا احنا بنحاكم مبارك بتهمة ايه ؟؟؟
تهمة قتل المتظاهرين ...............!!!

ولازم تسالوا نفسكم احنا عملنا الثورة ليه ....!!؟
علشان كرامة ودماء واعراض المصريين

مين اللى بدأ التعدى ...........!!؟؟

مين اللى اقتحم الميدان بقوات سحلت وطحنت 30 فرد عاجز معتصم
( فى نفس اليوم اللى صرح فيه عصام شرف ان الاعتصام حق دستورى لكل مواطن )
ومين دول ....؟؟ مصابى الثورة اللى ما اخدوش حقهم لحد النهاردة
ولما نزل الشباب يحمى الموجودين ويعرف ايه اللى حصل
اصيب 750 ومات 3 شباب يوم السبت
وبعدين التليفزيون المصرى يقول : مثيرى شغب وبلطجية
ويطلع الفنجرى ( اللى عظم بالتحية لشهداء يناير ) يقول مؤامرة
ويتهم الشباب فى التحرير ......!
وشوية كلام فارغ كتير يصدع الدماغ
لاء وعصام شرف يشيد بتعامل الشرطة مع المتظاهرين .....!!!!

احنا لسه لحد النهاردة بنتهان وننضرب ويجروا الجثث على الارض وتترمى فوق الزبالة فى مشهد من اسوأ واحقر ما يكون

ولسه انتوا بتسالوا اللى فى الميدان دول عايزين ايه ؟؟؟؟؟؟؟؟؟؟؟؟

انا اقولكم عايزين ايه .........!!

عايزين يكون للمصريين كرامة .. عايزين يكون لكل مصرى حق التعبير عن رايه عايزين القصاص لدم الضحايا .. عايزين يقولوا للفرعون الجديد :
دم المصريين غالى قوى .. قوى ..
عايزين يخلصوا من حكم العسكر المستبد القمعى الوحشى
عايزين يصلحوا غلطة العمر بالموافقة على تولى المجلس رئاسة مصر
بعد المخلوع ..
قلنا مليون مرة ان الشعب المصرى هو الضامن الوحيد والحارس الوحيد
للثورة واهدافها .. الحرية - العدالة - الكرامة - التغيير

صبرنا حتى نفد منا الصبر .. انتظرنا من المجلس :
الحرية ....... عمل لنا محاكمات عسكرية واعلن حالة الطوارئ

العدالة .. محاكمات هزلية ( مدنية ) - لمدانين سلفا بحكم الشعب والثورة
ده غير اننا قربنا نبوس على ايده عشان يسمح للمصريين بالخارج فى التصويت
وقربنا نبوس على رجله .. عشان قانون العزل السياسى

الكرامة ....... يا قلبى لا تحزن .. اتقتل المصريين ع الحدود - وادهسوا فى ماسبيرو .. واتقتلوا كمان وهما بيعبروا عن رايهم بس فى التحرير
واتهانوا فى العمرة فى السعودية .. ومفيش اى رد فعل .. قصدى
تم تشكيل لجان لتقصى الحقائق ... وحدث عنها ولا حرج

التغيير ......... ما شاء الله غيرنا ارقام الموبلات وتردد القنوات وشوية شعارات للشرطة ..
وهيا هيا .. نفس الصفاقة والحماقة والتسلط ..
هو هو ... نفس الطريق ونفس الكلام ونفس الاتهامات
خونة - عملاء - مندسين - اجندات وصوابع خارجية
ده حتى نفس الخطابات باستهلالها واستهبالها
( لدرجة خلت رئيس الوزراء يبتسم لدرجة الضحك وهو بيقرأ الجملة الاخيرة )
احداث ماسبيروا .. بعد موت 33 بنى آدم مصرى وهو بيقول :
حفظ الله الوطن وشعبها .. وظبط نفسه وعدل الجملة :
حفظ الله الوطن وشعبه .. فاكرين جملة مبارك : حفظ الله مصر وشعبها

نفس خطاب مبارك الاول .. هو خطاب المشير
نسخة تكاد تطابق الاصل فى بنوده وقراراته

لاااااااااااااااااااااازم تعرفوااااااا حاجة مهمة جدا
عن الشباب اللى بينزل التحرير فى ظروف زى دى .. وهو عارف ان فيه مواجهات دامية
الشباب ده بيخاطر بعنيه وصحته وعمره كمان ..
وفى شباب منهم كتييييييييير مالهمش انتماء سياسى ولا حزبى
انتماءهم الوحيد .................. لمصر
وبالتالى المفروض نقدم لهم اسمى التحية والتقدير ونرفض اى اعتداء وحشى عليهم
الشباب دول بيخاطروا بعمرهم ... علشانا كلنا
علشان دم الضحايا ما يروحش هدرا .. وعلشان دمائنا كلنا وكرامتنا وحريتنا تصان وتحفظ
-----------------
الكلام المخنوق فى صدرى كتير قوى

دول شوية كلام فى صدرى :


ضيفوا عليهم .. قتل المتظاهرين فى احداث ماسبيرو
كشف العذرية للفتيات .. الغياب الامنى المتعمد .. ( وظهوره المفاجئ فى التحرير )
كدبة الاستفتاء .. وصنية الفتة الدستورية اللى بنشوفها كل شوية
ومحشى كرنب القوانين الانتخابية .. و تهميش الحكومة لدرجة الاهمال ..
التخوين لحركة 6 ابريل .. وبعدها اتهام صريح للتيارات الاسلامية بالعمالة للخارج
القتل البشع فى التحرير .. ومؤامرة كبرى ضد المصريين

كنت متردد انزل الفيديو ده من كام يوم .. حرصا على مشاعركم
لكن للاجابة على سؤالكم
مضطر انزله



لكل الاسباب اللى فاتت دى ...احب اقول :
انا طلقت شرعية المجلس العسكرى طلاقا بائنا .. لا رجعة فيه
وزى ما قال حازم صلاح ابو اسماعيل :
هذا المشير طنطاوى غير امين على ارواح المصريين
ولا يمكن ان نأمنه على انفسنا واموالنا واعراضنا خمس دقائق من الان

