بسم الله الرحمن الرحيم
***
**
*
النهاردة جايبلكم طبق جديد من عمايل ايديا وحياة عنيا ..
امبارح بالليل قلت اعمل حاجة حلوة .. فكان مرة على قناة فتافيت الست الشيفة كانت بتعمل لاذانية حلوة
حاجة كدة زى بلح الشام .. ومكوناتها سهله جدااا
مقاديرها
1 كوب دقيق
1 بيضة
بشر برتقال
ذرة ملح ( بس ماما فاجئتنى بعد ما خلصنا اننا نسينا نحط الذرة دى
)
الطريقة بقى
هنجيب البيضة ونضربها كويس ونحط عليها الدقيق وبشر البرتقال ونقلبهم لحد ما يبقوا عجيبنة متماسكة
طبعا كلكم عارفين ازاى العجينة بتكون متماسكة !!
ومش عاوزة حد ينسحب من لسانه ويقولى ازااااى
المهم .. المقادير دى هطلع عجينة صغيرة شوية .. نقوم بقى مبطبطينها نخليها مبططة يعنى
نفردها يعنى زى ما بنعمل العيش العادى .. لحد ما تبقى رقيقة فى سمكها
وهتعملنا دايرة كبيرة كدة .. نقوم ماسكينها بقى بالسكينة مقطعينها مربعات ..
لييييييه بقى مربعات .. عشان احنا هنقفل اطراف المربعات دى عشان تعمل شكل زى السمبوكسة .. والحركة دى ممكن نعملها بالايد عادى او بالشوكة
بعدين نقليها فى الزيت .. اللى يحب يجرب يعملها على نار هادية جدااااا لانها بتتحرق بسرعة .. اولا لانها رقيقة جدااااا
ثانيا لانها فيها بيض
بعد ما نقيلها المفروض انها تتحط فى شربات عشان تبقى طريقة
طريقة الشربات بقى :
ماية + سكر + ليمون
بس للاسف الشربات اللى انا عملته باااااظ .. لانى حطيت ليمونة كاملة .. بس امى وللمرة الثانية تفاجئن وتقولى انها بتحتاج نقطتين تلاتة ليمون عشان متبقاش حمضية اووى
المهم عشان ادارى على خيبتى
.. قلتلها بلاش شربات هتكون طرية وطعمها وحش انا هرش عليها سكر بودرة .. ودة اللى عملته فعلا .. وكمان ممكن نرش عليها مع السكر قرفة ودة هيديها طعم لذيذ
المهم بقى دة شكل المنتج النهائى
بس طبعااااا الصور غير الحقيقة تمااااااماااااا
البنى اللى عليها دى القرفة .. أحسن حد يفكرها مش نضيفة ولا حاجة
طلعت فى الاَخر مقرمشة وطعمها لذيذ اوووى
هــــــا إيه رأيكمـ ؟؟
الأحد مارس 25, 2012 3:40 pm
