مليونية 29/7 ((بحبك يا مصر))

بســـــــم الله الرحمــــــــن الرحيـــــــــم

اخواني واخواتي في الله ،،،

تتوالي الأحداث .... وتكثر بنا المتاهات ... وكل جمعة بشعار اجمل

ولكنها اصبحت في الحقيقة مجرد شعارات ... وعندما تذهب تجد الحقيقة مختلفة

ولكــــــــــــن الآن ... لنتذكر سوياً الأحداث ،،،

خرجنا لأول استفتاء مصري شريف ونزيه لا يلوثه احد ....

وظهرت لنا النتيجة بـ 77% بنعــــــــــم للتعديلات .....

وهي أن تجرى الأنتخابات اولاً قبل الدستور ......

حاول اصحاب (لا) ومحاربي الانتخابات اولا ......

فرض رأيهم على الشعب أكثر من مرة .....

ودعوا للخروج أكثر من مرة للمطالبة بالدستور أولاً ....

وتوالت الأيام وتعاقبت الأحداث ... ولم نتخيل أن نصل إلى هذه الدرجة

بمنتهى البساطة قرروا الضغط على المجلس العسكري

بمبدأ الصوت العالي والظاهر بمساندة الأعلام المصري طبعا

وطالبوا بوضع وثيقة فوق دستورية لحماية الثورة المصرية وحماية الاقليات

وتحقيق حق المواطنة .... والوثيقة الفوق دستورية هذه تعني :

مبادئ ومواد دستورية لا يستطيع أحد في مصر حتى رئيس الجمهورية أن

يضع أي تعديل عليها أو أن يخالفها ... وهنا نسأل بتلقائية شديدة

من سيضع هذه الوثيقة ؟

واين حق الشعب ... الذي قال نعم للانتخابات اولا قبل الدستور ؟

1- من سيضع هذه الوثيقة على حد تعبيرهم هم القوة الوطنية في مصر

2- اهم المبادئ تحويل مصر من دولة مصدرها الاساسي للتشريع هو الاسلام

إلى دولة مدنية ( ومدنية بالمعنى اللي هما يقصدوه يعني بمعنى اصح علمانية بس خليها بيني وبينكم متقولوش لحد )

هنا يأتي الحديث عن أهم سؤال ؟

أين حق رأيي في الاستفتاء ؟

وعندما تفرض شخصيات قليلة رأيها على الشعب المصري كله

بالطبع لا ومش هنسمح بايه ابداااااااااا

انا مش موافق

انا عايز اللي كل الناس اتفقت عليه

مجلس شعب منتخب ... يعين لجنة تضع الدستور

ويطرح الدستور للاستفتاء بالموافقة او بالرفض

لكن ناس صوتهم عالي يحطو مبادئ فوق دستورية

يعني عشان لو مش عاجبك فيها حاجة محتاج تعمل ثورة فوق الثورة

عشان تشيل المبادئ دي .

مع الاعتبار بأن هوية مصر مهددة كدولة اسلامية

تحكم بالشريعة الاسلامية وتحمي اقلياتها والاسلام يعطيهم كل الحقوق

(أهل ذمتنا ... قبل أهل ملتنا )

ومن هذا المنطلق

اتفقت كل التيارات الاسلامية في مصر

( السلف - الاخوان - الجماعة الاسلامية - الصوفية ...إلخ)

عن الخروج بيوم غير اعتيادي على المجتمع

ليعلم الناس اجمع انه لن يستطيع احد المساس بمصر كدولة مسلمة

ولن يفرض احد رأيه على الشعب ... وأنا معهم إن شاء الرحمن

في النهاية أطلب من إدارة منتدانا الكريم

أن تؤيد هذه المليونية بالدعاية لها

وللحفاظ على هوية مصر .... وإرادة شعبها

موعدنــــــــــا يوم 29 /7 إن شاء الله

بيتهيألى احنا محتاجين معجزة من عند ربنا عشان يصلح حال البلد دى

بس لو المليونية دى هتجيب نتيجة يبقى ربنا معاهم يارب ويوفقوا فى تحقيق اهدافهم

عشان احنا ايام الجمعات كترت اوووى عندنا

وبقينا مش عارفين ايه الصح وايه الغلط

ان شاء الله الرقم هيكون عشرين مليون وانا بطالب الادراه فورا وبدون اي تاخير بما ان المنتدي اسلامي اننا نأيد الحمله وندعو للخروج فورا

انا كمان كنت برفض وبشدة فكرة الاعتصامات ديه كلها
بس زى ما قال بيبو
انه الاعتصام ده مختلف عن باقى الاعتصامات
ولهذا السبب انا موافقة على فكرة الاعتصام هذه المرة
بادرة رائعة منك رحال .. يسلموا ايديك اخى

تسلموووو احلى اصحاب

بس يا ترا ايه موقف الادارة

هتتدعم الحملة ولا لا

ان شالله بتدعمها لأن فكرتها جميلة وللصالح العام
وزى ما قال سوااح
بما ان المنتدى اسلامى يبقى افضل ناس تدعم الحملة هو طبعا
بجد اقتراحاتك واستفتاءاتك متميزة
جزاك الله كل خير عنا رحال