اما عن منظمة العفو الدولية :
- المجلس العسكرى اسوأ من نظام مبارك
- المجلس العسكرى يستخدم ( اساليب وحشية ) فى التعامل مع المتظاهرين السلميين

( وانا شاهدت هذه الاساليب بام عينى وانفى واذنى )

يااااااااااه يا استاذي كل ده ؟؟؟؟؟؟؟؟

بس انا عاوزة اقولك ع حاجة لو هنتظاهر عشان اللي فات

يبقي مافيش حاجة هتحصل والبلد حالها هيقف خلاص الثورة اتعملت وخلاص

نبدأ بقي وكل واحد يبدأ بنفسه اولا

انا انهردا سمعت لفظ وانا فالشغل واحدة بتقول (اديني ع قفايا بس عيشني فامان ) .0

حاليا الناس خايفه من عدم الاستقرار وعدم الامان والغالبيه مش بيفكروا في كرامة مطلبهم الاول الامان

الغالبيه اللي فالبيوت وانا منهم بنفكر اولا فالامان وخايفين من البلطجة وخايفه ان مصالحنا تتعطل

فاحنا هنستني الانتخابات والناس دي اللي هتمثلنا وهي دي املنا

طيب بقولك عاوزين ناس مدنين يديروا البلاد هاتلي 3 من المتظاهرين مختارين واحد يمثلهم !!!!1

الفيديو ده فظيع قطع قلبي والله انا مش بقدر اشوف الحاجات دي

انا مش فاهمه انا لو عندي ابن اسيبه ينزل فالمظاهرات ؟؟؟؟؟؟؟؟؟؟

الله يكون في عون الامهات بجد

يا جماعه مانعدوا الفترة دي بس ولما يجي ناس تمسك البلد ساعتها بقي

نعمل مظاهرات لو كانوا زي اللي قبلهم

كدا كتييييييييييير

والله يا رحاب انا ماكنت عاوز انزل فيديوهات تضايق حد
انا عندى بلاوى غير كده .. واليو تيوب مليان .. واللى يروح الميدان يشوف بعينه
بس باحزن لما الاقى مفيش حتى مجرد التعاطف مع الابطال دول
انا هاتجنن .. بعد ما قتلوهم فى التحرير .. رجعوا قتلوهم ف الاعلام وقالوا عليهم بلطجية وخونة ومنتفعين ..
وانسان ( حـــ .... ) زى توفيق عكاشة ومدحت شلبى وشوبير .. نازلين تشويه فيهم
---------
نرجع بقى لردك

اقتباس :

بس انا عاوزة اقولك ع حاجة لو هنتظاهر عشان اللي فات

يبقي مافيش حاجة هتحصل والبلد حالها هيقف خلاص الثورة اتعملت وخلاص

نبدأ بقي وكل واحد يبدأ بنفسه اولا

كلام عاطفى جدا .. بس مش عقلانى
لانى لو سيبت اللى فات يعدى ( بمنطق السلامة اسلم )
يبقى بكرة هايموت 50 و100 والف
وانتى عارفة : ( يا فرعون ايه فرعنك .. قال ما لاقيتش حد يلمنى )
وآدى نتيجة تاخير محاكمة مبارك والعادلى واعوانهم .. لا عرفنا نحاسبهم ولا حتى نرجع فلوسنا منهم ... و النتيجة .. مازالت الشرطة كلها مدانة فى نظر الشعب
لحد ما نحكم على اللى قتلوا المتظاهرين .. وساعتها نبقى كتبنا شهادة براءة لباقى افراد وقيادات الشرطة ..
ثانيا .. موضوع الثورة اتعملت وخلاص .. نهدى بقى وندور على شغلنا ومصالحنا
كلام جميل .. الثورة اتعملت ايوة ..
ومفيش حاجة اتغيرت بالنسبة للشعب
لا امان ولا اقتصاد ولا حرية ولا عدالة ولا تغيير
وانا هاثبتلك ..
ان خروج الناس للتظاهر هو اللى بيصلح البلد ومسارها مش بيخربها
جمعة التطهير ...نجحت ---- بداية محاكمة مبارك ( بس ضحكوا علينا وعملوا محاكمة وهمية )
جمعة 29 /7 ...نجحت ---- الغاء وثيقة المبادئ الحاكمة
جمعة 9/9 تصحيح المسار .... فشلت --- اعلان حالة الطوارئ ومضاعفة المحاكمات العسكرية
احداث ماسبيرو ... فشلت ... مات 33 مصرى منهم 7 من الجيش
مليونية المطلب الواحد ...كانت هاتنجح .. ضربوا المعتصمين
وقتلوا فوق 40 مصرى واصابوا الاف ..
مليونية انقاذ الوطن 22 / 11.. نجحت ... اقالة الحكومة ورفض الوثيقة واعلان موعد محدد لانتخابات الرئاسة والغاء المحاكمات العسكرية للمدنين واصدار قانون العزل السياسى ( مع التحفظ ) ... ولسه المكاسب فى الطريق
دى طبعا امثلة لا حصرا ..
يبقى مين اللى بيصلح ومين اللى بيبوظ ...؟؟
ومين اللى بيحرس الثورة وبيحرس مصيرنا ؟
ومين اللى مصر انه ما يعملش حاجة للبلد دى الا بدم المصريين واقتصادهم وامانهم ومصالحهم ؟ .. ومين اللى مش راضى يحقق مطلب الامن والامان للمصريين .. تعرفى اللواء سامح سيف اليزل ( محلل استراتيجى فى الاهرام )
بيقول خطة استعادة الامن لا تحتاج اكتر من اسبوعين على ارض الواقع وبسهولة
اسبوعين اتنين ... ومصر ترجع بلد الامن والامان
حتى المذيعة سالته : طيب هما ما بينفذوهاش ليه ؟ هما مش عارفينها والا مش عاوزين ؟.
قالها : حقيقةً لا ادرى
-----------------

اقتباس :

انا انهردا سمعت لفظ وانا فالشغل واحدة بتقول (اديني ع قفايا بس عيشني فامان )

