ماذا تحب أن يكون عليه شريك حياتك؟؟؟

ههههههههههههه
خلاص علي بركة الله

كلمة جديدة ...
انا شفت كلامكم بعين العقل وكنت فرحان قوي ... ومستغرب ان محدش قال :
يكون عسول وروش ... وشيك وابن ناس ...وحبوب
وشفت الشروط التعجيزية اللي كتبتوها
وايوت انقذتكم من ايدي .. لما قالت :
لكن عايزة اوضح ان انا مش لما يتقدملي حد هحط القائمة دي قدامي اقعد اعلم دة فيه وما فيهوش
طبعا لا
لان في بعض الاشياء التي يمكن التغاضي عنها طالما يوجد ما يعادلها



تعالوا نرجع ورا شوية ونبدأ من الاول ..
الموضوع هو: الزواج
اكتب ببساطة فكرتك عن الزواج ...؟
ايه هيه ايجابيات الزواج ..؟
وايه هيه سلبيات الزواج ..؟
يعني ايه اجمل حاجات شوفتها في المتجوزين او بتتمناها (والعكس)
الشروط الواجب توافرها .. في ( الزوج .. الزوجة )
الشروط الفرعية وليست اساسية ( في الاتنين )
اكتب حلمك
واخر حاجة بقي .. ماحدش قاللي اعمل ايه علشان مراتي تبقي مبسوطة مني ..؟
يعني ماحدش فهمني ايه الواجب اللي عليا .. ولا ايه هيه حقوقي ...؟
مع ان البنات اغلبية هنا في المنتدي ...!

ومش ضروري يبقي الكلام كتير .. ومش لازم يبقي الكلام قليل ..!
يعني كل واحد براحته
ومش قانون اني اتكلم بمثالية .. علشان ده مش موضوع انشا (مش حصة تعبير)
انما كل واحد يتكلم براحته خاااااالص ... حتي لو هايكتب حاجة تخصه هوه . مش هانعترض علي احلام الناس ... يعني انا لو قلت انا باتمني اجمل بنت في الدنيا... انا حر
بس مفيش مانع حد يقولي .. طيب ايه رأيك ان الجمال المعنوي احسن بكتير من الحسي
وانا استغرب واقوله ازاي ....؟
فهوه يفهمني وجهة نظره ... وانا هاحترمها واقدرها حتي لو ما اقتنعتش
عايزين تواصل يا جماعة .. علشان في حاجات مهمه هانشوفها مع بعض

هايل حسام

فعلاً الموضوع لا يجب ان يتحول لموضوع

تعبير

واحب ان اضيف ايضا

هناك شخصيه قد تتلائم معك

وبها مميزات وخصال جيده

دينيه واجتماعيه

وهناك شخصيه قد لا تتوافق معك

وبها ايضا خصال جميله

وجيده

وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ (21) (الروم)
*********

ايصال الاحساس الذى ترغبيه روز

يحتاج الى العديد من

المشاعر الجميله المتبادله

كما يحتاج الى الموده والرحمه والتعاون

والثقه وحينها سيتغاضى كل من الطرفين

عن سلبيات الآخر

بل وقد يحولها لايجابيه

وسيكون التعديل منها أمر يسير ومستحب من الطرفين

وسيسعى كل منهم لتلمس الاعزار للآخر

والمساعده والوقوف بجانبه

(كان الرسول صلى الله عليه وسلم يدخل منزله فيجد زوجته

تقوم بأعمال المنزل وهى منهكه فيشمر عن ساعديه ليساعدها)

كما اوصانا وقال صلى الله عليه وسلم (رفقاً بالقوارير)

منتهى احساسى بالقوه وانا اساعد زوجتى وأتفاهم معها

على الرغم اننى لا افقه اى شىء من الامور المنزليه

لكن مثلاً ان صادف يوماً وذهبت للمنزل وهى تعمل شيئاً ما

يكفيها ان اقف معها مثلاً بالمطبخ

لا افعل شىء الا التحدث معها عما فعلته فى يومها

وتحى لى طرائف البنات وما فعلوه معها اليوم

(يجب على الطرفين ان يشعركل منهما الآخر بحاجته اليه ومساعدته له)