جزانا الله واياكي خير الجزاء يا منة

تسلمين يارب على المتابعة

هاااااااااا يا روز ويا بيبووووووووو قولتو ايه

ابدأ بالتقييم اخى العزيز رحال
واعلن اعجابى الشديد بحماسك الشديد
وترتيبك للموضوع بهذه السلاسة والحماسة
ولكــــــــــــــــــن ... رفقا بنا يا صديقى ..
لنتدبر ســـــــــــــــــويا
ازعجنى بشدة فوضى الفرضيات التى نعيشها فى الفترة الاخيرة
واعتقد ان ما يحدث على الساحة المصرية فى الفترة الاخيرة وبالتحديد بعد جمعة التطهير ..
ان القوى السياسية تمارس رياضة فرد العضلات
وان المجلس العسكرى يمارس حاليا نفس اللعبة القديمة .. فى تاريخنا الحديث :
ضرب التيارات - الغير مرغوب فيها - بالتيار الاسلامى ( مؤقتا )
وقد سبق واعتمد عليهم عبد الناصر .. ثم عاد وانقلب عليهم ونكل بهم بعد انتهاء مهمتهم
ويأتى السادات ويكرر نفس اللعبة .. ويتخلص من الشيوعيين ومراكز القوى
عن طريق تشجيع الاخوان وباقى التيارات الاصولية
فاطلق ايديهم .. حتى تم له ما اراد ..
فآن الاوان للقضاء على التيار الوحيد الباقى :التيار الاسلامى ..
ولكن .. يبدو انهم سئموا اللعبة .. فقضوا عليه واغتالوه

يبدو لى امرا من اثنين :

اما ان المجلس العسكرى يرد على العلمانيين والليبراليين وغيرهم
بمظاهرة التيار الاسلامى ( الى حين .........!!!! )
وخصوصا بعد ما حدث بالامس واول الامس بالعباسية

او ان التيار الاصولى .. يقول للمجلس :
حدد موقفك .....!!!؟؟؟
والى اى جانب انت ...............؟؟؟؟
-----------
وهنا يتبادر للذهن سؤال ساذج :
لما يلعبون هذه اللعبة ؟؟؟
والاجابة .. بسيطة جدا
واعتقد ان الجميع يعرفونها .......!!
===========================

شكرا لك اخى الحبيب

استاذي الغالي

محدش ينكر ان كلامك صحيح جدا

وان المجلس حاول ومازال يحاول أن يضرب كل الأراء ببعضها

حتى تتسنى له الفرصة ليفعل فعلته التي نخاف منها جميعاً !!!

ولكن تعالى نبسط الموضوع اكتر

النسبة الغالبة من القوة الوطنية واقصد بها الأحزاب السياسية والائتلافات

وبمعنى اصح الناس بتوع التحرير اللي واجعين دماغ المجلس بكل شوية اعتصام

ومش عاجبهم حاجة ( دا من وجهة نظر المجلس )

يعنى انا مش بقصد اني اهاجم اعتصامات التحرير او اقول انها غلط

مع اعتراضي على بعضها والموافقة على الاخرى

لكن خلينا في موقف محايد

المجلس يعلم جيدا ان المطلب الاساسي للاحزاب الدستور اولا

واعلنت صراحة في وسائل الاعلام بأنهم يريدون أن تطول الفترة الانتقالية

حتى تتسنى لهم الفرصة وعمل ارضية شعبية بين الجماهير

للحصول على فرصتهم في مجلسي الشعب والشورى

دا غير المحاولات الكثيرة للعلمانيين والليبراليين في تعديل المادة الثانية

والتي وقفت لها الجماعات الاسلامية بشدة

ولن ننسى ابدا المقولة الشهيرة ( عند المساس بالمادة الثانية سنعلنها جهاد )

طيب الاستفتاء قال الانتخابات اولاً

وكان رد فعل المجلس انشاء وثيقة فوق دستورية تحكم على الدستور

وبكدا ترضى القوة الوطنية لانها هي اللي هتحط الوثيقة

وبردو نعمل الانتخايات اولا ً وهما عارفين كويس ان التيارات الاسلامية هترفض

عشان حاجة من اتنين

يا اما بيقولهم بصوا شوفوا دول كانوا ملايين وانا مقدرش اعمل الوثيقة

يا اما المحاولة المتكررة في كل عصر ضرب الفئات ببعضها زي ما انت قولت

وعلشان كدا لما طلعنا يوم الثورة اولا وشوفت الوضع بعنيا

انا رجعت وقولت انا ضد الاعتصام وياريتني ما رحت

وكنت على وشك اني اقاطع كل المليونيات لحين ان تستقر الامور

لكن عندما تصل لنقطة

هرضي معتصمين التحرير على مصلحة وارادة البلد

هنا يبقا لا انا عايز انتخابات ولا عايز دستور

ونستخدم احنا كمان سياسة فرد العضلات

علشان فعلا لازم كل الناس تعرف ان هوية مصر الاسلامية مش سهل تتغير

لا دا كمااااان مستحيل حد يقرب منها

ولما الاخوان قالوا ( مع اعتراضي الكامل على سياسة الاخوان حزباً وجمعة )

ان المادة الثانية مادة فوق دستورية ( قامت الدنيا ومفيش مادة فوق دستورية لانها مش قرأن )

