أخاطب عقولكم ...

السلام عليكم ورحمة الله وبركاته

أعضاء المنتدى الجميل

أخدنا كاس افريقيا للمرة التالتة على التوالي
والمرة السابعة في تاريخ البطولة وحققنا ارقام قياسية مش معقولة
وما حصلتش قبل كده الا في منتخبنا الحبيب اللي حافظ على اسم
مصر واثبت للدنيا كلها انه فعلا قوي وهي دي مصر اللي بيلعب
باسمها الابطال دوول وادخلوا السعادة والفرحة على وجوهنا وقلوبنا
جميعا وملأت الضحكة والفرحة بالانتصار ارجاء البلاد وخرجنا مهللين
مكبيرين فرحين بما حدث ورافعين شعارات البهجة والسرور ..
الى هذا الحد ومع ما به من تجاوزات ولكن نتغاضى عنها لأن هذا ليس
موضوعي الذي سأتكلم فيه الآن ..

في البداية كنت لا اتابع الكرة الا القليل ولا اهتم بها كثيرا واجدها
ملهاة للناس وبعدا عن الواقع وتغييب للمشاكل الاساسية واللهو وراء
ما ليس له قيمة وبعدها ومع ارتباط الناس الكبير بالكرة واهتمامهم
المبالغ فيه بهذه اللعبة وبما يحدث فيها اضطررت ووجدت نفسي ايضا
اتابعها واتابع اخبارها واشاهد مبارياتها حتى اتماشى مع الواقع ولا اكون
مختلفا عن الجماعة وفعلا تابعت وشاهدت واستمتعت وفرحت مع
من فرحوا بالفوز والانتصارات ولكن كان كل هذا في حدود المعقول
وفي حدود التصرف حتى لا اصبح مثل من كانوا مهووسون بها ويضيعون
من اجلها الصلاة وهم جالسون لمشاهدة تلك المباراة ويسبون ويشتمون
وتلهيهم هذه اللعبة عن كل شئ وعن انفسهم ....

كلنا تابع البطولة الاخيرة وفرحنا جميعا بالفوز والانتصار ولكن هل ما حدث
بعد البطولة يرضي الله ورسوله ؟؟؟؟
ستسألون جميعا ماذا حدث وماذا جرى ؟؟؟

عندما أسمع عن تكريم المنتخب المصري من قبل الرئيس ومن قبل الاتحاد
الدولي ان كل لاعب منهم قد حصل على مليون جنيه مصري والمدرب على
نفس المبلغ او اكثر والجهاز باكمله من اول فرد لآخر فرد !!!!!!!!!!!

فهل يعقل ان يصرف ما يقارب من ال 30 مليون جنيه من اجل الفرحة بالفوز
ومن اجل ماذا لعبة ولمن ؟؟؟؟؟؟؟؟

طبعا لا انكر ما حققه هؤلاء الابطال من انتصار ولكن هل يستحقون فعلا
تلك المكافأة الكبيرة ؟؟؟ وهل اخذ الشعب حقه في ملايين الدولة حتى تنفق ما تشاء ؟؟؟
وهل اخذ الموظف راتيه كما يستحق ؟؟؟
وهل راعينا الفقراء والمساكين ؟؟؟
وهل اهتممنا بالشباب ووظفناه ؟؟؟ وهل وهل ؟؟؟

لو فعلنا حقا ذلك فلا استكثر عليهم هذه المبالغ اما عندما تكون البلد فقيرة
وبها الكثير والكثير من الفقراء بل والمعدمين بل والذين لا يجدون ما يبيتون
عليه من لقمة خبز تسد جوعهم وشربة ماء نضيفة تطفئ ظمأهم ومسكن يأويهم
من برد الشتاء القارص وملابس يرتدونها تحميهم من البرد وغير ذلك ...

عندما يجد المدرس ان لاعب الكرة هو صاحب المقام الاول في البلد ويأخد هذه المبالغ
فماذا تنتظر منه ان يقدم للبلد التي لم تعطه حقه مع انه قدم الكثير واكثر للبد ..