مع احترامى .. قولى لصاحبتك .. اى امان بالظبط اللى بتدور عليه بعد ما تاخد على قفاها ......؟؟؟
كده زميلتك محتاجة تعيد تعريف المسميات عندها
علشان مش معقول انى اخد على قفايا .. واقول انى عايش فى امان ...!!!
كده احنا محتاجين تعريف جديد للامان ..
انا هافترض ان التعبير خانها
وانى فاهم انها تقصد ان الاولوية قبل اى شيئ هو الامان ... تمام
قوليلها .. المجلس بيحكم بقاله اكتر من 10 شهور ومفيش امان
وقوليلها .. ان اللى ماسك الداخليه من يوم الاحد لواء جيش وعمال يدمر فى الناس
وان المتظاهرين فى التحرير بيطالبوا بالامان .. وان كل حاجة بنحلم بيها مرتبطة بالامان .. والامان ده مش هانشوفه غير لما يحكم البلد حد بيراعى ربنا ويراعى ضميره فيها .. وان الاقتصاد مش هايتحسن وفى حالة طوارئ
وان طول ما المجلس العسكرى فى الحكم مفيش استثمارات هاتنزل البلد
وطول ما احنا فى الفترة الانتقالية .. الناس هاتفضل مختلفة
وان الامان المنشود فى عودة الثوار للبيوت .. معناه الانتحار االجماعى
ونسيب البلد للمنتفعين والساسة والمجرمين اللى بيحكمونا وبنقول للبلطجية اتفضلوا برطعوا ف البلد براحتكم
وانها مقاومة سلبية على طريقة غاندى
اللى عايز امان ... يطالب السلطة بتحقيقه .. دى مش معضلة
انما بقى السلطة عاجبها الوضع كده ... يبقى ما نرميش بلانا ع الثوار
-------------
تصدقى بالله .. انا شوفت امهات جايبين ولادهم معاهم
وشوفت بنات زى الورد المفتح .. بيهتفوا ويصرخوا فى التحرير
وشوفت بنت شايلينها مصابة فى شارع محمد محمود
وشوفت عجزة وشيوخ داخلين التحرير بينهجوا من حكم السن
وشوفت معاقين على كراسى متحركة .. وبعكاز
وشوفت شباب يقول للبدر قوم .. ده مكانى
ويدخل ع التحرير فاتح صدره
شوفت ناس بتقلع شالها وتفرشوا للمصلين يسجدوا عليه
وشوفت ناس واقفة تهوى على المصلين عشان يحموهم من تاثير الغاز
وشوفت اطباء .. يستاهلوا نياشين على مجهودهم
بصى :
ابطال الميدان
- الصفوف الامامية فى المواجهات
- الفدائيين اللى راكبين الموتوسيكلات لمدة 24 ساعة بينقلوا المصابين واالقتلى
- الناس ( شباب وبنات ) ماسكين بخاخات محلول الخميرة وقزايز خل يرشوا على كل المتظاهرين عشان يخففوا عنهم تاثير الغاز
- الاطباء الراائعين ... فوق الوصف ( اللى اضرب عليهم غازات فى المستشفى الميدانى .. راحوا ناقلين مكانهم لحتة ابعد وكملوا رسالتهم
- المتظاهرين بقى .. كلٌ حسب نيته
وف الاخر ... يقولوا عليهم بلطجية ...........!!!!؟؟
--------------

اقتباس :

يا جماعه مانعدوا الفترة دي بس ولما يجي ناس تمسك البلد ساعتها بقي

نعمل مظاهرات لو كانوا زي اللي قبلهم

اوعدك ان ده هايحصل .. وان اللى هايمسك البلد دى وما يراعيش ربنا فيها
مش هايشوف يوم عدل فى حكمه ..
ونتمنى انه يكون عادل ويراعى الشعب العظيم ده
واحنا نشيله على راسنا

يا جماعه انا حابه اصحح حاجة

انا فعلا ضد اننا نتظاهر ورايي اننا نبدأ نشتغل

بس انا لسه شايفه في برنامج عمرو الليثي لقطة كدا جايبين المصابين فالمستشفي

كلهم بلا استثنااااااااء مصابين في العين !!!!!.يا نهار اسود

شباب كلهم من 16 لحد 25 كلهممممم مصابين في العين الله يخرب بيتوهم اللي اذوهم دول

يعني اللي بيضربوا بالزفت النار والخرز سايبين كل جسمهم وماسكين فالعين دي كذا اصابه فالعين

وياقلبي بقي شوفت ام ولد عنده16 سنة عماله تصوت ع عين ابنها اقسم بالله لو انا امه

اقسم بالله ماكان هيشفي غليلي اولع فالبد كلها وفالمشير وفالداخليه وفي كل مراكز الشرطة وياريت اهدي

والله والله الله يكون في عون امهات الولاد المتصابين دول كلهم فقدوا عنيهم

اللي بيضرب بيضرب بغباء مش تهويش لااااااا دا قاصد وعارف الضربه رايحة فين منهم لله

مش بني ادمين دول اللي بيضربوا فيهم ؟؟؟؟؟

اقتباس :

بس باحزن لما الاقى مفيش حتى مجرد التعاطف مع الابطال دول
انا هاتجنن .. بعد ما قتلوهم فى التحرير .. رجعوا قتلوهم ف الاعلام وقالوا عليهم بلطجية وخونة ومنتفعين ..

انا شعري طقطق ابيض لما شوفت شباب كتيييييير

كلهم مصابين اصابه واحدة ضرب رصاص حي فالعين ادت الي انفجرها

والله العظيم مقدرتش استحمل ايه ده ؟؟؟؟؟؟

_

اقتباس :

كده زميلتك محتاجة تعيد تعريف المسميات عندها
علشان مش معقول انى اخد على قفايا .. واقول انى عايش فى امان ...!!!
كده احنا محتاجين تعريف جديد للامان ..