يا باشمهندس حسام

الوضع الحالي يذكرني بشدة لأيام الاستفتاء

عندما خاف الناس بشدة على المادة الثانية وكان الجدال شديد على هذه النقطة

فكانت الردود النمطية ليس هناك من يقترب من المادة الثانية

اليوم تثبت لنا الايام بأن احداث الاستفتاء كانت من اجل المادة الثانية

وانها هي المراد الاول

ولما لا فقد قيلت صراحة النظام التركي الاقرب الي مصر

وإذا كان الاسلاميين سيحكمون مصر بالشكل التركي سنوافق

هذه هي مقولاتهم

فهل نقبل بالنظام التركي على اعتبار انه نظام اسلامي من الاساس

احيييييك اخى الجميل
وابدأ اولا بنقطة جوهرية فى حديثك :
الاستفتاء الشهير .. واول تجربة ديمقراطية حقيقية للمصريين
هذا الاستفتاء .. كان بالونة اختبار ليس اكثر
يقيس به المجلس قوة القوى السياسية واتجاه الرأى العام
( اى انه لا علاقة له بالمادة الثانية بكل ما اثير حولها .. ولا علاقة للاستفتاء بالخدعة الفكاهية وهى شرعية المجلس كما يدعون .. )
وقبل ان تعترض .. اسرع بالقول : ان الفئة الوحيدة التى كانت قلقة على المادة الثانية فى الدستور هم
دعاة السلفية فقط .. - من منطلق الحماسة الدينية
ولهم اقول : لماذا كل هذا الحرص عليها ....؟؟
برغم ان هذه المادة بالتحديد تعلن صراحة ان هناك مصادر اخرى للتشريع
غير المبادئ الاسلامية .. بدليل ان كل التشريعات القانونية لا تلتزم بالشريعة الاسلامية
- باستثناء قوانين الاحوال الشخصية -
وقد لعب عليها السادات لعبته الشهيرة من قبل
والى حين قريب .. لم يكن عامة المصريين يفقهون عنها شيئا
بل لا ابالغ اذا قلت : ان نخبة قليلة جدا هى من كانت تفقه ماهو الدستور اصلا
ربما يكون موقف المساندين للمادة الثانية معقولا اذا كانت تقول :
ان المبادئ االاسلامية هى المصدر الوحيد للتشريع ..

اعنى ببساطة ان هذه المادة ليست الا اشارة للديانة الرسمية للدولة
فما فائدة هذه الاشارة ما دمنا لا نطبق شرائعها بالكامل - نأخذ بعضها ونترك بعضها ؟
المهم .. ليس للاستفتاء اى علاقة بالمادة الثانية .. وانما لعب عليها الطرفان :
كل لمصلحته الشخصية ..
( الاخوان - والعلمانيون والليبراليون والنصارى وغيرهم )
دعاة الدولة المدنية ارادوا وضع اى عقبة فى طريق الانتخابات
وتعطيل تعديل او ترقيع الدستور .. فاثاروا موضوع المادة 2
( ليحصلوا على مهلة وفسحة من الوقت )
و التيار الاسلامى حرض الناس واثار قلقهم
من اجلها .. حتى يضمن التصويت بنعم ..
لتسير الامور لصالحهم ( الانتخابات اولا )

والمستفيد الوحيد من كل هذا .. هو المجلس الذكى
اخذ ما يريد .. وضحك علي الجميع
وفى النهاية .. قال لنا :
اعلان دستورى .. ( ومحدد فيه صلاحيات المجلس = صلاحيات الرئيس )
يعنى : بخ .. لا الدستور القديم القمئ ولا قديم بعد التعديل .. ولا دستور جديد
اعلااااااااااااااااااااااان دستووووووووورى
--------------
لا اظن ان المجلس ينوى ترك الحكم - كما اعلن فى اوليات بياناته -
ولا اريد النموزج التركى .. ان يتكرر فى مصر
ولا اريد ان يتعامل المجلس العسكرى مع الرئيس القادم ..
كما يتعامل مع عصام شرف

انما اريد رجالا .. ينظرون لهذا الوطن العظيم..
وليس لـــــــــ كرسى الحكم والسلطة

اولا احييك وبكل شدة على توضيح بعض النقاط التي كانت تغيب عني

ولكن من كلامك يا صديقي استخلصت بعض النقاط ألا وهي :

