كلام في السياسة

نقل الحديقة

الحكومة قررت نقل حديقة حيوان الجيزة إلى مدينة 6 أكتوبر وبيع ارضها للمستثمرين.. الحمد لله ان الزرافة ماتت قبل ماتشوف اليوم ده

*******

مسااااء الخيييييير

مساء الخيييييير.. الحكومة استوردت 13 الف طن ذرة فيها بذور حشيش.. ويبقى كدة الحكومة مش حرمانا من حاجة.. بتأكّلنا وتكيّفنا.. ربنا يخليكي لينا يا حكومتنا ياام دماغ عالية يامظبطانا

*******

اسكواش في السيدة

الدكتور سرور افتتح ملعب اسكواش في السيدة زينب.. أظن كده هانت ومش فاضل للحكومة غير حاجات بسيطة وتحل مشاكل العشوائيات في القاهرة، يدوبك صالة بولينج في اسطبل عنتر وملعب جولف 18 حفرة في حكر ابو دومة

*******

وزارة الكهربا واللمبات

وزارة الكهرباء تدعو المواطنين لترشيد استهلاك الكهرباء وشراء لمبات موفرة للطاقة.. طيب ما توفروا على المواطن فاتورة النظافة الاول اللي بيدفعها وبرضه بيشيل الزبالة بنفسه.. ولاّ هو الباشا صاحب مصنع اللمبات مش عارف يسوّق انتاجه في مصر؟

*******

عادتنا ولاّ هانشتريها

كلاكيت عاشر مرة.. ممكن نوصل كاس العالم لو فازت فلانة على علانة واتعادلت سين مع صاد وفزنا في باقي المباريات بفرق تسع اهداف، بس يا خسارة ده ما بيحصلش وفى الآخر فلانة اوعلانة هما اللى بيوصلوا.. عادتنا ولا هانشتريها.. والى اللقاء في 2014

*******

التغيير الوزاري

يعني يوم ما ربنا يكرمنا بالتغيير الوزاري اللي بقالنا سنين بنطالب بيه، يتشال وزير الري اللي محدش سمعله حس وتتعاد وزارة السكان اللي محدش عارف بتعمل ايه بالظبط، صحيح اللي ليه ضهر مايتشالش في تغيير وزاري محدود.. ويطلع لسانه للشعب المهدود

*******

أسئلة بريئة

أسئلة بريئة.. ليه التلوث محاوطنا في كل حتة رغم ان رئيس الحكومة اسمه نظيف، وليه الغم راكبنا رغم ان رئيس مجلس الشعب اسمه سرور؟ ليه التعليم في الجامعات في الأرض رغم ان وزير التعليم العالي اسمه هلال؟ لو عرفت الإجابة اتصل بالحزب الوطني لتفوز بجائزة قيّمة: سيخ ماركة حديد عز

*******

المواقع الاباحية

القضاء امر بحجب المواقع الاباحية في مصر، بس يا خوفي الحكومة تفهم الحكم دي بطريقتها وتقفل مواقع المعارضة والبلوجز، وأي موقع يوجعلها دماغها تقولك قفلناه لأنه اباحي، انت هاتعرف اكتر من الحكومة؟

*******

الحكومة بتحفظ مش بتفهم

اتعودنا كل ما يحصل حريق الحكومة تقول ان السبب ماس كهربائي، وساعة ما العربية انفجرت قدام الكنيسة قالوا برضه ان السبب ماس كهربائي، واضح جدا ان حكومتنا فاهمة مش حافظة

*******

تقديم الساعة

المفروض نحتفل كلنا باليوم القومي لتقديم الساعة في التوقيت الصيفي علشان باين كده ان هي دى الحاجة الوحيدة اللي بتتقدم في مصر

*******

الشتيمة بتلزق

مصر بتدعو ليبرمان لزيارتها ودعوه رسمية سلمهالوه مدير المخابرات في القدس، مش ليبرمان ده برضه اللي شتم مصر؟ ولا احنا بنتعامل مع اسرائيل بمبدأ اللي بيشتم ربنا يسامحه والشتيمة مبتلزقش؟

*******

بعد زيارة اوباما

بعد انتهاء زيارة اوباما للقاهرة، الحياة رجعت مرة تانية لطبيعتها، الفوضى رجعت والزحمة رجعت والدوشة رجعت.. والزبالة عادت إلى قواعدها سالمة

*******

الحمد لله

أخيرا ضمنت وظيفة في أوروبا بعد 41 سنة من دلوقتي بعد تصريحات الوزيرة أن أوروبا حتحتاج للعمالة العربية سنة 2050.. أهو الواحد يكون لشّه في عز شبابه برضو ويبدأ يكوّن نفشه ويتجوّش وهو عنده شبعين شنة

*******

رسالة

الحكومة هاتبعت رسالة على موبايل سائق السيارة بتسجيل مخالفة مرورية له فور ارتكابها، وطبعا السائق هايمسك الموبايل عشان يشوف الرسالة فيروح واخد مخالفه تانية عشان استخدم الموبايل اثناء القيادة، ويبعتوله رسالة بيها، فيمسك الموبايل فياخد مخالفة تالتة.. ويفضل كده لغاية مايروّح بيته بالسلامة

*******

كلام في السياسة Securedownload

ههههههههههههههههههههههه
هههههههههههههههههههههههههههه
هههههههههههههههههههههههههههههههههه

انا مش قادر احوش نفسي عن الضحك ..
في منتهي الجمال وخفة الدم ...
صحيح شر البلية ما يضحك ..
الموضوع مصنف من الكوميديا السوداء ..
بس شديد بصراحة
وكل فقراته احلي من بعض

تسلم يا عبووووووووود
استمرررررررر

اقتباس :: وزارة الكهرباء تدعو المواطنين لترشيد استهلاك الكهرباء وشراء لمبات موفرة للطاقة.. طيب ما توفروا على المواطن فاتورة النظافة الاول اللي بيدفعها وبرضه بيشيل الزبالة بنفسه.. ولاّ هو الباشا صاحب مصنع اللمبات مش عارف يسوّق انتاجه في مصر؟

الا بقي مضوع اللمبات دة
والله ما بتستحمل يومين
لسة واحدة محروقة امبارح اهي
والله غلبانة يا مصر

شراً ياأستاذ حسام علي المرور

ويارب يكون الموضوع عجبك بجد مش مجاملة منك ياباشا

أهم حاجة عندك يا دكتورة هو اللمبات بس
وما قلتيش ريك في الموضوع

بردوا دي حرية شخصية

هههههههههههههه
معلش
اصل اللمبات واكلة عقلي
لكن الموضوع جميل طبعا
كفاية اني ضحكت شوية علي الصبح
ولا تزعل
احلي تقييم كمان

desartlion كتب:: شراً ياأستاذ حسام علي المرور

ويارب يكون الموضوع عجبك بجد مش مجاملة منك ياباشا

طبعا انت تقصد شكرا .. كلام في السياسة 820491

انا اللي باشكرك .. الموضوع حلو فعلا ولولا اني مش عايز اتقل عليك .. كنت اقتبسته فقرة فقرة
وعلقت عليه ..
للمرة التانية موضوع جميل جدا ..
استمررررررررر

انرتوا الموضوع بمروكم الكريم

هههههههههههههههههههههههه
جميل اووى يا وزير

بارك الله فيكى
وجزاك الله خيرا

جزاك الله كل خير