فكل منهم يستمد جزء من قوته من الآخر

هجاوب اهه
ربنا يستر واجابتي تبقي نموذجيه
انا هسأل قلبي وعقلي واتكلم ومش هفكر في حاجة تانية
يعني من الآخر هقول الصراحة

اقتباس :

اكتب ببساطة فكرتك عن الزواج ...؟

فكرتي عن الزواج انه مرحلة جديدة في حياة البنت أو الولد
علي قد ما بتكون مرحلة حلوة في الحياة علي قد ما بتكون احيانا متعبة يمكن علشان المسؤلية
اللي بيتحط فيها الطرفين احيانا بيبقي الزواج غاية بالذات عند البنات بمعني ان البنت تبقي عايزة تتجوز علشان دة حاجة لازم تحصل يعني لان الزواج هيخلصها من مشاكل اجتماعية كتيرة اقلها ان يطلق عليها لقب عانس ( أنا ضد كدة علي فكرة ) أحيانا بقي بيبقي الزواج خطوة لتحقيق هدف ( وهو دة بقي تفكير ي ) بمعني اني عايزة اتجوز علشان حاجات كتير تانية مش علشان الجواز في حد ذاته كشكل اجتماعي والحاجات دي بقي هتكلم عنها في السؤال التاني

اقتباس :

ايه هيه ايجابيات الزواج ..؟

ايجابيات الزواج
أولا الزواج يحمل كل مترادفات العفة يعني حفظ وستر وحاجات كتير قوي
كمان الأولاد من اهم الايجابيات في الزواج الأمومة اكيد احساس فطري غريزي بيبقي مع البنت من يوم كانت بتلعب بعروستها مش بس لما تتجوز وتخلف فالفرحة بالانجاب بتبقي حاجة جامدة علي ما اعتقد كمان الزواج بيخلق نوع من الاستقرار انا هتكلم عن البنت مش الولد او هتكلم عن نفسي بمعني اصح في مرحلة ما من العمر لما بتبقي البنت استقرت دراسيا او عمليا بتبتدي تفكر في الارتباط ولو بينها وبين نفسها حتي لو البنت كانت ملتزمة جدا ما فيش مانع انها يبقي عندها حب للاستقرار وتكوين اسرة وانها تبقي عايزة تحس ان في حد بيحبها وبيهتم بيها خاصة لو كان الحد دة من الجنس الاخر لان دة غريزة وطبعا دة مش هيتوفر غير في اطار شرعي وهو الزواج وبالتالي الزواج هنا استقرار بمعني ان البنت خلاص بتبقي ارتاحت من التفكير في الموضوع دة
اكيد في ايجابيات اكتر من كدة بس يمكن مش هعرفها غير لما اتجوز ان شاء الله

اقتباس :

وايه هيه سلبيات الزواج ..؟

بصراحة مش عارفة بالظبط
دة بيختلف من زيجة لاخري
لكن بشكل عام يمكن ان البنت بتتخلي الي حد كبير عن طفولتها يعني انا مثلا وفي سني دة رغم اني مش صغيرة لكن بعتبر نفسي بعيش الطفولة ولو للحظات مع صديقاتي لما نبقي مخلصين اخر يوم امتحانات مثلا ونشتري ايس كريم وناكل في الشارع ونبقي مبسوطين قووووي ونقعد نتكلم كتير ونحس اننا رجعنا اطفال ونقعد نفتكر ايام زمان وكل دة صعب نعمله في الايام العادية
اعتقد ان البنت المتزوجة ما تقدرش تعمل كدة في اي يوم من الايام ( علي فكرة ممكن يكون دة ميزة مش عيب )
مش لاقية سلبيات تانية غير البعد عن الاسرة
بس مش عارفة ليه لما بشوف اتنين متجوزين بحس انهم شايلين هموم كدة
مش زي ايام الخطوبة يعني
هكمل اجابة بقية الاسئلة بعد قلييييييييييييل