عندما يجد الطالب نفسه متفوقا ولا يكرم مثل هذه التكريم فماذا يفعل ؟؟

عندما يجد الموظف راتبه لا يكفي شهره ولا يكفي لتغطية احتياجاته ويجد
آخرون يلعبون ويقبضون هذه الأثمان في ماذا سيفكر ؟؟؟

عندما يجد الشاب نفسه وقد تخرج ولا يجد وظيفة ولا مالا ولا يستطيع
ان يقدم على أي شئ ولا ان يتزوج لكي يعصم نفسه ويجد هذا ماذا سيفعل ؟؟؟

أخبروني بالله عليكم هل هذا عدل ؟؟؟؟؟؟؟

وأخيرا هل هذا يرضي الله سبحانه وتعالى ؟؟؟؟

هذا ما يغضبني في الكرة وهذا ما يحزنني وهذا ما يجعلني اقول لماذا
كل هذا الاهتمام بالكرة ولاعبيها وما تفعل ولماذا هذه الاستقبالات الضخمة
والفرحة العارمة والتكريم الراقي والحفاوزة وتسليط الأضواء ؟؟؟

حقا انها سياسة دولة تريد ان تلهينا جميعا عما تفعل ونحن ننساق وراءها ...

الموضوع له جوانب عديدة ارجو مناقشتكم وتحليلاتكم ...

والله عندك حق يا بيبو
بس للأسف دة مش حال لعيبة الكورة بس
في ناس كتير بتاخد اكتر مما تستحق
احنا عندنا في مصر سوء تقدير وسوء توزيع وسوء استغلال
وعلي فكرة دة لسان حال معظم الناس العادية اللي زينا
انا اعرف ناس كانت بتدعي المنتخب يخسر علشان الأسعار ما ترتفعش
عامة دة موضوع مهم ولي عودة ان شاء الله
مع التقييم

عندك حق و الله يا اخى

فان هذا الامر موقوف من عده اوجه
1- اعطاء الحق لمن لا يستحق ( فكم من طالب علم سهر الليالى و تفوق و لم يكرم بل و ظلم و غيرها و غيرها .... )
2- ان هذا مدعاه و دعوه للأنحراف عن اوجه الحق و الاتجاه الى غيرها حيث انها تجلب المال
3-انحراف الشباب و الاطفال عن القدوه الحسنه و اتخاذ مثل هؤلاء قدوه لهم و ينتهجون نهجهم و ينحون نحوهم
و غيرها و الله فى رأسى اكثر من ذلك بكثير و لكن هذا الاهم
و اما عن شبهه ان هذا المنتخب الوطنى و حب الوطن من الايمان و لابد من مكافأه هؤلاء الذين جلبوا النصر لنا مرارا و تكرارا
فأولا : الحديث لا يصح عن النبى صلى الله عليه و سلم
ثانيا : ان حب الوطن ليس متثلا فى الكره و الولاء لمثل هؤلاء و ترك موالاه المؤمنين بل متمثل فى الاصلاح و الامر بالمعروف و النهى عن المنكر و صلاح النفس
جزاك الله خيرا يا اخى على اثاره هذا الموضوع و تنبيه الاعضاء الى هذا الامر الهام

اقتباس :: ( فكم من طالب علم سهر الليالى و تفوق و لم يكرم بل و ظلم و غيرها و غيرها .... )

جيت علي الجرح أخاطب عقولكم ... 16945

ياسلام فعلا لقيت حد يتكلم ف الموضوع اللى حارق دمى
مليون جنيه وراتب شهري مدى الحياه
مالبلد فيها فلوس اهى
امال ازمه الانابيب وازمه العيش وازمه وازمه
دول من ايييييييييه ولا احنا اللى شعب مفترى والحياه حلوة واحنا اللى مش متواضعين ونفسنا ف الزياده؟؟؟ لا كده احنا وحشين
الواحد المفروض يلعب كورة عشان البليه تلعب معاه ويعرف يجيبله شقه وعربيه
ياربنا الشباب مش لاقى انه يفتح بيت وادى لعيب كورة ياخد ازاى
ده مش حقد بس فييييييييييييييين العدل