اولاً : المادة الثانية ليست هي المادة التي نحلم بها ولكنها فقط تحدد ديانة الدولة

وهل هذا لا يكفي للدفاع عن هويتنا كدولة مسلمة إن سقطت تلك المادة

ثانياً : المجلس العسكري لا ينوي ترك الحكم

وكان هذا السبب الرئيسي لعدد كبير من المصوتين بنعم

للإسراع في اجراء الانتخابات حتى نتخلص من حكم العسكر

الذي نعرفه جميعاً ، وطوال حياتنا نعاني منه منذ ايام ثورة 52

بغض النظر عن المادة الثانية او الثالثة او الرابعة

نقطتين احببت ان اجعلهم كبداية حتى ارتب افكاري

فالمجلس لا ينوي ترك الحكم ونحن نريد الانتخابات اولا ولا خلاف على ذلك

الاخوات بالتحديد اكبر شعبية في مصر وإذا حدثت انتخابات ستأتي بهم

وهذا حقهم اجتهدوا فعليهم أن يجدوا (هذه هي الديمقراطية) مع بعدي الشديد عنهم

الاحزاب تسعى لمصلحتها ولست معهم وعليهم ان يجتهدوا في المرحلة القادمة

انا كمواطن عادي لا انتمي لا لحزب أو جماعة الاخوان

اعلم جيداً ابناء دائرتي وانتمائاتهم وتوجهاتهم واعرف الصالح من الفاسد

وسأختار بالديمقراطية من اريد .... هل هناك مشكلة في ذلك

اعتقد اننا لسنا على خلاف فالانتخابات هي الحل حالياً

حتى نتخلص من العسكر

حتى في مسألة المادة الثانية لا نختلف

ولكننا ننظر برؤا مختلفة

انت تراها مجرد محاولات لإلهاء الناس ووضع عقبات للانتخابات

وتصب جميعها لمصلحة المجلس

وأنا ارى وعلى يقين أنهم إذا وجدوا الفرصة لمسح هوية الاسلام من مصر

ومن التاريخ لفعلوها كما ذكرنا بالمثال تركيا

انا عايزة أسأل سؤال بقي كدة محيرني جدا
مين في مصر مش خاين ومش عميل ومش فاسد؟
انا من اللي بسمعه وبقراه وبشوفه حاسة ان مصر كلها علي كدة بقي ما فيهاش شرفاء
لما نطلع كل واحد شوية يبقي بطل
وشوية نوصفه بالخبث واللؤم و التواطؤ والفساد

جمييييييييييييل جدا كلامك يا رحاااااااالو
تعالى نرتب سوا
انت قلت ان المادة2 بتحدد الهوية الاسلامية لمصر
وده سبب كافى لنتمسك بها
وانا معاك طبعا ..
بس هيا اساسا ما نزلتش ف التعديلات من الاصل
يعنى ما كانش فى سبب يخلى الحملة دى كلها تطلع من الاخوان وجماعة نعم
ما هى البنود اللى اتعدلت مفيهاش المادة التانية اساسا
يبقى الاغلبية اللى قالت نعم .. قالت عشان الاستقرار وبس
انما موضوع المادة التانية ما كانش مطروح للاستفتاء
وده طبعا الخطأ اللى وقع فيه الشيخ يعقوب ..
لان الاستفتاء ما كانش على الاسلام
ولا حتى على المادة التانية
طيب جماعة نعم ( السياسية ) خوفت الناس ليه ؟
طبيعى علشان نعم فى مصلحتهم

طيب عندى تساؤل منطقى ..
بتقول ان المادة التانية بتحدد الهوية الاسلامية لمصر
طيب ما انت عارف ان القانون المصرى .. وضعى ... فرنسى
لا يلتزم الشريعة - الا فى المواريث والاحوال الشخصية

بلاش دى ...
عملت ايه المادة التانية فى الدستور للتيارات الاسلامية
اللى بتاخد على دماغها ومقموعة ومطحونة من يوم ما طلعت
هو احنا من كام شهر كده ... قبل سقوط مبارك
كانت الجماعات الاسلامية عارفة تعيش ف مصر ام هوية اسلامية ؟
ده اللى بيتاجر ف المخدرات او بلطجى ... كان عايش فحضن الدولة
نكاية فى الاسلاميين الارهابيين الاشرار الوحشين

الله ... انت نسيت نقطة مرور كوم اوشيم ... واللبانة اللى بناكلها مخصوص قبل اللجنة ... عشان الباشا ظابط اللجنة يطمن اننا مش اسلاميين قوى يعنى
-------------
وحتى الاخوة (جماعة لاء) ...
ما كانتش مشكلتهم الاساسية هيا المادة التانية
كان مطلبهم وضع دستور جديد .. وده مش زى لبس العيد
نطلع فى ليلة واحدة نشتريه ونرجع .. لاء
ده عاوز وقت وشهور واستفتاء وتعديل للبنود المرفوضة وشغلانة طويلة
يكون الرجالة ( بتوع الدولة المدنية والا العلمانية )
جهزوا حالهم وانتشروا شوية

اما بعد
لا اختلف معاك فى اى كلمة قلتها
وكلنا عارفين ان الانظمة الاستبدادية القمعية .. لا تتوافق مع مبادئ الاسلام
ولا تستريح فى ظله ..
---------
اللهم ولِ علينا من يصلح .. واصلح ذات بيننا
واعصم دمائنا واموالنا وبلدنا من كل سوء

الحقيقة يا آية .. انا باحتار شوية فى هدفك من السؤال
يعنى مثلا ... انتى متضايقة انى بانتقد المجلس العسكرى ؟
والا باقول رأيي فى القوى - السياسية - الموجودة وبانتقدها هيا كمان ؟
والا باختصار حاسة انى هاجمت الجميع ؟
بما فيهم الزعيم عبد الناصر والسادات .....!!

طيب انا مستعد انتقد لك كل الزعماء التاريخيين لمصر
من اول صلاح الدين الايوبى القائد الفذ والبطل التاريخى المشهور
و الظاهر بيبرس ومحمد على وابناؤه جميعا .. وكمان عبدالناصر والسادات

هل يعنى ما اقول ..ان ليس لهؤلاء القادة حسنات وانجازات عظيمة ؟ بعضهم على الاقل
كلا بالطبع .. انما اعنى ان لكل منهم خطأ يحاسبه عليه التاريخ
ودرس يجب ان نتعلم منه ..
وباجابة نمطية وبديهية ومنطقية ونموزجية ومقبولة سلفا منك :

مصر مليئة بالشرفاء طبعا ..