وصايا للازواج
********


أثن على زوجتك عندما تقوم بعمل يستحق الثناء، فالرسول صلى الله عليه وسلم قال: «مَنْ لَمْ يَشْكُرْ النَّاسَ لَمْ يَشْكُرْ اللَّهَ» .
توقف عن توجيه التجريح والتوبيخ، ولا تقارنها بمن تعرف من قريباتك اللاتي تعجب بهن، وتريد أن تتخذهن مثلاً عليا تجري في أذيالهن، وتلهث في أعقابهن.
أنصت إلى زوجتك باهتمام، فإن ذلك يخلّصها مما قد يأتي عليها من هموم.. ولكن هناك من النساء من لا تستطيع التوقف عن الكلام، أو تصب كلامها على ذكر أهلك وأقربائك، فعليك حينئذ أن تعالج الأمر بحكمة وموعظة حسنة.

اقتباس :

اكتب حلمك

مش عارفة الحقيقة اكتب حاجات معينة

لكن كل اللي اقدر اقوله ان في نماذج قدامي انا شايفاهم وعرفاهم واتمني لو زوج المستقبل يكون زيهم دة ان ما كانش هما يعني



رغم ان النماذج دي مختلفة تماما في الشخصية والصفات والمستوي الاجتماعي والشكل وكل شيء

لكن كتركيبة علي بعضهم كدة أنا اتمني ان زوجي يكون بمواصفات احدهم

لو تحبوا اوصفلكم كل شخصية انا ما عنديش مانع

اقتباس :

اعمل ايه علشان مراتي تبقي مبسوطة مني ..؟

انا هتكلم بالنسبة ليا

اللي يرضيني في المستقبل ان شاء الله عن زوجي

انه يظهر اهتمامه بيا دايما ويحترم رغباتي ويكون متفاهم معايا وعنده دماغ يسمعني

جميل قوي بقي لو يشاركني كل تفاصيل حياتي أنا و الاولادي يعني دايما يكون حاضر معانا الغدا و الفطار والعشا يا سلام بقي لو يجمعنا كلنا أنا والاولاد مثلا ويقعد يتكلم معانا ونفتح موضوع نتناقش فيه بحب الرجل اللي يجتمع مع زوجته واولاده علي الطاعة يعني مثلا يصحيني ويصحي الولاد لصلاة الفجر جماعة

في المناسبات ياخدني انا والولاد معاه مش يمشي ويقول حصليني

بحب الاب كمان يبيقي مصاحب ولاده بطريقة لطيفة يعني مثلا يصحي الصبح

يروح يطمن عليهم و هما نايمين بحب التفاصيل الصغيرة اللي قد تبدو هايفة للبعض لكن اثرها في النفس بيبقي هايل جدا

يعني مثلا لو الاب مزعل حد من الولاد ممكن يجيب ورقة ويقصها علي شكل قلب ويكتب فيها كلمة يصالح بيها ابنه او بنته ويسيبها علي السرير جنبه قد ايه الطريقة دي بتبقي لها اثر معنوي رائع في نفسية الابناء

انا بابا كل ما يزعلني الاقيه يروح علي طول يشتريلي تفاح وييجي يحطهولي علي السرير ( علشان عارف اني بحب التفاح )

نفس الطريقة ممكن يعملها الزوج مع زوجته يعني الحاجات البسيطة الغير مكلفة دي بيبقي لها اثر في النفس عظيم

اهم حاجة ان الزوج يكون قادر يفصل بين الكرامة وبين علاقته بزوجته يعني يقدر قيمة الاعتذار لو اخطأ لان البعض بيفتكر انه علشان راجل يبقي ما يعتذرش ودة خطأ جسيم

كفاية كدة لحسن ايدي وجعتني

............................................................



حقوق الزوج بقي يمكن زي حقوق الزوجة الي حد كبير بس اهم حاجة ان الزوجة لازم تحاول تبعد عن اللي يضايق زوجها بلاش الكلام الكتير الرجالة مش بيحبوا الكلام الكتير

لازم تعرف من اول يوم اتجوزوا فيه انهم بقوا حاجة واحدة يعني لو واخداه مليونير وبقي شحات طالما ما قصرش في شغل او كدة يبقي لازم تبقي معاه ع الحلوة والمرة ولازم تعلم ولادها التضحية والصبر لازم كمان تحاول توصل معاه دايما في مشاكلهم لحلول ترضي الطرفين لازم هيا كمان تشجعه علي الطاعة أنا بتبقي من احلي ايام حياتي لما بابا يجمعنا كلنا انا وماما واخواتي ونصلي جماعة ببقي مبسوطة قووووووووووووي

وحاجات تانية كتير يمكن اكمل بعدين لحسن بجد ايدي وجعتني من الكتابة

ايه ده كله ما شاء الله العظيم .. والله اكبر
انا شايف روعة في التفاعل ... وابداع في الشرح...!