موضوعك بيصور الواقع المر
وياريت حد يقدر
مشكور بيبو

تصدق يا بيبو انا تنبأت بالموقف ده ( مش عبقرية يعني لكن هوه ده المعتاد )

الله يرحمك يا شيخ كشك .. :

عجبت لمصر تهضم الليث حقه وتفخر بالسنور

لا احد ابدا يحقد علي اللاعبين .. ولا ننادي ابدا بحرمانهم من المكافأة والاحتفال

ولكننا ابدا لم نطلب ان تمطر عليهم السماء اموالا ..

مبسوط يا عم علي سلامه .. آدي مصدر الفرح الوحيد للشعب .. اصبح هاينكد عليه اهوه

ايه رأيك يا عم بيرم يا تونسي .. مش انت اللي قلت :

تلاتين سنة يا مصر واحنا في ضلمة

لما حدايتنا ربت الكتاكيت
-----
يارب ماهوش حسدلكن بعاتبكم
من الصباح للمسا،والمطرقه فيدىصابر على دى الاسا ! حتى نهار عيدى
ابن السبيل انكسى ، واسحب هرابيدى
----
مستغرب ليه يا بيبو ..!!!؟؟؟؟
مش هيا دي مصر اللي يسرق فيها
الف جنية يبقي حرامي و يدخل السجن .. واللي يسرق مليون يبقي وزير
----
سامحوني .. مش اول مرة نتسرق ومش اول مرة نشوف فلوسنا بتتوزع ع اللي ما يستاهلها
كفاية الكائن اللي اسمه سيد القمني .. اخد جايزة الدولة التقديرية ( 100الف جنية ) علشان بيسب الرسول والصحابة
لاجل خاطر وزير الثقافة كان نفسه يروح اليونسكو ..!!
وعلاج الممثلين علي نفقة الدولة ..!!
وفلوس المعونة ( من الدول الغنية ) لما زهقوا من كتر سرقتها منعوها .. واحنا ولا احنا هنا ..
اصلهم قالوا كده كده ما بتوصلش للشعب .. يبقي نوفرها احسن
وفلوس الخصخصة .. حد منكم شاف منها مليم واحد
وغيره وغيره ... وغيره
اقول ايه ...!!؟؟
شكرا يا بيبو

ايوت اختصرتي الكلام في ثلاث جمل مهمة
واراها فعلا هي لب الموضوع الذي نتحدث عنه

1/ سوء تقدير وهو عدم تقدير لمواهب كل شخص
والتركيز على جانب واحد وعلى ما يريدونه فقط وهي الكرة ..

2/ سوء توزيع للأموال فتذهب الى من لا يستحق ..