اصل انت مش عارف هي قالت كدا ليه

بنتها ساكنه في المدينة الجامعية اللي في سموحة وطبعا خايفة عليها

وكل شوية تقول زمان البلطجية هيطلعوا يموتوهم

فهي طبعا من منطلق غريزة الامومة بتقول اديني ع قفايا بس سبني اعيش في امان

يااااااااه يا استااااااااذنا

بجد كلام حضرتك طلع حاجات كتير جوايا كنت عاوزة اقولها بس مش عارفة اعبر

انا فى الحقيقة بقالى اكتر من 5 ايام مزروعة قدام التلفزيون .. بقلب من cbc للنهار ومنها للنيل وروتانا مصرية ومن التحرير لأون تى فى .. لحد ما ورمت .. ايام ثورة 25 يناير مكنتش بتابع كدة.. والقى ناس تحلل وعالم تتكلم و ناس تقول شعارات .. وناس تقول انتخابات .. بس بجد مسمعتش جملتين من حد عجبونى اوووى زى ما سمعت من حضرررتك ..

بس انا عندى سؤال رفيع وشاغلنى .. لما احنا مش عاوزين حكم العسكر .. وبنقول للمجلس العسكرى ارحل .. انت مالكش فى دهاليز السياسة

وكلفنا الحج الجنزورى اللى الله اعلم الراجل دة صالح ولا طالح ولا فل من الفلول .. ولا عشان اصطدم مع مبارك فى موضوع التوريث يبقى راجل كويس وهينفع !!

السؤال بقى .. هــــــــــــــــــل .. الحكومة اللى هيشكلوها دى هترضى كل الناس اللى واقفة فى التحرير ؟؟

هــــــــــــــــل .. بعد ما يختار وزرائه ويبدأ العمل .. هنلاقى الناس رضيت و سابت التحرير وانتبهت بقى لأكل عيشها ؟؟

ولا بردو هنلاقى خمسيت ستين واحد طالعين يقولك (( تسقط تسقط حكومة الجنزورى ))

هــــــــل الرضى هيكون موجود عند كل اطراف واطياف واحزاب وحركات الشعب؟؟

**
انا بس لفت انتباهى صاحبتك يا ياسمينا اللى بتقولك يديونى على قفايا بس ابقى فى امـــــان

كدة الفلول ورجال الاعمال وبلطجية النظام السابق قدروا يوصلونا لجملة ( ولا يوم من ايامك يا مبارك كفاية اننا كنا فى امــــــــان )

ويـــــــــارب سترك على اللى جاى .. ويعدى فترة الانتخابات دى على خيــــر

**

رب أصلح حال مصــــــر وحال اهلهــــا

اقتباس :

اللواء سامح سيف اليزل ( محلل استراتيجى فى الاهرام )
بيقول خطة استعادة الامن لا تحتاج اكتر من اسبوعين على ارض الواقع وبسهولة
اسبوعين اتنين ... ومصر ترجع بلد الامن والامان
حتى المذيعة سالته : طيب هما ما بينفذوهاش ليه ؟ هما مش عارفينها والا مش عاوزين ؟.
قالها : حقيقةً لا ادرى

اومــــــــال مين اللى يدرى ؟؟

ادى الكلام اللى يفقع

اقتباس :

اللي بيضرب بيضرب بغباء مش تهويش لااااااا دا قاصد وعارف الضربه رايحة فين منهم لله

مش بني ادمين دول اللي بيضربوا فيهم ؟؟؟؟؟

ده صحيح يا رحاب .. فعلا اللى بيضرب .. بيضرب بغباء
والفيديوهات موجودة ومسجلة .. وخصوصا فيديو الملازم محمد الشناوى
( ضابط الامن المركزى اللى كان بيستهدف عيون المتظاهرين )
ولولا ان فيه الفاظ خارجة كنت نزلته هنا

وبالمناسبة فيه واحد اسمه احمد حرارة .. خسر عينه اليمين فى ثورة يناير
وخسر عينه الشمال فى احداث التحرير الاخيرة 19 - 11

اقتباس :

فهي طبعا من منطلق غريزة الامومة بتقول اديني ع قفايا بس سبني اعيش في امان

ربنا يطمنها على بنتها ويطمنا كلنا على نفسنا
بس الغريب فى الموضوع .. ان البلطجية للاسف بيخرجوا تحت رعاية الشرطة
وخصوصا فى اسكندرية .. والفيديو موجود
قوات الامن ماشية ووراها بلطجية شايلين صندوق المولوتوف بدل البيبسى

اقتباس :

انا فى الحقيقة بقالى اكتر من 5 ايام مزروعة قدام التلفزيون ..

يا طولة بالك يا نيرة .....!!
انا ما اتحملتوش اكتر من يومين .. وكان هايجيلى انفجار ف المخ

اقتباس :

السؤال بقى .. هــــــــــــــــــل .. الحكومة اللى هيشكلوها دى هترضى كل الناس اللى واقفة فى التحرير ؟؟

ولا اى حكومة هاترضيهم ... حكومة الجنزورى سقطت فى التحرير
من قبل ما تتشكل اصلا .. لان الفكرة مش فى الحكومة ولا المشكلة كانت فى عصام شرف ..
ولان اللى فى التحرير فهموا ده كويس ..
طالبوا من اول يوم ياسقاط المشير وعنان
ومن يوم جمعة المطلب الواحد .. كله بيطالب المجلس بتسليم السلطة زى ما وعد ..
وما حدش جاب سيرة الوزارة .. باستثناء الاخوان
اللى طالبوا باقالة السلمى ( نائب رئيس الوزراء )
برغم ان الجميع عارف ان السلمى مش هو الهدف ولا هو المسئول عن الوثيقة
انما الاعيب السياسة بقى .. لازم يبقى في كبش فداء

باختصار يا بيرة ..
اللى فى التحرير فهموا ان الازمة كلها فى المجلس العسكرى
وطول ماهو فى الحكم .. مفيش امل فى اى حاجة ..
ولذلك .. اى وزارة .. واى انتخابات ..واى دستور .. واى بطيخ ..
مالوش قيمة طول ما المجلس العسكرى بيحكم ......!!!
------------------------------
جدار الثقة اتهد خلاص .. وشوية الشك بقى شبه يقين
ان المجلس من اكبر اعداء الثورة والملتفين على اهدافها والراكبين على امواجها