انما هياا فوضى التخوين والاتهامات
اللى سبق وانتى نفسك رفضتيها قبل كده ايام الاستفتاء
وهنا ف اول مشاركة ليا قلت : اننا فى فوضى الفرضيات
يعنى انا بتكلم فى رؤية شخصية .. قد تصح وقد تخطئ
ومفيش وضوح ولا تأكيد لاى حاجة فى كل الضباب اللى حوالينا

انا ساكت بقالى فترة طويلة ..
وبحاول ما اتكلمش غير لما الصورة تكون اوضح شوية بالنسبالى

بس حابب اوضح ان بعض التقديرات بتقول
اننا لو حاسبنا كل الفاسدين فى نظام مبارك .. يبقى هانحاكم تلت المصريين تقريبا
ولان ده مستحيل .. مضطرين نطالب بمحاسبة - فقط - رموز النظام

ومش عايز انسى ان محاكمتهم ما اتقدمتش خطوة واحدة حقيقية من ساعة التنحى
حتى الاجراءات السلحفية اللى بتحصل .. ماشية تبعا لنشاط ميدان التحرير

واداء حكومى زى الزفت ...

بس الحق يقال : عملوا انجاز رهيب
قرروا يلغوا لقب معالى قبل لقب الوزير ..
يعنى ما حدش يقول للوزير.. معاليك ولا معالى الوزير ..
وده طبعا تانى قرار مهم بعد تغيير شعار االشرطة
( اللى كان عامل ازمة نفسية وشرخ عميق بين الشرطة والشعب )

بصراحة قرارات ثورية ومتماشية مع طموحات الشعب المصرى العظيم
وثورته الرائدة
=====================
هل تعلمون ان الثورة الروماانية فى القرن الماضى
مرت بما هو ابشع من ثورتنا بكثير
بل يكاد يفوق ما حدث فى ليبيا وسوريا
لاسقاط تشاوشيسكو
وانتهت الثورة باعدامه فى محاكمة صورية
وهل تعلمون ان من تولى السلطة بعد ذلك هم اتباعه وتلامذته ؟
وهل تعلمون ان فى استفتاء للرومانيين .. حصل تشاوشيسكو على لقب
افضل زعيم فى القرن الماضى .؟؟؟؟؟؟؟؟؟؟؟؟؟
وحصل على لقب اسوأ من افسد الحياة فى رومانيا ؟؟؟؟؟؟؟؟؟؟؟؟؟؟؟

دعونى اصدمكم حاليا .. اننا لم ندخل بعد فى مرحلة الاعتيالات السياسية
وكل هذا لا يعنى التشاؤم ولا عداوة الثورة ورفضها
انما ابصركم لتستعدوا للمحن القادمة ... طريق التغيير طويل وصعب ومرهق
وخفافيش الظلام كثيرون .. وسنكون سذج لو تصورنا ان طريق التقدم مفروش بالورود
------------
لا يمكننى ان انكر - ولا اظن ان واحدا فى مصر يستطيع - ان ينكر
الموقف البطولى للجيش اثناء الثورة .. وانا طالبت بمنحه جائزة نوبل للسلام
وهو يستحق بلا شك خاصة بعدما حدث فى ليبيا وسوريا واليمن
- وللامانة بدأت بعض الاصوات تناقش هذه المسألة -

ولكن هل تعلمون ان المجلس لا يرفض مبارك وليس ضده عموما
وانما هو ضد جمال مبارك وعصابة رجال الاعمال
التى تولت ادارة مصر منذ 10 سنين ...
وانه بدأ يشعر بالقلق من تولى جمال للحكم ( وجمال مدنى وليس عسكريا )

ويبدو ان المجلس اخطأ من جديد عندما اعلن تخوين حركة 6 ابريل
ووصفها بالاجندة الخاصة ..
والتمويل الخارجى ( مما يوحى بالعمالة للخارج )
دون تقديم اى دليل ..
ولا حتى اشارة لتقارير المخابرات او تحريات جهاز امن الدولة .. اقصد الامن الوطنى
ولا ادرى لم شعرت ان نظام مبارك واسلوب ادارته مازال موجود وقائم
بمعنى اننى تذكرت المسرحية الهزلية الهابطة المشهورة ..
بتاعة الصحفية نجاة عبدالرحمن على قناة المحور فى بداية الثورة ..
( لما راحت اتدربت فى صربيا ازاى تعمل انكلاب .. وازاى تعمل إسكاط للنظام
وراحت زارت الكونجراس وعدت على كطر وهيا راجعة )
----------------
وهذا يذكرنى بان الحركات الاسلامية كلها تمول من الخارج وكل حسب توجهه
الاخوان من ايران -
السلفيين من السعودية
الجهاد والجماعة الاسلامية من القاعدة وبن لادن

واغرب من هذا .. ان الدولة كلها تمول من الخارج
منح وعطايا وهدايا ومساعدات وصفقات سلاح مريبة وعمولات وسمسرة
من الخليج وامريكا واوربا ..

على كل حال .. انا حابب اعترف لكم بحاجة :
انا كمان عايش على المساعدات الخارجية من ساعة ما رجعت من بره
واولاد الحلال كتير ........!!