3/ سوء استغلال فعلا فهي تأتي وتذهب بدون اي فائدة

تحليل جميل ومختصر ورائـــع ايووووت تسلم ايدك
ومنتظر مرورك من جديد ...
-------------------------
اخي المنتظر لفت نظري الى جوانب جميلة جديدة
وهي اتخاذ الاطفال هؤلاء اللاعبين قدوة لهم فنرى الطفل
الآن يقلد ما يراه من أفعالهم وغير ذلك نراه يتوجه الى ان
يكون مثلهم اي يلعب الكرة لانه وجد ان الكرة هي الرابحة
في هذا الوقت وهي التي ينصب عليها اهتمام الشعب
والدولة كلها وهي التي ينجح ابطالها ويهتم بهم كل فرد في
الدولة ومن هنا يجد ان التعليم لا فائدة منه ولا فائدة من السهر
والتعب والمذاكرة وفي النهاية الى الهاوية ولا فائدة ..
فعلا الآن اجد كثيرا من الاولاد يهتمون بلعب الكرة ويجدون
انها هي حياتهم ونسينا التعلم والتثقف كل ذلك بسبب الكرة ...
جميل جدا تحليلك في نقاط مبسطة ولكنها جامعة بمعنى
الكلمة وأثرت على الموضوع وزادته ...
شكررررا كثيرا لتفاعلك
--------------------------
اه والله يا اسمــــــــــــــاء احنا شكلنا بندلع ايه الازمات
اللي احنا بنسمع عنها دي وهي فعلا موجودة ؟؟؟
ولا احنا بندلع ولا الفلوس دي مش بتطلع الا للعيبة الكورة
انما للفقراء المساكين الغلبانين التعبانين الشقاينين المدرسين
الموظفين البسطاء لأ لأ ما لهمش فيها حاجة ..
يسلملي مرورك اسمـــاء وفعلا موضوع انا مش قادر اتخيله
وفي جانب تاني كمان وهو الشعب ده اللي بيشجع وفرحان ده
ايه مش داري باللي بيحصل ولا حاسس باللي هو فيه ؟؟؟
ولا من كتر اللي بيحصل فيه خلاص بقى
صم بكم عمي الا للكورة وكأنها بتغيب عقولهم ...

يسلملي مروركم جميعا وبانتظار باقي الآراء
مع تقيييييييييييمي

فعلا يا حســـــــــــام انا والله مش بحقد عليهم
ولا بطالب اننا مش نكافأهم ولا نعترف بحقهم وبدورهم
ومجهودهم الكبيييييير ، لكن في نفس الوقت مش
بطالب اننا نعاملهم معاملة الابطال الفاتحين اللي حرروا
المسجد الأقصى ولو كانوا حرروه ما كانش حصل كده
لأن الدولة دي مش هتكون موجودة لما يتحرر بإذن الله ...
انما بنطالب بالاعتدال نفرح يا أخي بس في حدود المعقول
نكافئ ياسيدي بس في حدود المعقول والمسموح
نشكر ياسيدي بس مش على حساب الشعب
نهني يا باشا بس مش على قفى الغلبانين ...
اه والله يا حســــــام
حد منا شاف مليم واحد ؟؟؟؟

اقتباس :: وفي جانب تاني كمان وهو الشعب ده اللي بيشجع وفرحان ده
ايه مش داري باللي بيحصل ولا حاسس باللي هو فيه ؟؟؟
ولا من كتر اللي بيحصل فيه خلاص بقى
صم بكم عمي الا للكورة وكأنها بتغيب عقولهم ...

ياه يابيبو شعب مصر ده من اطيب الشعوب واغلبها
بيفرح ساعه الفرح وبيرمى اى هم ورا ضهره
من غير تفكير ف اللىبيحصل اصلا من ورا ضهره
ومش بايدهم حيله...

اقتباس :: سامحوني .. مش اول مرة نتسرق ومش اول مرة نشوف فلوسنا بتتوزع ع اللي ما يستاهلها

ولا اخرر مرة يااستاذ حسام
طول ماحنا كده حولينا ناس.....هنفضل نتسرق ونتسرق لحد ماربنا يتوب علينا
وياعالم امتى؟؟
تطبيق العدل من اهم حاجه ونفسنا ف وقفه بس نقول لمين؟؟
شكرا بيبو تانى لموضوعك

وانا بكتب الرد فعلا كنت هقول هو فعلا
احنا طيبين للدرجة دي بننسى كل همومنا واحزانا
ونرميها ورا ضهرنا في ساعة الفرح دي وكأننا
مش ورانا اي هموم ولا اي تعب ...
فعلا العدل هو السبيل للأمان والاطمئنان
بس لمن نشكو مآسينا كما قال احمد مطر

لمن نشكو مآسينا
ومن يصغي
لشكوانا ويُجدينا

انشكو موتَنا ذلاً لوالينا

وهل موتٌ
سيُحيينا

قطيعٌ نحن
والجزارُ راعينا

ومنسيُّون
نمشي في أراضينا

ونحمل
نعشنا قصراً بأيدينا

ونُعرِب
عن تعازينا لنا فينا

فوالينا
أدام الله والينا

رآنا
أمّةً وسطاً فما أبقى لنا دنيا.. ولا أَبقى لنا دينا..

