بيستغربوا لما بقولهم بحبها
بيستغربوا مع ان كل واحد منهم جواه حبها
و يتمنى يتمرمغ في ترابها و ينول نظرة رضا منها
بس بيكابروا
مستخسرين فيها كلمة عشق .. مع انها هي اللي علمتهم كل شئ عن العشق
متكبرين يقولوا مش هانقدر نعيش من غيرها.. مع انها الهوا و الهوية و الصدق
بس انا هاقول.. هاقول كل حاجة جوا قلبي اللي اتكتم
ايوة اتكتم سنين خايف يقول اللي حاسه عشان ما يحسش بالألم
لكن هاقول اللي فيه من غير ذرة ندم
و اندم ليه ما الألم هو الألم حسينا بيه و خلصت القصة بجرة قلم
باتنفس ترابك جوا دمي و شراييني كلها
و ترابك زي اي تراب .. منه الطاهر و منه النجس
و لكن الاصل فيه الطهارة
و ان نجسه خاين منهم شوية ميا تشيل الاثر
بعشقك من كل قلبي، من كل ضميري، من كل حته في مخي عمر ما حد راح لها
و ازاي ماعشقكيش و انتي اللي ليكي بانتمي و في حضنك في آخر عمري هاترمي
انتي اللي اديتيني اسمك و انتي اللي بيكي بافتخر
بيحاواوا فيكي يكرهونا لكن حبك في قلوبنا انحفر
هاحكي لولادي عن تاريخك و احكيلهم عن محاسنك في ضوء القمر
و ازاي في فجر تاريخ الدنيا كنتي شامخة وحدك و وراكي كل البشر
يتفرجوا على ست الحسن اللي قاعدة على شط النيل في ضل الشجر
ياااه.. يا حبيبتي
خلتيني اكتب و اقول على اللي في قلبي من غير ما اكدب
خلتيني احبك و احب كل اللي فيكي
لازم احبك ما انتي بيتي و اهلي و ذكرى حلوة
خلتيني افكر ازاي ارضيكي و اعملك كل البدع
ما انتي امي و ام ملايين غيري
كتير من ولادك جحدوكي
بس مسيرهم عايدين
وما تزعليش لو يوم نسيوكي
دول هم الخسرانين
::::::::::::::::::::::
مكتوبة بقالها 3 سنين
اعذروني في الاسلوب .. كانت اول مرة اكتب خاطرة