الله يرحمك يا طلعت حرب رحمة واسعة
ويبشبش الطوبة اللى تحت راسك

اقتباس :

بس هيا اساسا ما نزلتش ف التعديلات من الاصل

يا باشمهندس لو كانت النتيجة بلا

كان هيبقا الدستور الاول وساعتها كان هيتم اللعب على المادة الثانية

ومننساش ان المجلس والعلمانيين والليبراليين والنصاري يحاول بشتى الطرق

الوصول للدستور اولا حتى يتم تشكيل الدستور بالشكل اللائق لهم

وبدون اي هيئة رقابية منتخبة (مجلس الشعب)

وبكررها مره اخرى ان مفيش اي اعتراض على رأيك وكلامك

ولو حبيت اقول كل اللي في دماغي دلوقتي

يبقا هاخد ردك اقتباس وبالاخص في النقطة دي

اقتباس :

كان مطلبهم وضع دستور جديد .. وده مش زى لبس العيد
نطلع فى ليلة واحدة نشتريه ونرجع .. لاء
ده عاوز وقت وشهور واستفتاء وتعديل للبنود المرفوضة وشغلانة طويلة
يكون الرجالة ( بتوع الدولة المدنية والا العلمانية )
جهزوا حالهم وانتشروا شوية

عشان كدا الناس قالت نعم

وعشان هما عايزين الوثيقة بردو احنا هنقولهم لا يوم 29

هما مين واحنا مين بقا مش موضوع مسميات ببساطة جدا

الناس اللي هتحدد ومش عشان انا بقول لا للوثيقة ابقا تبع التيارات الاسلامية

ولا اللي بيقول نعم يبقا علماني

ولكن علينا جميعاً حتى من لا ينتمون للجماعات الاسلامية

ان نكون اكثر حرصا من تحركات العلمانيين

وخططهم بالاضافة لمصلحة العسكر و الغرب من تلك الخلافات

اما بخصوص 6 ابريل لا يصح بالمرة للمجلس ان يفعل فعلته هذه

ولكن ما الداعي ان يخرج المنسق العام لحركة كفاية ويقولها بكل فخر

انا بتمول من امريكا والغرب وتم تدريبنا في مصر ومعنا حركة 6 ابريل

ولماذا يوجد مقرين للحركة وما هي الانشقاقات التي تحدث بها

اسئلة كثيرة تراودني

ولكن دائما اتذكر الشخصية التي تعرفها جيداً ( الشيوعي الفيومي السنورسي المطرد من الخدمة بالقوات المسلحة )

هذا الذي نعرف بأن حركته تمول من الخارج ومن اقرب الناس له

والله اعلى واعلم

اقتباس :

الحقيقة يا آية .. انا باحتار شوية فى هدفك من السؤال
يعنى مثلا ... انتى متضايقة انى بانتقد المجلس العسكرى ؟
والا باقول رأيي فى القوى - السياسية - الموجودة وبانتقدها هيا كمان ؟
والا باختصار حاسة انى هاجمت الجميع ؟
بما فيهم الزعيم عبد الناصر والسادات .....!!

لا يا باشمهندس
انا اصلا لا اعني بكلامي كلام حضرتك ولا اشرت لكدة
انا بسألكم سؤال بجد
ردا علي الاحداث اللي انا شايفاها حواليا
اصلي بقيت كل يوم بفتح التليفزيون اسمع خاين جديد وفاسد جديد
وعميل جديد لدرجة اني شكيت في نفسي
دة حتي عصام شرف اللي الثوار جابوه
دلوقت بيتبهدل علي كل قناة شوية
يعني انا مش فاهمة ازاي البلد هتقوم علي رجلها في الوضع دة
من الآخر وبصراحة وبما اني ما كنتش اعرف حاجة عن الثورة دي غير لما شفتها
في التليفزيون ولا كان في نيتي اني انزل مع الثوار ولا كنت مقتنعه
فأنا كآية مش شايفة لغاية دلوقت اي مكاسب من الثورة دي
ومش هقتنع وارتاح غير لما اشوف استقرار بعيني في جميع نواحي الحياة
دي حتي الميزة الوحيدة اللي طلعنا بيها وهي حرية الصحافة والاعلام
انا شايفاها بقت حرية ببواخة
بقي كله بيشتم في كله وكله بيخون في كله
انا شايفة ان اتعمل استفتاء وايا كانت نتيجته فالناس قالت كلمتها
يبقي نستني بقي نشوف ايه اللي هيحصل
ما فيش حاجة كدة بتحصل بين يوم وليلة
ربنا يصلح حال البلد يا رب