اهم شيء تحسسها انك بتحبها وبتهتم بيها وانك راجلها وسندها اللي تعتمد عليه في الظروف الصعبة والست عامة مش بتحب الراجل البخيل

جميل قوي يا روز ... يبقي قصدك الاهتمام وتقديم اللمسات الحلوة ..
اللي تحسس الزوجة بالاهتمام ده

والراجل البخيل محدش بيحبه ابدا ...
ولو جت ع الشيكولاته تبقي سهلة ...
يعني ممكن حاجات صغيره.. وتفرح الزوجة قووووووووي ...
حاااااااضررررررر ,,, ع العين والخاطر
.......
طيب فين بقية الحاجات التانية ... ؟
اهلها واهلي .. لما يزورونا ونزورهم ..
عاوز اسال عن القوتين العظميين ... حماتي وحماتها .. اعمل معاهم ايه وتنصحي المدام بايه ؟

ودا ينطبق على الستات الصالحات مش اللي مخهم شمال

اهو هما دول اللي عاوزك تقوليلهم نصيحة حلوة .. علشان هما دول اللي عاملين مشكلة


......

معـــــــــــاذ الرائع ..
منتهى احساسى بالقوه وانا اساعد زوجتى وأتفاهم معها
على الرغم اننى لا افقه اى شىء من الامور المنزليه
لكن مثلاً ان صادف يوماً وذهبت للمنزل وهى تعمل شيئاً ما
يكفيها ان اقف معها مثلاً بالمطبخ

يبقي المشاركة يا صاحبي ... كلامك جميل جدا ..
ودخلت علي التواصل كمان ...يعني بلاش اكون في وادي والزوجة في وادي ..
يعني لازم يكون في بينا حوار ومشاركة .. في التفكير والاهتمامات.. والمطبخ كمان لو امكن ..
ع العين والخاطر.. يا بطل
يسلم معاذ وروز ... مشاركات في منتهي الوضوح والايجابية ...

بس احنا اصحاب السوابق .. قصدي المتجوزين .. يعني بنتكلم عن تجربة ...اوكي
تعالوا نشوف اللي ع البر .. اصل اللي ع البر شاطر ... وآدي اول شاطرة ظهرت اهيه

وليكم احلي تقييم ... روز ومعاذ

هجاوب اهه
ربنا يستر واجابتي تبقي نموذجيه
انا هسأل قلبي وعقلي واتكلم ومش هفكر في حاجة تانية
يعني من الآخر هقول الصراحة


ايــــــــــــــوته

تلميذتي النجيبة .. انتي تفوقتي علي نفسك النهاردة .. وكالعادة تفوقتي عليا ...!

وكتبتي اكتر من اللي كنت متوقع اني هاوصله بعد كذا رد ...

برافووووووو ايوت



فكرتي عن الزواج انه مرحلة جديدة في حياة البنت أو الولد
علي قد ما بتكون مرحلة حلوة في الحياة علي قد ما بتكون احيانا متعبة يمكن علشان المسؤلية


بيبقي الزواج خطوة لتحقيق هدف ( وهو دة بقي تفكير ي ) بمعني اني عايزة اتجوز علشان حاجات كتير تانية مش علشان الجواز في حد ذاته كشكل اجتماعي والحاجات