اول مرة فض الاعتصام بالقوة .. بعد الثورة مباشرة
وقلنا معاه حق .. يعنى مش معقول نشبط فى ميدان التحرير ونسيب البلد توقف

تانى مرة .. ضرب المعتصمين فى التحرير .. وطلع اعتذر وقال رصيدنا يسمح
وسامحنا .. وقلنا حبيبنا ومجلسنا الاعلى وغلط وخير الخطائين التوابون

ضرب التيار الليبرالى و6 ابريل فى العباسية .. وعملهم كمين بمعنى الكلمة
وقال انا برئ .. دول اهالى العباسية ..
( وعرفنا بعد كده .. انهم مش اهالى العباسية .. دول صاعقة بلبس مدنى )
والجيش بالزى العسكرى واقف بيتفرج على حدود السلك الشائك
وعديناها .. وقلنا يا واد خليك مع الكداب لباب الدار

دهس المتظاهرين فى احداث ماسبيرو .. وقال دى تصرفات فردية
العساكر كانت خايفة وبتتصرف تحت تاثير الموقف

وكل ده كوم .. واللى حصل فى التحرير يوم 19 / 11 كوم تانى

ما كناش نعرف ان المشوار مع الكداب لحد باب الدار غرقان بالدم

اولا بس عشان نتفق .. بلاش نفصل اللى حصل فى التحرير عن باقى الاحداث

لانه مش موقف منفصل ولا فردى
لسبب بسيط .. لو كان موقف فردى او الناس حست انه عفوى ومش مقصود
كانت عدت زى اللى قبلها ... ( ماسبيرو والعباسية وفض اعتصام التحرير الاولانى )
لكن اللى حصل .. ان الكيل فاض بالناس .. وان الرصيد خلص ..
وبعدين ماحدش يقنعنى ان اللى حصل من الامن كان عفوى ومش متعمد
المراقب للموقف يوم السبت هايكتشف ببساطة وبدون جهد
ان الامن كان متعمد تهييج الناس .. وان الاحداث مدبرة ومجهزة جيدا
: -
هجوم قوات الامن - دون انذار - وضرب المعتصمين وحرق اغراضهم
( حرق الخيام والموتوسيكلات - الامن هو اللى بيحرق خلوا بالكم مش مثيرى الشغب - )
وبعدين انسحاااااااب لقوات الامن من الميدان
- رجوع الشباب - مندهش للى حصل -
- عودة قوات الامن والجيش وضرب النار واستخدام مفرط للقوة
( ينتج عنه موت 3 واصابة 750 )
- المتظاهرين يهربوا ويسيبوا الميدان
- قوات الامن تنسحب - ببساطة من الميدان ( وكأنها دعوة للمتظاهرين بالعودة )
( او تدريب قاسى شوية علشان ما يرجعوش وينسوا خالص حكاية التحرير والمليونيات )
- عودة المتظاهرين من جديد .. ( واشتباكات دامية لمدة 5 ايام او 6 )
- المدهش كمان فى الموضوع .. عرض كل الاحداث دى بالصوت والصورة فى التلفزيون الرسمى ..!!
( وكانها رسالة مقصودة .. او دعوة صريحة )
------
( اللى تابع اللقاء اللى عملوا اللواء حجازى والعصار مع منى الشازلى وابراهيم عيسى ..
ويفتكر كلامهم عن الداخلية اللى بقت جاهزة وكفاءتها اللى بقت عالية
وبعدين يشوف اللى حصل فى التحرير واسكندرية والاسماعيلية ..
يتاكد ان الداخلية بقت جاهزة فعلا .. داخلية حبيبى العادلى .....................!!!!!!! ؟؟؟ )

طيب .. يفضل سؤالين ..
ايه الغرض من اللى حصل .. ليه المجلس يدبر المؤامرة دى .. ؟؟
ويضحى بدماء ابناء الوطن وبسمعته ورصيده عند المصريين ...!!
هل هو تاجيل الانتخابات وفرض الاحكام العرفية ؟؟

هل هو استدراج للاخوان المسلمين ( زى ما قال الاخوان )
علشان تحصل مجزرة و شبه حرب اهليه ؟؟
وباالتالى يتدخل المجلس ويفض الاشتباك ..
وبرضه يفرض احكام عرفية ويلغى الانتخابات ؟؟

دى اسئلة .. نجاوبها ان شاء الله قريبا ...

كلامك كله جميل جداااا ومقنع خاااااالص

بس حضرتك كنت بتتكلم قبل الانتخابات وبتقول

اقتباس :

هل هو تاجيل الانتخابات وفرض الاحكام العرفية ؟؟

أدى الانتخابات - المرحلة الاولى منها - عدت على خير الى حد ما

باستثناء بعض التجاوزات طبعا .. وكله رجع السبب لاننا لسه فى سنة اولى ديموقراطية ولسه مش متعودين عليها

يعنى لا شفنا بلطجية ولا شرطة رخمة ولا مندسين بيصوتوا للمرشحين اللى هما عاوزينهم ولا تزوير طبعا مش كلام قاطع 100%

كان موجود حاجات من دى نقول بنسبة 20% وعرفناها

طب الغريب بقى وتحس انه فعلا مدبر

هجوم الباعة الجائلين وبعض البلطجية على معتصمى التحرير .. بعد ساعة من اغلاق صناديق الانتخابات

يعنى نقول عند بدء فرز الاصوات !!!

طب اخوانا البلطيجة والجائلين دول كانوا ساكتين من اول اليوم ليييييييه ؟؟

مين ليه المصلحة فى كدة؟؟

فلول الوطنى .. ولا الناس دى بلطجية رجال الاعمال ؟؟؟؟

طب لو الشرطة دخلت تحمى المعتصمين منهم .. هيقولوا بيفضوا الاعتصام بالقوة !!

ولو مأتدخلوش .. هيقولوا اهمال من المجلس العسكرى !!

