عنوان الموضوع غريب
لكنه واقعى
و بيعبر عن الكلام اللى هنقوله
انا هبدأ معاكم من النقطة اللى أنا بدأت منها
أنا كنت شاب عايش حياتى و مقضيها بالطول و بالعرض
مكنتش بصلى غير الجمعة أحيانا علشان صحابى بيصلوها و بنخرج بعدها
و لا عارف أنا عايش ليه ؟ و لا عايز إيه من الدنيا !
أهه .. كائن كدة موجود و خلاص .. أعيش و أتعايش
لحد ما حصلتلى صدمة عمرى
أكبر ألم خدته فى حياتى
إكتشفت إنى صدمت فى أكتر إنسان كنت بثق فيه
أعز أصدقائى .. أو اللى كنت فاكره أعز أصدقائى
طلع آخر إنسان أقدر أثق فيه و إكتشفت إنه فعلا ميستاهلش حتى تعاطفى معاه كإنسان
كنت مخنوق جدا لأكبر درجة
ملقيتش غير الصلاة منقذ ليا و التقرب من الله
و كرد فعل طبيعى بعد فترة من الوقت رجعت لحياتى من تانى
لأن إلتزامى كان بسبب صدمة مريت بيها
مش بسبب إقتناع و معرفة
و تدور الأيام .. بين فترات إلتزام و تقرب من الله .. و بين فترات مجون و سخافات
لحد ما جت لحظة
قلت لنفسى فيها لأ
لازم بقى أفوق
أعرف انا رايح فين ؟
مش هعيش زى البهايم و الحيوانات .. باكل و بشرب و أنام
أنا ليا عقل
أكيد أنا موجود فى الحياة دى لسبب معين
و قررت إنى أبدأ من البداية
و لأنى الحمد لله تفكيرى دايما متسلسل ..
قررت إنى أبدأ من البداية ..
و سألت نفسى أهم و أول سؤال لازم كل واحد يسأله لنفسه ..
يــا ترى ربنا موجود فعلا و لا لأ ؟