ايه البنت اللي فاهمة نفسها قوي دي .؟؟؟

وايه البنت اللي فاهمة دورها كويس .. وعندها طموح رائع جدا



ايجابيات الزواج
أولا الزواج يحمل كل مترادفات العفة يعني حفظ وستر وحاجات كتير قوي
كمان الأولاد من اهم الايجابيات في الزواج الأمومة اكيد احساس فطري غريزي بيبقي مع البنت من يوم كانت بتلعب بعروستها مش بس لما تتجوز وتخلف فالفرحة بالانجاب بتبقي حاجة جامدة علي ما اعتقد كمان الزواج بيخلق نوع من الاستقرار انا هتكلم عن البنت مش الولد او هتكلم عن نفسي بمعني اصح في مرحلة ما من العمر لما بتبقي البنت استقرت دراسيا او عمليا بتبتدي تفكر في الارتباط ولو بينها وبين نفسها حتي لو البنت كانت ملتزمة جدا ما فيش مانع انها يبقي عندها حب للاستقرار وتكوين اسرة وانها تبقي عايزة تحس ان في حد بيحبها وبيهتم بيها خاصة لو كان الحد دة من الجنس الاخر لان دة غريزة وطبعا دة مش هيتوفر غير في اطار شرعي وهو الزواج وبالتالي الزواج هنا استقرار بمعني ان البنت خلاص بتبقي ارتاحت من التفكير في الموضوع دة
اكيد في ايجابيات اكتر من كدة بس يمكن مش هعرفها غير لما اتجوز ان شاء الله


كل النضج اللي فات ده بيدخل ضمن الفكرة عن الزواج .. ومش عارف اوفي حقك ازاي ..

انتي فاهمة الحياة كويس قوي يا ايوت

ههههههههههههههههه



انتي لقيتي المثل ده فين ... ؟

معاك الف حق طبعا يا روز ... نصيحة في الجووول طبعا ... والمثل صح اكييييييييد

تسلمي يا روز

كمل كمل تشجيع خليني انشرح
انا جاوبت علي بقية الاسئلة

هو انا كمان ممكن اتكلم في موضوع الحموات دة ولا ايه

امممممممم
اوك
بالنسبة للحموات دي بقي
حكاية طوييييييييييييلة قووووووووي
طول عمري كنت اقول
هختار حماتي قبل زوجي
لأني شخصيا مرتبطة جدا جدا جدا جدا بوالدتي نظرا لظروف سفر بابا
صحيح انا الصغيرة والي حد ما الدلوعة لكن مع كدة شاركت مامتي كتير في همومها ومسؤلياتها الكتيرة
يمكن دة لانها كانت بتعتبرني مفتحة شوية فكانت بتستشيرني في حاجات اكبر من سني
ولاني كمان معاها عاطفية جدا وبتأثر بيها بسرعة
الخلاصة انا مرتبطة بيها جدا ومش متخيلة اني اسيبها اصلا
ولما كان الزواج سنة الحياة فبالتالي شئت ام ابيت لو كان لي نصيب في الزواج هتجوز
وهبعد عنها
طيب مين هيبقالي الحضن اللي اجري عليه في الازمات ممكن تقولي زوجي طيب اشكي لمين منه؟
مش بحب انا المشاكل اللي بين الزوجين تطلع برة البيت
لكن لو طلعت انا في رأيي لو أمه اعتبرت نفسها وانا اعتبرتها امي هتبقي هي اول واحدة اجري عليها واشتكيلها
لما كنت بسمع واحدة تشتكي ان حماتها واخدة منها جوزها او جوزها بيحب امه اكتر كنت اقول
هو عايش معاها كام سنة ؟ علي الاقل 20 او اكتر اللي هو سن الزواج طيب عاش مع الزوجة كام سنة ؟ اقل بكتييييييييير علشان كدة انا شايفة ان الام لها حق في ابنها اكتر من الزوجة
انا عن نفسي هحب حماتي مش هلشان ارضي زوجي
لا علشان انا هعتبرها مامتي الجديدة
واعتقد اني ان شاء الله هنجح في كدة لان من خلال تعاملاتي كل الستات اللي في سن مامتي لو قعدت معاهم قعدة واحدة بيحبوني قوي الحمد لله دة انا حتي في المواصلات الستات اللي في سن ماما كدة بيكونوا معايا صداقات ويقعدوا يكلموني من غير ما ابقي اعرفهم ولا يعرفوني