**

انا قلت اللى عندى وشيفاه .. ومستنية حضرتك بفارغ الصبر عشان تجاوب على بقية الاسئلة اللى حضرتك طرحتها

وياااااريت تقولنا الانتخابات فى الفيوم كانت ازااااى ؟ وماشية ازااااى ؟؟

عاوزين شاهد من اهلها .. عشان نعرف بتوع التلفزيون اللى قرفونا دول كلامهم صح ولا كلهم زى (( توفيق عكاشة ))

على فكرة انا لما بحس بالاكتئاب وانى خلاص هقرب من مرحلة انفجار ف المخ .. بفتح على توفيق بيه .. اهو الراجل دة اللى يتقال عليه

(( الضحك من اول نظرة ))


فى انتظارك استااااااانا

شوفى يا استاذة ..
قبل ما اجاوبك بشكل مباشر .. نحط فرضية ونحلل الاحداث كلها على اساسها
واذا فشلت الفرضية فى تفسير اى موقف تبقى فرضية خاطئة ولازم نستبعدها
واذا نجحت فى تفسير جميع المواقف .. تبقى فرضية مقبولة مبدئيا

الامر الواقع : المجلس العسكرى على راس السلطة وامامه شعب ثائر..

الفرضية : المجلس العسكرى يريد ترتيب الامور من منطلق رؤيته الشخصية ..
وليس منطلق تحقيق مطالب الشعب او من منظور الوكيل او المنفذ لارادة الشعب
( وهذا يعطى ايحاءاً مهيناً .. من قصور الشعب وعدم نضوجه وقدرته على تقرير مصيره ..
وهنا يبدو الفارق واضحا بين الوصاية على الثورة .. والوصاية على الشعب )

اذن .. ماهى رؤية المجلس للواقع المصرى ( بما فيه القوات المسلحة ) ..؟؟
فصيل اسلامى ( ما بين المتشدد :سلفيين .. وبين المنهجي السياسي والتنظيمي : الاخوان )
وفصيل ليبرالى .. ( وفديين وناصريين ويساريين ) بس على راسه واحد زى البرادعى وايمن نور وحركة 6 ابريل والجمعية الوطنية للتغيير ..
وهؤلاء اصحاب الحناجر الرنانة والصوت العالى والخطاب المزعج
وفصيل قبطى .. يمثل قنبلة موقوتة ويجب التعامل معها بحرص ..

اذن ... لا يوجد اى تيار يمكن تسليم السلطة له باطمئنان ..
وعليه ... يجب ان يظل المجلس العسكرى متوليا قيادة البلاد ..
فى ثلاثة اشكال او محاور :-
اولا : ان يتولى احد افراد المجلس رئاسة مصر .. ( طنطاوى- سامى عنان )
ثانيا : ان يتولى الرئاسة احد المنتمين للمؤسسة العسكرية
( مجدى حتاتة – عمر سليمان – احمد شفيق )

ثالثا : فى حالة فشل اولا وثانيا .. او حتى نجحت احداهما
تظل القوات المسلحة ( اى القادة ) فى وضع المراقب والحامى لتوجهات الدولة ( العسكرية والسياسية )
فى صورة الحامى للشرعية الدستورية .. وماهى هذه الشرعية التى يقصدونها ؟
هى بنود معينة فى الدستور .. تضمن للمجلس سلطات تشريعية وتنفيذية وسيادية .
( كما فى الاعلان الدستورى تماما )

عمل المجلس العسكرى طوال الفترة الانتقالية لمحاولة تنفيذ هذه الرؤية باستماته
( مع الاخذ فى الاعتبار ان الشعب ثائر )

وللصعوبة الشديدة ( بعد الثورة ) ان يعين المجلس احد افراده رئيسا للدولة
يحاول دفع الناس لتأييد الفكرة ..
( حملة عمر سليمان رئيسا .. من ايام مبارك لمقاومة فكرة تولى شخصية مدنية
رئاسة مصر – جمال مبارك - )
وحملة المشير رئيسا .. ( موقعة البدلة – وحركة مصر فوق الجميع )
مجرد جس النبض
( ويبدو انهم قرروا تاجيل الفكرة .. او تعليقها مؤقتا فقط )

وبناءا على ثانيا .. سيتم الدفع بعمرو موسى او شفيق
وهى الاسماء الاقرب لتنفيذ المطلوب
( نفس نظام مبارك بالضبط دون اى تغيير او قلق على مصير المؤسسة العسكرية
بكل ما لها وما عليها )
واذا تعذر ولم يضمنوا تولى احدهما
يكون البديل شخصية مقبولة جماهيريا ومعتدلة ومتوافقة مع رؤيتهم
( سليم العوا )

مع ملاحظة امر هام جدا
محاولة مستميتة من قبل المجلس .. فرض مبادئ حاكمة للدستور
تضمن تحقيق رؤيتهم ( استمرار مراقبة توجه الدولة والسيطرة على القرارات المصيرية )
( وثيقة المبادئ الحاكمة .. سقطت بمليونية 29 – 7 )
( وثيقة المبادئ مرة اخرى ..ثم التراجع عنها والاعلان انها استرشادية فقط – بعد هياج القوى الاسلامية )
( وثيقة السلمى .. التى كشفت هذه النوايا بمنتهى الوضوح )

ويبدو هذا الطرح منطقيا .. لانهم لو تمكنوا من وضع هذه المبادئ
فلا باس ممن سيتولى الرئاسة او الاغلبية فى البرلمان
فليفعلوا ما يحلوا لهم .. ( تقدم الدولة .. تاخرها .. اسلامية .. علمانية .. بتنجانية
لا فرق ولا قلق .. مادامت القوات المسلحة بامان وتوجهات الدولة على حسب رغبتهم هم )

ويبدو ارتباك المجلس العسكرى واضحا عندما فشلت كل محاولاتهم لتطبيق هذه الرؤية
فلا هم استطاعوا تكوين تربة خصبة فى مصر .. للمحور الاول
( تعيين او انتخاب رئيس لمصر من القادة العسكريين )
( ولا هم تمكنوا من فرض المبادئ العسكرية الفوق دستورية والحاكمة له )
ولا هم استطاعوا كسر شوكة المناهضين
( تيار اسلامى – ليبرالى – قبطى )
وهؤلاء جميعا تحولوا لمناهضين .. كرد فعل لسياسات المجلس المضادة لهم
وبالتالى اصبح التطويل والمماطلة والارتباك هو سمة الفترة الانتقالية
وسيستمرون فى التطويل .. حتى يتهيأ المناخ لما يريدون