يا رتني كنت معاكو من الاول بس ملحوقه
استاذ حسام انا عاوز افهمك انت مؤيد ولا معارض للخروج يوم 29
طيب في حجات كتير قوي انت قولت عليها عاوز اقف عن كل فقره منها
لكن خليني عند المجمل من كلامك
حتي لو كان المجلس بيلعب لعبته الشهيره انت قابل الوثيقه دي
بكل بنودها طيب خليني اقولك اني هدافع عن الهويه الرمزيه اللي هيا الماده التانيه الغير مطبقه علي ارض الواقع
ومتقوليش انها مش مذكوره لانها مذكوره في الوثيقه بوضوح ازاي هتكون الهويه علمانيه بحته.
هنتخلي عن الهويه اللي كنا في يوم بنحلم باننا نشتغل عليها ونطبقها
طيب حتي دي لو راحت هيفضل ايه للدعوه
انت شايف كويس الطفره اللي حصلت في العشر سنين الاخيره
شوفت عدد الملتزمين اصبحو قد ايه
ده اسمه الشغل اللي السلفيين شغالين عليه واللي انت مش مخلتف معايه علي سياساتهم
بغض النظر عن كل التيارات الاسلاميه الموجوده
بلاش انا مش هقولك اني بتكلم عن السلف بس
خلي الموضوع مجمل انت معايه ان دي تستحق الخروج ولا لاء
سيبنا شويه من فكره المجلس وكمان فكره التيارات بكل انوعها
هوا سؤال واحد
حتي الهويه لو مش مفعله
انا كشخص عادي خالص مجرد مسلم لا ينتمي الي اي تيار او حزب او جماعه
عندك استعداد للتخلي عن الهويه الغير مفعله
انا عارف انه لاء
عاوز نفكر في هدف كل طرف
نفكر انا معاك طبعا
علي فكره انا مش مختلف معاك خالص في كل كلامك غير فقره واحده بس ومن غير ما نتطرق ليها
قولي بوضوح
انت هتقبل ان حركه 6 او 7 او اي تيار يتحكم في القرارات
احنا قبلنا الاستفتاء ونجح بغض النظر عن عن فقره الشيخ يعقوب بس
مش هنروح ليها
خليها في موضوع تاني نبقي نطرحه هههه
طيب ليه بقي مش نكمل ولا اللي قالو لاااااا في الاستفتاء لفو من شارع تاني برضو عشان يبحققو نفس الهدف يبقي الاستفتاء الاخير ده وبعد النسبه الجميله دي
كلو ملوش قيمه راي 77% من الناس ملوش طلب
وكل بتوع الوثيقه يعلنو انهم هما الشعب ويطالبو بعكس ما تم الاتفاق عليه
فاهمني بقصد ايه
اخر حاجه انت عارف ان بعد ما اجنب كل واحد بيفكر ازاي هقول ان كل بنود الوثيقه كلها كلها عليها كلام كتيييير قوي
لكن انا شوفت المصيبه الكبيره موضوع الهويه اللي لا خلاف عليها خلاني مش اطرح الباقي ولا افكر في طرحه
وفي الاخير انت
مع او ضد
الخروج يوم 29

ولا يهمك يا بيبوووووو

تمام الله ينور عليك

حســـــــام

انتظرك في الميدان إن شاء الله

ما شاء الله .. الرجالة بدأوا المظاهرة من الاحد
واليفط طلعت
----------
بتعجبنى مواقفك وارائك يا د آية
ونفس الضيق اللى مالى الشعب المصرى كله
انا باعتبرك ترمومتر لحالة الناس
احييكى كما حياكى الجميع
--------
لى عودة كده بروقان
عشان ارد ع الكلام الجميل اللى اتقال ده كله
انتظرونى بعد الفجر ان شاء الله

اقتباس :

كان هيبقا الدستور الاول وساعتها كان هيتم اللعب على المادة الثانية

اعتقد ان ما حدش هايقدر ييجى جنبها
وسواء اتعمل دستور قبل الانتخابات او بعدها
مش هايقدروا يزعلوا الشعب الجميل ده .. واى لجنة هاتحط الدستور
هايبقى عينها على ميدان التحرير .. وغالبية الشعب اللى لسه عامل ثورة
دم شهداءها لسه ما بردش
واعتقد المجلس و اللجنة اللى عملت التعديلات راعت ده كويس
واختيار اللجنة نفسه كان مراعى ميول الشعب المصرى
-----------------

اقتباس :

ومننساش ان المجلس والعلمانيين والليبراليين والنصاري يحاول بشتى الطرق

الوصول للدستور اولا حتى يتم تشكيل الدستور بالشكل اللائق لهم

كلام سليم 100% .. ولا خلاف
بس ليا تعقيب .. المجلس هايعمل ده .. حتى بعد الانتخابات
او على الاقل هايحط بنود تخصه
وتحفظ له جزء من السلطات
-------------

اقتباس :

وبدون اي هيئة رقابية منتخبة (مجلس الشعب)

ما حدش هايقدر يوقف قدام المجلس العسكرى ورغباته
لا مجلس شعب ولا حتى رئيس الجمهورية القادم
الضمانة الوحيدة هى .. الشعب المصرى نفسه
----------------

اقتباس :

ولكن علينا جميعاً حتى من لا ينتمون للجماعات الاسلامية

ان نكون اكثر حرصا من تحركات العلمانيين

وخططهم بالاضافة لمصلحة العسكر و الغرب من تلك الخلافات

معلش انا مش عايز ادخل فى تصنيف العلمانيين والليبراليين
وهل هم على الملة والا طلعوا منها
انما اقدر اقول : انهم فصيل من الشعب المصرى وجزء منه
سياسيين ومفكرين واعلاميين واساتذة ف الجامعة
خلينى اقول زى ما قلت انت : بصرف النظر عن المسميات
لازم كلنا نبص لمصلحة الوطن .. مش مصلحة فئة واحدة منه
سواء كانت الفئة دى :
مجلس عسكرى - اخوان - سلفيين - تيار علمانى - اقلية مسيحية
--------------