ولاةَ
الأمر ما خُنتُم ولا هنتم ولا أبديتم اللين

جزاكم
ربنا خيراً كَفَيْتُم أرضنا بلوى أعادينا

وحققتم
أمانينا

وهذي
القدس تشكركم

ففي
تهديدكم حينا وفي تنديدكم حينا

سحقتم أنف
أمريكا

فلم تنقل
سفارتها ولو نُقِلَت - معاذ الله - لو نُقِلَت لَضَيَّعنا .. فلسطينَ

ولاة
الأمر هذا النصر يكفيكم .. ويكفينا.. تهانينا

بصراحة الواحد مش عارف يقول ايه
يعني الوضع اللي احنا فيه ده من اسوء الاوضاع اللي مرت على المسلمين
وكل حاجة ماشية بالمشقلب
ماشى ليهم حق يتكرمو بس متبقاش بالطريقه دى
المفروض ان لينا اهداف واهتمامات كبيره
في الوقت اللي البلد مليانة مصايب وكوارث وازمات
احنا محتاجين فعلا نقف مع نفسنا شويه ونفكر
لازم نفهم كلنا ان مصر مش كانت دخله حرب
دى مجرد لعبه وكوره بلاستيك
الموضوع أكثر من راااااائع وأنا كمان رأيي من رأيكم
اشكرك بيبووو

والله انا دخلت الموضوع اتنرفزت وخرجت

وجيت تاني عشان ارد ووالله ما عارفة اقول ايه

لكن لفت نظري السؤال اللي انت بتسأله

هل يرضي الله ورسوله؟؟

طيب انت بتوجه السؤال لمين ؟؟

لو للمسئولين .. يبقى انصحك تغير السؤال أحسن ..

لأنهم معندهمش فكرة عن اللي بيرضي الله ورسوله ..

لما يبقى دخل بلدك بيعتمد على السياحة اللي بتنقسم بدورها إلى : قمار وخمرة ودعارة وكل انواع الترفيه المحرمة ..

لما يبقى 2 موظفين في نفس الشركة ونفس المركز وواحد مصري والتاني أجنبي .. وتلاقي الاجنبي بياخد اضعاف مرتب المصري ..

لما يبقى الأجنبي في بلدك ليه الاولوية عليك .. ولما تحصل حادثة وفيها مصابين اجانب ومصريين ..الاجانب يتعالجوا في مستشفيات استثمارية والمصريين مش عارفة بيتعالجوا فين .. !

ولما يتاخد من جمارك على بضايع برخص التراب في بلدها .. وتلاقي سعرها وصل في بلدك لأسعار خيالية (بسبب الجمارك) .. وفي الاخر كمان تدفع ضرايب عليها

لما تشتكي من الضرايب وتطلب بتطبيق شرع ربنا واننا نكتفي بالزكاة .. يقوم الوزير المحترم يقولك ولا تزعل .. هانعمل قانون للزكاة .. تدفعها لوزارة المالية .. إلى جانب الضرايب (برضه)

ولما تكون في جامعتك مالياك أحلام .. ومتفوق .. وتخلص وتعمل دراسات عليا .. وفي رسالة الماجستير والدكتوراة ..وفي المناقشة يتفهوا أفكارك وارائك و تتذل لحد اما تاخد الدرجة

وبعد ااما تاخدها تزيد 7 جنيه لو كنت موظف حكومة .. !