وبناءا على هذا .. لم يلتزموا بالفترة المقررة فى الاعلان الدستورى
ستة اشهر .. وادعوا ان المتسبب هو الشعب المشاكس المعترض دائما
وهذا خلط وتزوير للحقيقة
وانما كان الاعتراض والمشاكسة رد فعل للقرارت الغريبة والمناقضة لفكرة الثورة وارادة الشعب
ولاحظوا سلق القوانين الانتخابية .. لتحقق الهدف المنشود :
عدم سيطرة اى قطاع او فصيل على البرلمان
( وموقفهم هذا ليس وجهة نظر او رؤية مقبولة ..
بل فرض لرغبة المجلس دون الاعتبار لراى الناس او رغبتهم )

اذن .. المجلس لا يريد الانتخابات .. لا رئاسية ولا برلمانية
ما دامت الاوضاع غير مهيأة لما يريدون
وبالتالى .. السؤال الاساسى : لماذا اقاموا الانتخابات بهذه السرعة والالحاح ؟

ساجاوب على شقين :
اولا : الضغط الشعبى والدولى .. مليونية فى التحرير تكاد تشبه ثورة يناير
والوضع متأزم جدا .. ولا سبيل للفكاك هذه المرة غير اجراء انتخابات ( صورية او شكلية )
يفرح بها الناس وينسون التحرير ومن فيه وما حدث فيه
وفى نفس الوقت .. عدة خطط دفاعية ضد هذا البرلمان القادم :
( ما ظهر واضحا فى تصريحات اللواء ممدوح شاهين : البرلمان لا يملك سحب الثقة من الحكومة )
ثم ان البرلمان بلا دستور ( اى انه بلا صلاحيات اطلاقا – طبقا للاعلان الدستورى )
وبالتالى لا قلق منه بشكل مباشر ..اللهم الا اجتماع الناس حوله باعتباره منتخب

ثانيا : هنالك اسباب كثيرة لحله وقت الحاجة :
قانون العزل السياسى .. وايضا بعد وضع الدستور يجب حل البرلمان اتوماتيكيا
وهناك فرص كثيرة للطعن فى الانتخابات ..
( بدأها توفيق عكاشة اليوم بالاتهام الصريح لحكومة شرف ( المقالة )
بالاتفاق مع الاخوان والسلفيين لتزوير الانتخابات .. وحصل - بطريقة عجيبة - على اوراق لجنة المطرية بالكامل )

ثالثا : توقف الدعم الخارجى عن مصر تماما
وعندما طلبت القيادة ( سواء الحكومة او المجلس العسكرى) المعونات الخارجية
كان رد الدول المانحة :
( ليست لديكم اى حكومة منتخبة ولا حتى برلمان منتخب )
فكيف نضمن ان تصل المعونات للشعب ؟.

وقرأت فى الاخبار ان المجلس العسكرى طلب من امريكا خفض جزء من الديون المصرية
فرفضت ...............!!!

وبناءا على هذا :
الانتخابات ضرورة حتمية .. ( ثورة التحرير .. و الضغط الدولى والمعونات )
واؤكد ان المجلس لو اعلن تاجيل الانتخابات .. سيؤدى هذا لتضخم الاعداد فى التحرير
بانضمام الاخوان والسلفيين للميدان .. وسيفقد كل مصداقية له عند الاغلبية الصامتة

ودفعا لتهمة عدم المصداقية .. اضطر المجلس على مضض اجراء انتخابات برلمانية
وخاصة ان مصر ( بقيادة المجلس ) لم تأخذ خطوة واحدة لها قيمة منذ قيام الثورة
ومع يقينى ان المجلس العسكرى لا يريد اى انتخابات .. وانه يفعل ما يفعل تحت الضغط
والاضطرار فقط .. يكمن سر بغضى الشديد له وتاييدى لثوار التحرير
اكبر عقبة فى طريق المجلس .. الذى يعتمد بشكل اساسى على الاغلبية الصامتة دائما
والتى لا تكلف نفسها حتى عناء البحث عن الحقيقة
و مجرد التفكير فى مواجهة السلطة والحكام بشجاعة .. تبدو لهم جنونا وهدما للبلاد .

انتظر بشدة خطوة المجلس القادمة .. واترقب الافتكاسة الجديدة
التى ستوضح المزيد من نواياه .. وطريقته فى التلاعب بمصير الوطن.. ومقدرات الامة

على الهامش :
وصلت الى ميناء السويس .. شحنة من قنابل الغازات المسيلة للدموع ..
وزنها 14 طن فى حاويتين .. ورفض موظفو الميناء استلامها ..
الا ان المجلس والداخلية امروا بدخولها .. ومحاسبة الموظفين
ليصل اجمالى ما وصل من قنابل الغاز هذا الشهر لـــ 21 طن

اعتقد اننى اجبت عن مسالة الانتخابات ..
وضمنيا عن الاجراء الهمجى والدموى الذى اتخذه المجلس فى ميادين التحرير ..

