أزيكم يا أحلى بنوتات يارب تكونوا كلكم بخير
أنا قريت عن موضوع ازاااى تكسبى حماتك وعجبنى اوى وحبيت أنقله ليكم
فى ناس كتير أوى مبتعرفش ازاى تتعامل مع حماتها تلاقى البت من دول بتتعامل مع حماتها كأنها بع بع
وبرضه فى حماوات بتتعامل بنفس الطريقه والراجل ياعينى هو اللى بيتعذب فى النص
محتار بين مراته وبين أمه ومش عارف يريح مين فيهم
البنوته الشاطرة العاقله تعمل ايه بقى ؟؟؟؟؟؟؟؟
اولا : بلاش تحكمى على حماتك كويسه ولا لا غير لما تتعاملى معاها الاول عشان تعرفيها كويس وحاولى تتعاملى معاها كويس واعتبريها زى مامتك يعنى لو مامتك حتى زعلتك أكيد مش هتقوليلها كلمه تزعلها فلو حماتك زعلتك معلش أستحمليها
ثانيا : متقعديش تشتكى لجوزك من مامته كتير يعنى مش تستلميه وهو داخل من الباب وتقوليله امك عملت وأمك سوت ساعتها هيكره حياته خليكى عاقله وبلاش نقل الكلام عن اى حاجه حصلت بينك وبين مامته عشان متعمليش مشاكل
ثالثا :لو حسيتى ان جوزك مأثر شويه فى حق مامته بلاش تشعليليها حاولى تتكلمى معاه وتخليه دايما يسأل عليها ويحسن معاملته معاها وتشجعيه على طاعتها مش تقولى أحسن اهى جت منه احنا كده هنبقى مرتاحين
رابعا : لو فى يوم لقيتى جوزك جايب لمامته هديه
بلاش بقى النفسنه والحقد يشتغلوا وتقولى اشمعنى هى لا انتى تشجعيه على كده ومش هو لوحده ياريت لو انتى كمان تجيبلها هديه من وقت للتانى حتى لو مفيش مناسبه
خامسا: لازم تحسسى حماتك انك فعلا معتبراها زى مامتك يعنى لو قاعده عندها وشايفاها بتعمل حاجه ساعديها بلاش تعملى فيها ضيفه وتبقى قاعده مستنيلها غلطه وعماله تبصيلها بصات مريبه
سادسا : لازم تعلمى اولادك أزاى يتعاملوا مع جدتهم بكل أدب وأحترام ولازم انتى كمان تعامليها كويس قدامهم ساعتها هتلاقيها بتتمنى اليوم اللى تزوروها فيه
سابعا : لو فى يوم طلبتى من جوزك طلب ومامته كمان كانت طالبه منه طلب هتعملى أيه ؟؟؟؟؟
ياترى هتقلبى البيت على دماغ جوزك وتنكدى عليه
ولا هتتنازلى وتقدمى طلب حماتك على طلبك!!!
المفروض انك تتنازلى وتقدمى طلبها على طلبك بس تتنازلى بنفس راضيه مش تحسسيها انك مخصوبه
ثامنا : بلاش تحطى نفسك فى مقارنه مع حماتك خصوصا مع جوزك لان دى امه ولو ملهوش خير فيها عمره ما هيبقى ليه خير فيكى ولازم تحسسيها دايما ان مكانتها كبيرة وان هى الخير والبركه وانها ليها اهميه كبيرة فى حياتكم
وخليكى دايما فاكرة انك النهارده زوجه بكره هتكونى حما والدنيا كما تدين تدان واللى هتعمليه مع حماتك النهارده هيتردلك بكرة
يارب الموضوع يعجبكم وتستفيدوا منه
وربنا يسعد الجميع ويجعلنا زوجات صالحات اللهم أمين