ولما الرقاصة والمطرب والممثل والممثلة اياهم .. يكونوا فاشلين دراسيا .. وكلما كشفوا أكثر وبعدوا عن دينهم اكثر (قبضوا اكثر) .. ولا عندهم مواهب ولا حاجة (دا لو قبلنا باللي يعملوه أصلا)

ولما تسمح بلدك باقامة شواطئ للعري وتمنع المنتقبات من دخول الحرم الجامعي

ولما تعمل شواطئ ممنوع الدخول ليها الا للـ Couples وممنوع فيها اصطحاب "المحجبات"
وفي نفس الوقت لو ربيت دقنك ورحت المسجد في أوقات الصلاة تبقى سنتك "بيضا" ..

ولما ولما ..

متهيألي بعد دا كله ماينفعش تسأل المسئولين السؤال دا ..

لأنه أصلا مش هايأثر فيهم ..

وبالنسبة للأموال الهايلة اللي راحت للاعبين ..

فأنا باحمد ربنا إن أغلبهم باين عليهم التقوى .. وبالتالي ممكن يتصرفوا في أموالهم بحكمة ويكون فيها نصيب للمحرومين .. الدور والباقي على اللي معاهم ومش حاسين بحد

معلش يا بيبو ردي طول .. بس متنرفزة مش عارفة اقولك اد ايه

أتمنى تتقبل مروري .. واعتذاري

موضوعك مهم اوى اوى يا بيبو
بس كان عندى راى .. وهوا ان لما نبقى شعب
فينا اللى مكفينا وزياده وللاسف بقت اكتر حاجه
بتفرح الشعب داه هيا الكوره .. لما ييجى بقى
اللى بيلعبو كوره يفرحوا النااس كلها
فى اليوم داه الناس كلها بلا استثناء نامت فرحانه
واللى يفرح الناس الفرحه دى كلها اكيد يستاهل
كتيييير .. بس كتير بعقل
مش لدرجة الملايين دييه طبعا لا
يعنى اللى اقصده ان من الاخر هما يستاهلو
بس مش لحد الجنون يعنى .

تسلم يا بيبو على الموضوع

طول عمرى كان نفسى ابقا لاعب كورة
بس للأسف الكورة اللى مش بتحبنى
ومش بترضى تمشى على رجلى مظبوط
واحتمال يكون العيب فى رجلى
تعرفى يا بيبو
جايز يكون فوتبول باتا هو اللى مش تمام
اصل عشان تلعب كويس
محتاج فوتبول من اللى هو بفلوس تحل مشاكل نص الشباب
او يمكن الرملة اللى بلعب عليها محتاجة تتساوا شوية
مش عارف كلامى دا واصلك معناه ولا لا
بس عموما باقى الاصحاب قالو المفيد ان الموضوع زاد جدا
عن حدو ، لدرجة ان مصر بقت من اكبر الدول مبالغة فى اسعار
اللاعيبة
على فكرة انا عندى اقتراح جميل اوى وتعالى نحسبها سوا
3 بطولات كل مرة مثلا بـ 30 مليون
يبقا 30000000* 3 = 90000000 جنية
يعنى 90 مليون جنية فى 6 سنين
تفتكر لو كل مواطن خد مليون جنية
كان هيبقا ايه الوضع دلوقتى
انا عن نفسى لو خدت المليون بتاعتى
اكيد كنت هشترى الفوتبول اللى نفسى فيه

لا فعلا يارحال العيب ف الكوووورة
بس ايه مليون دى ولا تجيب حتى فوتبول شراب
عندنا حاله ف البلد من العدل ف توزيع التروات خطيرررر جدا
وده اللى حكومتنا مشكورة بتحققه

هو كلامنا ده ممكن يغير شئ؟؟؟
i don't think sooooooooooo

وآدي يا عم بيبو اخر نكتة ...

السيد المليونير المحترم ( يوسف بطرس غالي ) ( وزير المااااااااالية )

بيتعالج علي نفقة الدولة .. !!

وبلغت اجمالي المبالغ اللي صدر بيها قرارات رسمية .. مليوووووووون جنية

دا غير تذاكر الطيران فرست كلاس + الاقامة كاملة ( له وللمرافق )

القرارات صدرت من السيد العبقري والمتألق ( نظيف ) رئيس الوزرا

في نفس الوقت اللي اصدرت فيها وزارة الصحة والمالية ..