ويتبقى السؤال هو لماذا ؟؟ او بمعنى اصح
ماهو غرض المجلس بشكل مباشر ومفهوم من هذه المواجهة الدامية فى هذا التوقيت ..؟؟
هل هو جر التيار الدينى للصدام مع الثوار ؟
( صرح ابو بركة القيادى بالاخوان :
عن رفضه لاعتصام التحرير واستعداد الاخوان للمشاركة فى فضه ...!!!
ثم عاد وكذب التصريح وانكره ...
مع العلم ان بلال فضل اقسم انه سمع هذا التصريح بنفسه من ابو بركة ) ..
و موقف الاخوان معروف .. البرلمان ثم البرلمان ثم البرلمان
ولما فهموا اللعبة وادركوا انهم متجهون لوقيعة بينهم وبين الثوار ..
قرروا عدم المشاركة وعدم التدخل اطلاقا فى مواجهات التحرير .. وهذا الكلام بافتراض حسن النية
اما لو افترضنا سوء النية .. سنقول مباشرة :
رفض الاخوان المشاركة فى التحرير لحماية دماء المصريين ..
خوفا ان يتحجج المجلس بما فى الميدان ويعلن تاجيل الانتخابات

هل قرر المجلس التخلص من التحرير وثواره ؟؟
وقد فرغ صبر المجلس الذى حاول كثيرا الالتفاف على الثورة والشعب ......... وفشل مرارا بسبب التحرير

وجرب اكثر من مرة ضرب التيارات والاحزاب ببعضها .... وفشل وفشلت معه الاحزاب
وجرب التحالف مع بعضها
( الاخوان مرة .. والتيار اليسارى والليبرالى مرة .. وفشل فى الحالتين ) ..

حالنا فى مصر يشبه الى حد ما التجربة التركية ..
( الصراع بين ارادتين : الارادة العسكرية والارادة الشعبية )

الاعلام والمحللون يقولون :
المصريون يريدون اختصار عشر سنوات
من الصراع بين الارادتين ( العسكرية والشعبية ) فى عشر شهور فقط

وهل تؤدى الامور الى النموزج الجزائرى ... لا قدر الله
مع الفارق بين البلدين فى الحالتين

واختم حديثى الطويل .. بما قاله طاهر ابو زيد فى مقاله :
الكل باطل ... لم ينجح احد ..

وما قاله الاعلامى يسرى فودة :

طيب الله اوقاتكم .. ولا طيب اوقات اسوأ من فى مصر
هؤلاء الذين يأتون على افضل من فيها
اىُ قيمة لاعتذار لا يتبعه ندم .. واىُ قيمة لندم لا يتبعه عقاب
واىُ قيمة لعقاب لا يزال يسمح - حتى هذه اللحظات -
بانتهاك الحقيقة ومعها عصب الوطن

أىُ قيمة .. لأى قيمة اذا كان يُـراد لنا - حتى فى هذه اللحظات -
ان نصدق ان اعيننا .. لا ترى ما تراه اعيننا ..
وانها حين ترى ... لا ترى
وانها ان رأت حقا .. فليس الا .. لاننا :
اما واهمون او لاننا محرضون ..!!!!

يعنى كلامك دة يا باشمهندس معناه انه مفيش أمل

واننا حتى لو بقينا ملائكة مش هنعرف نغير الوضع دة

ومش هنعرف نتخلص من حكم العسكر واللى بيفكر فيه المجلس العسكرى

الغريب بقى فى كلامك ان فيه ناس كتير عارفة كدة وفاهمة الخطة دى

ومع ذلك محدش بيتكلم او بيحاول يغير

اللى عارفين كدة قله .. زى اللى فى التحرير مثلا .. ودول الاعلام والعسكر اقنعونا انهم بطجية وفلول

يعنى المفروض نقووول ... لكِ الله يا مصــــر

اقتباس :

يعنى كلامك دة يا باشمهندس معناه انه مفيش أمل

كلمة ( مفيش امل ..) مش موجودة فى قاموسى

اقتباس :

واننا حتى لو بقينا ملائكة مش هنعرف نغير الوضع دة

الملائكة ليس لها اختيار .. ولا تستطيع تغيير اى شيء
ولاننا بشر .. نملك الارادة الحرة .. والقدرة على التغيير

اقتباس :

ومش هنعرف نتخلص من حكم العسكر واللى بيفكر فيه المجلس العسكرى

هانعرف طبعا ... واذا كان على المعاناة
لازم تعرفى انهم بيعانوا هما كمان
بس هيا الفكرة ..
اذا الشعب يوما اراد الحرية .. فلابد ان يستجيب العسكر

اما اذا استمر الشعب يفضل مسلسل السابعة والربع
على مشاهدة المؤتمر الصحفى لرئيس الوزراء .. او لقاء قيادات المجلس العسكرى
فتاكدى ان ارادة العسكرى ستنتصر ..
---------

اقتباس :

الغريب بقى فى كلامك ان فيه ناس كتير عارفة كدة وفاهمة الخطة دى

ومع ذلك محدش بيتكلم او بيحاول يغير

لان التغيير صعب .. والاستسلام اسهل
لان الشغل صعب .. والنوم مش متعب
النجاح محتاج مجهود .. والفشل محتاج راحة وكسل
ولان طريق الجنة صعب .. وطريق النار سهل
تلاقى : ( وما اكثر الناس ولو حرصت بمؤمنين )

ولان مطالب التحرير مرهقة ومتعبة ..
والعباسية مريحة وبترمى الحمل على الغير

لان بعض الناس فى العباسية .. بتفضل المثل المشهور :
احيينى النهاردة .. وموتنى بكرة

واللى فى التحرير .. بيفضلوا يموتوا النهاردة .. عشان غيرهم يعيش بكرة
وعشان ولادهم يعيشوا الحياة اللى يستحقوها

علشان اللى فى العباسية عايزين الامان النهاردة
واللى فى التحرير عايزين الامان على طول

علشان اللى فى العباسية واقفين مع القتلة
واللى فى التحرير واقفين مع الضحية

النهاردة اللى فى العباسية عاملين مليونية تاييد الحكام
واللى فى التحرير عاملين جنازة رمزية لشهداء التحرير

والصراع بين الابيض والاسود .. بين الخير والشر
هايفضل للابد

اقتباس :

يعنى المفروض نقووول ... لكِ الله يا مصــــر

بالظبط .. لك الله يا مصر
ونقول كمان .. مصر امانة فى ايدينا
ما صدقنا رجعت لنا بعد الثورة .. ما ينفعش نضيعها بادينا تانى
ونسلمها اسيرة لاحلام العسكر من تانى

يااااااااااارب كلنا يبقى عندنا نص الامل والاحساس بالمسئولية وخوف تجاة بلدنا كدة

زى اللى عند حضرتك يا باشمهندس

ربنا يصلح الحــــــال يارب