سيبر وكبر

موضوع: سيبر وكبر الخميس يناير 28, 2010 6:56 pm

الشباب زهقان ......تقدر تشوف ده بمنتهى الوضوح لو سالت واحد بس من الشباب اياهم إزى الحال ؟ايه اخبارك؟؟

ال يقولك......... مـــــــــاشى

وال يستهتر كده ويقولك :هه....مفيش جديد و تلاقيه يرد عليك بطريقه كده فيها يأس على شويه قرف على حبتين زهق وتلاقي اجابته برضو تغم وتسد النفس ده عشان الشباب فى البلد دى حقيقى محبط (ويجيب إحباط) ...

لكن ان كان مكبر ومروق والعيشه سهله ومش واخد باله اساساً من ال بيحصل حواليه هايقولك وهو بيضحك ببلاهه شديده ولا مبالاه :كله بيس على الاخر..قشطه اوى..كووول ...انا مكبر دماغى...مروق على الاخر... العيشه فل وكله فى التمام... طول مانا مروشن الحياه اخر روشنه ..

زمان كان الشاب الفاضى حريف (ســبارس) يمشى يلم إعقاب السجاير ويتدارى فى اى حته يشربها هو والعيال اصحابه وكل واحد يعمل فيها راجل وبيدخن بقى وبتاع..

أما دلوقتى فأصبح الشاب حريف (ســايبر) ومديها قدام النــت من ساعه مايصحى لحد ما يكمل صحيان وهو صاحى اليوم التانى..بيعمل مجهود جبار متواصل

وتساله يقولك برضو زهقااااااااان

والواحد بيفتكر زمان ايام الروقان كده يعنى من حوالى شفنتاشر سنه كده ولا حاجه كان الشباب يسلى يومه ويملا وقت فراغه بشوية لب وفيلم أجنبى فى الفيديو وبرضو كان بيتقال عليه شباب بايظ وجيل فاشل وكلام من النوعيه دى طيب دلوقتى قاعد متنح فى شاشة ميلودى ومزيكا ومديها دش وفيديو كليبات دى غنوه لهيفاء ودى دومينيك واحلى عيشه بقى لو عرف يفك شفره بعض القنوات الاوروبيه المشفره ..

لو معاه قرش زياده يبقى تلاقيه مقضى الوقت فى المولات والسينيمات والنوادى والنواصى والقهاوى والكافيهات وصالات البلياردو والبولينج والشات والماسيدجات والرنات والموبايلات الحديثه..

ومع ذلك و الغريب فعلا انه برضه لسه زهقان.. وحاسس بفراغ قاتل.. ومهموم يا حرام كده ومكتوم ومش لاقى لنفسه مكان فى المجتمع ولا حد فاهمه ولا بيسمعله ولا مديله الفرصه يعبر عن نفسه ولايتكلم خاااااااااالص .

فاصبح المبدأ السائد الان " سايبر وكبر"... واصبحت الدنيا بالنسبه للشاب... "اهى عيشه والسلام " ولأن برضو الشباب معظمه خجول جداً.. ومؤدب جداً جداً ...ومالوش صوت اساساً فتلاقى الشاب من دول واقف قدام والده فى منتهى الإحترام والأدب (ومش ممكن يعلى صوته ولا يشوح لأبوه ولا يبرطم) يطلب منه فى منتهى الخجل والحرج فلوس ((طبعاً ليشترى كتاب علم أو ليساعد فقراء العالم الثالث ومش بعيد يكون بيساهم فى السر لسداد ديون مصر))

ولو حصل و بابا كان مزنوق الشهر ده مش معاه ال 100 جنيه ال عايزها الشاب النموذجى عمره مايبين ضيقه من ((ضيق ذات اليد ))لكن يبحث عن عمل شريف ليساهم فى مصروف البيت ((حتى لو كان هيشتغل موديل لاعلانات الشامبو ضد القشره)) المهم انه عمل شريف وعفيف ونظيف.

واذا حصل و تناقش معه ابوه عن موضوع كده زى (دراسته مثلاً) تلاقى الشاب بمنتهى الأدب يرد فى صوت مش مسموع ويهمس بخجل وادب ويقول لابوه ويوعده انه هيحاول ويجاهد ويقتل نفسه فى الاستذكار ليشرف أبوه ولا تلاقى منه اى بادره ملل أوتأفف من كلام والده .

ويقوم بسرعه يمسك الكتب و يذاكر ويذاكر ويذاكر.

وان قامت الست والدته الساعه 4 فجراً لوجدته منهمك فى مراجعة دروسه مع الأصدقاء الأوفياء على النت أو مع بنت زميله مجتهده على الموبايل لأن من ((طلب العلا سهر الليالى.))

وفى الأجازه الصيفيه لا يطلب السفر الى الشواطئ والمصايف الا... لمشاهدة التغيرات الطبيعيه لفصول السنه (يعنى زيارات علميه بحته)ومراقبة المد والجذر وتأكل الشواطئ وكده يعنى

ولا عمر الشاب الملتزم ده يلاحظ البنات ذوات المايوهات ...أبداً أبداً لان الراجل فى مهمه علميه فقط لتأكيد معلوماته فى الجغرافيا والجيولوجيا .يعنى بيذاكر صيفاً و شتاءً ..

الصراحه الشباب مظلوم حقيقىً و يا حرام محروم من كل سبل التسليه والترفيه ..

ويرجع بعد المجهود الجبار ده كله والكفاح المتواصل ده ال بيقوم بيها الشباب الغلبان

وتلاقى المجتمع يشير باصابع الاتهام ليهم ويقولولك الجيل الجديد المايص والشباب ال معندوش مثل عليا ولا عنده هدف هو ال هايبوظ البلد .

بالذمه مش ظلم؟؟؟؟؟

موضوع: رد: سيبر وكبر الجمعة يناير 29, 2010 7:35 am

اولا منورنا يا عبووووود

ثانيا ما تغيبش علينا كتير

ثالثا بقي .. موضوع حلو ومقالة جميلة ...

هوه دايما الشباب متهم ف كل الاجيال ..

بس يا سلام لو الشباب يشوف بكرة زي ما هو شايف النهاردة ...!!!

يا سلام لو الجيل السابق يبطل يحكم علي الشباب بمقاييس امبارح ...!!!

الترفيه حلو ومطلوب .. والارادة والعقل سر النجاح والتقدم .. !!

والوسطية شرع وعُرف معروف .. !!

والوعي ضرورة مش رفاهية .. !!!

والشباب برغم كل سلبياتهم هما الامل وهما المستقبل ..

ولو كنا مخلوقين زائدة دودية ... يبقي سايبر وكبّر

تسلم يا اسد .. واحلي تقييم