قرارات لتقييد العلاج علي نفقة الدولة .. ( طبعا ده بالنسبة للمواطن الغلبان )

وكمان في ازمة بين المستشفيات الجامعية ووزارة الصحة ( في العلاج علي نفقة الدولة )

سببها وزارة المالية .. اللي مش راضية تدفع فلوس ( علشان علاج الغلابة )

وللعلم يا بيبو .. الوزير يوسف بطرس غالي عنده فلوس تملا بيتكم من الدور الارضي

للدرو التالت .. ! ده علي اعتبار ان بيتكم بقي 3 ادوار

وسعادته راجل نزيه .. مش بيحب يتعالج الا في فرنسا وامريكا .. !!!

والغريب والملفت للنظر .. ان القرارت اللي صدرت لصالح جنابه ..

مش مذكور فيها هوه بعد الشر بيتعالج من ايه ...!!

وتواريخ القرارت بيقول انها سفريات صيفية وشتويه .. !!

يعني يا حرام في الوقت اللي الناس بتروح تصيف وتشتي .. سعادته بيروح يتعالج ..!!!!!!

-----
وسبحان الله .. لسه من خمس دقايق شايف .. مصيبة في احدي قري مصر

وقناة 10 مساءا تتساءل .. مش كانت الفلوس اللي اتصرفت ع الحفلة واللاعيبة ..

حلت ازمة القرية دي ورفعت عنهم المعاناة ......!!!
-----
علي فكرة .. كل الناس ردودهم روعة .. وداخلة دماغي جدا .. والفضل يرجعلك

والله يا جماعة انا لو قعدت ارد على كل رد
من الردود الجميلة والمفيدة اللي ردتوها دي في الموضوع
واللي فعلا زادت الموضوع كتيييييير اكيد هحتاج
صفحات وصفحات بس اعذروني لو اختصرت ..
---------------------
عهــــــــــــود هو ده المفيد

اقتباس :: في الوقت اللي البلد مليانة مصايب وكوارث وازمات

اه والله البلد فيها اللي مكفيها ومليانة كتير جدا
مصايب وازمات وكوارث وضحايا وغيرهم
والفلوس سبحان الله بتكتر اووووي لما تكون
لحتة البلاستيك فعلا زي ما شبهتيها دي
ربنا يعافينا يارب
يسلمي مرورك واضافتك الجميلة عهوود
---------------------
والله يا بنووووتة وانا بكتب الموضوع سألت نفسي السؤال
ده وقلت انا بكلم مين هو انا بكلم المسؤولين ؟؟؟
قلت طبعا لأ مش بكلمهم علشان هما مش هنا بس بعد ما قرأت
ردك الجميل ده فعلا لقيت ان مش ينفع اكلمهم علشان فعلا
هما مش عارفين اللي يرضي الله ورسوله
من دخول فعلا داخلة البلد معظمها من حرام وشكلها بتروح برضه
في وجوه مش ليها لازمة ولا فايدة لعدم المساواة في توزيع الأجور
بين الموظفين نفسهم والجمارك والضرايب والطلبة اللي طالع
عنيهم ليل نهار وفي الآخر زي ما بتقولي بيستفيدوا ايه ولا اللي
بيحضر الماجستير وفي الآخر يزيد راتبه 7 جنيه !!!!
والشواطئ والملاهي والخمارات والله فعلا متناقضات رهيبة انا
حاسس اننا انتقلنا لمرحلة اننا بقينا كل ناس في فلك بيسبحوا مع نفسهم
اللي يرقص يرقص واللي يمثل واللي يغني واللي يسرق
واللي يلعب واللي ينام واللي يصحى واللي بيمشينا زي ما هو عايز ...
والله يا اسمـــــــاء مش اقولك ايه على ردك الرائع ده
ولا تعتذري ولا حاجة ياريت تتابعي معايا دايما وما بتزعجيني ولا
حاجة ده انتي شرفتيني ونورتيني ...