بالنسبة لعلاقتي باهله والعكس فأنا من عشاق الزيارات ومن محبي صلة الرحم يعني افضل اني اروح معاه ازور قرايبه وهو كمان يروح معايا نوزر قرايبي ولازم انا مثلا في المناسبات اقوله ما تيجي نروح نزور اختك او اخوك او مامتك او كدة
هو كمان لازم يراعي دة لازم لما يبقي عند حد من قرايبي مناسبة هو اللي يبادر ويطلب مني اني اروح ازورهم
اكيد اللي بيعمل خير هيلاقي خير وانا مش بحب اعمل خير علشان حد أو علشان حاجة انا بعمل الخير لاني بحس بسعادة وانا بعمله ولاني مدركة اني مش هعيش غير مرة واحدة فلازم اعمل اللي يرضي ربنا عني واكيد لما احب حمايا وحماتي في الله ربنا هيرضي عني

كمان فيه مشكله كبيره

ياجماعه ان

1/ البنت بتتخيل ان من ستتزوجه صوره مصغره

من والدها وبتتعامل معاه من هذا المنطلق

وتنتظر منه تصرفات الاب الحنون الرحيم

وتنسى تماماً انه زوج ومازال حديث العهد

لا يملك حكمة الاب وحنكته

فتبدأبالسخط عليه وانها غشت فيه

وما كانتش متخيله ان الزواج كده

2/ الزوج يتخيل انه تزوج أمه على أصغر

فيتخيل انه سيجد الحنان والدفئ

والامومه والاحتواء والصبر

وينسى هو ان يصبر على زوجته لكي تتعلم اداء هذا الدور

فمازالت صغيره لم يشتد عودها بعد

ويبدأهو فى التزمر من الزواج وانه لم يكن يتخيل ان

هو ده الجواز

وتبدأ العكننه

3/ بعدما يرزقهم الله بالزريه تبدأالزوجه بالاهتمام الزائد بالاطفال

ويأتى هذا على حساب الزوج

فيبدأ هو اهماله لها ويبدى امتعاضه من البيت ومابه من

زهق وعدم اهتمام

والحل


المشاركه والتعاون

وان يعرف كل منهم مايريده الطرف الآخر اولاً ليعطيه

له حتى قبل ان يطلب هو

ثم بعد ذلك يعرف مايريده هو من الطرف الآخر

ويصل له بهذا بطرق غير مباشره

ويحثه على مايرداه من افعال بالثناء عليه

وعلي افعاله وأظهار المشاعر الجيده له

واستمرار الظهور بالمظهر الجيد الائق بعد الزواج

وتنظيم وقت كل منهم ليجدا الوقت الكافى

للتكلم والنقاش ليتم التقرب اسرع والفهم اكبر بينهم

ايضا التنزه عن صغائر الامور والتقدير

المعنوى واحترام كل منهما لدور الآخر واهميته

وانا مش ملاحق ارد عليكو ...
يا اما الشغل ... يا اما الشبكة تخنق عليا ...!
فجأة وانا بابعت رد لايوت .. لاقيت الصفحة خلصت وتلاتة اربعة ردوا ..
مشششش لااااااااااحق...

دا انا لو سيبتكو يومين هارجع الاقي الموضوع اتقيد ضد مجهول ..
واتحفظ في الارشيف ..

من حقك يا ايوت تشاركي في كل حاجة .. انا ما عنديش استعداد اخسر مشاركتك المفيدة ابدااااااا

بس مش مهم اني الحق ارد ... كفاية اني استمتعت جداااااااا بردودكم وتفاعلكم
واستفدت طبعا .. برافو عليكو كلكو ..

.........

رووووز

شكرا يا روز مش غريب عليكي كل الزوق ده ...
والمفروض احنا اللي نشكركم انا وكل الاصحاب اللي هايشوفوا ردودكم دي ...!


معااااااذ

اجمل واحسن اضافة في الموضوع ... تستحق التمييز والتقييم عليهم ...
اصلنا لو فهمنا صح ..هانفكر صح.. و هانتصرف صح .. وهانعيش صح

تلات تخيلات خاطئة في عقول الشباب ... قد تهدم حياتهم لو استمرت ..وقد تسعدهم العمر كله لو ..فهموها صح

شكرا معاذ ... ( ولو في عندي زر شكر كنت دوست عليه )