مع التقييييييييم لكماااا

مظبووووووط كلامك ازهـــــرية وفعلا
هو ده اللي كلنا اجمعنا عليه انهم حقهم يفرحوا
ويتبسطوا ويتكرموا انهم فرحونا وبسطونا
بس يا أخي كرمهم بالمعقول كرمهم زي غيرهم
وكمان غيرهم افضل منهم يهني مثلا المتفوقين
ليه مش يتكرموا زيهم العلماء والباحثين وغيرهم
كتير جدااا فعلا ده اللي يدايق ..
شكراااا لردك ومرورك ايــــة ونورتي ..
-----------------------
والله يا رحال حسيت من كلامك وانا بقرأه اني هعيط
عارف ليه يا صاحبي انت استخدمت اسلوب الكوميديا
السوداء وهي ان تضحكنا على ما هو محزن وما هو سئ
وما هو عار علينا وما أجمل ما اقترحته ولفت نظرنا اليه
ولم اكن اتوقع ان المبلغ سيصل الى هذه الحد وان يكون
فعلا لكل فرد نصيب مليون جنيه كاملة له الحق فيها
وفي التصرف فيها من جميع افراد الشعب صغيرا كان ام كبيرا
غنيا او فقيرا شابا او شيخا امرأة او بنت يا الله يا الله
والله لكان حالنا غير ما نحن عليه وغير ذلك لو افترضنا ان هذه المبالغ
صرفت على مشاريع استثمارية تعود للبلد توظيف زيادة
رواتب اهتمام بالموظفين العمال المساكين .......
فعلا يا رحـــــــال كنا هنشتري الفوتبول اللي احنا عايزينه
والله لمن نشكو مآسينا ...
شكرا كتير ليك يا صاحبي دايما تمتعني بردك الفائق الجمال

مع تقييمي لكمااا

اقتباس :: هو كلامنا ده ممكن يغير شئ؟؟؟
i don't think sooooooooooo

هيغير في الحكومة ما اعتقدش علشان مش هيوصلهم
ولو وصل اكيد هيطلع على طول علشان ده كلام
وحش مضر بصحة سعادتهم وما ينفعش يسمعوه عيب ..
انما هينفع الناس اللي مش واخدين بالهم ومنساقين وخلاص
لازم ينتبهوا ويعوا اللي بيحصل والكوارث اللي احنا فيها
ويعرفوا الفلوس بتروح فين ، اذا كانوا فرحانين بكده
ده بقى موضوع تاني خالص غير كل اللي بنقوله يا صمت
وفي الحالة دي يبقى الأفضل الصمــــــــــت يا صمــت...
--------------------------
يوسف بيك بطرس غالي
اكيد طبعا ده راجل البلد مش ينفع تستغنى عن خدمات سعادته خالص
الراجل يا اخي قدملهم كتير وللبلد نفسها خدمها بحياته وبعقله كتير
وياما جابلنا ونفذلنا حاجات كتير كانت في مصلحة الوطن ..
ده بيحب مصر عار يعني ايه مصر ده بيحبها (( بيحب فلوسها طبعا))
والله يا حســـــــــام مفارقات عجيبة أكاد ان عقلي يروح مني
لما اسمعها يعني مثلا راجل زي ده انت بتقول معاه اد كده على
قلبه اكيد طبعا سارقهم المهم انه معاه ما يستكفوش بكده !! لأ لازم الدولة
تعالج جنابه وتريحه عالآخر وفي المقابل تطلع عنين الفقير
والغلبان اللي مش لاقي يجيب دوااااا ... لنا الله
الفلوس اللي اتصرفت دي على راي رحــــــــال كانت خلتنا حاجة تانية
والله ربنا يخلصنا بقى منهم البلد كلها بقى حالها لا يسر عدو ولا حبيب ..
اغلى شكر ليك عزيزي حســــــــــام
على متابعتك وردودك الجمييييييييييييلة
مع التقيييييم لكل من مر بالموضوع