اقتباس :

ولكن ما الداعي ان يخرج المنسق العام لحركة كفاية ويقولها بكل فخر

انا بتمول من امريكا والغرب وتم تدريبنا في مصر ومعنا حركة 6 ابريل

مفيش اى داعى .. وتصرف احمق طبعا
بس اطمنك .. المجلس رفض اى تمويل لاى منظمات او جمعيات اهلية
داخل مصر .. من الخارج
وربنا ما يجعلنا من قطاعين الارزاق
--------------

اقتباس :

ولماذا يوجد مقرين للحركة وما هي الانشقاقات التي تحدث بها

اسئلة كثيرة تراودني

يا عم خليهم يقسموها .. وتبقى كل واحدة اسمها 3 ابريل
اكيد طبعا الخلاف بسبب موضوع التمويل والانتماء
------------

اقتباس :

ولكن دائما اتذكر الشخصية التي تعرفها جيداً

شخصية منحرفة فكريا ...
وكان يسعى قديما للظهور ولفت الانظار بغرائب الافكار
ويبدو انه لقى حد يسمعه
ربنا يهدى
---------------

اقتباس :

يا ريتني كنت معاكو من الاول

ايه الحكاية يا جماعة .. هو احنا كنا رايحين نفجر ميناء ايلات ؟
عموما منورنا يا عبوووود ... خد اللغم ده وركبه ف السفينة بيت شيفع
ورحال عليه بات يم
والميناء يقوم بيه بيبو .. ونتقابل ف الاردن ان شاء الله يا رجالة

-----------------

اقتباس :

استاذ حسام انا عاوز افهمك انت مؤيد ولا معارض للخروج يوم 29

والله يا اخويا انا لا كده ولا كده ..
انا بس عرضت المشهد زى ما انا شايفه
اللى عايز يطلع يأيد .. يطلع .. واللى عايز يقعد يتفرج .. يقعد ( ودى مش سلبية )
---------------

اقتباس :

حتي لو كان المجلس بيلعب لعبته الشهيره انت قابل الوثيقه دي

لاء طبعاااااااااا ... مش قابلها ولا طايقها
---------------

اقتباس :

طيب حتي دي لو راحت هيفضل ايه للدعوه

هاتفضل الدعوة نفسها .. لان الدعوة مش محتاجة للمادة 2
وما اشتغلتش تحت مظلتها ولا حاجة .. طول عمرها مقموعة ومطحونة ومحظورة
فى الزوايا والمساجد الاهلية .. وشمت نفسها شوية بالفضائيات
ومع ذلك الدعوة انتشرت زى ما انت قلت :

اقتباس :

انت شايف كويس الطفره اللي حصلت في العشر سنين الاخيره
شوفت عدد الملتزمين اصبحو قد ايه

اه .. شوفت ..
بس ما عدتهومش طبعا
انما حابب ااكد لك .. ان المادة2 لو اتلغت - لا قدر الله - مش هايأثر على الدعوة
بالعكس .. ده اكيد هايزود نشاطها وتأثيرها .. مش هايضعفها
انت نسيت الشيخ لما قال : لو لمسوا المادة 2 هانعلنها جهااااااااااااااد
-------------

اقتباس :

انت هتقبل ان حركه 6 او 7 او اي تيار يتحكم في القرارات

إلاااااااااااااء طبعا .. ما اقبلش ان حد يتحكم
لكن بينى وبينك ..
ما عنديش مانع ان حد من حركة 6 والا 7 والا حتى 29 ابريل يحكم مصر
ان شا الله حتى يجيبوا مهاتير محمد يحكمنا .. المهم يحقق طموحات واحلام الشعب ده
-------------

اقتباس :

كلو ملوش قيمه راي 77% من الناس ملوش طلب

والله يا اخويا ما قلتش كده للمجلس ليه
لما عمل اعلان دستورى .. ؟
الاول قالوا استفتاء ع تعديل دستور 71
والـــــ 77 % قالوا نعم ... لايه ؟ خلينا نحدد .. لدستور 71 معدل

راح المجلس عامل اعلان دستورى -يعنى لغى دستور 71 -
علشان يريح جماعة لاء كمان بالمرة
والاهم من راحتهم .. يعمل صلاحيات و شرعية لنفسه .. يبقى شكلها
زى ما يكون الاستفتاء هو اللى عملها
وانت وال 77 % يا عينى ما كانش قصدكم كده .............!!!
----------------

اقتباس :

لكن انا شوفت المصيبه الكبيره موضوع الهويه

يا باشا ربنا ما يجيب مصايب
الهوية بخير .. وما حدش هايقدر يمسها
وهاتفضل اسلامية .. من ايام الفتح الاسلامى لحد قيام الساعة ان شاء الله
--------------

اقتباس :

ياريتني كنت موجود من بدري

يا باشا لسه بدرى ع الجمعة .. خد راحتك وتعالى وقت ما تحب

اقتباس :

وحاليا يريد اصحاب لا 22% من الشعب ان يمضوا كلمتهم عليهم

للاسف يا بيبو .. هم برضه مشوا كلمتهم .. والمجلس ما رضيش يزعل حد
بعد الاستفتاء الجميل .. وبعد ما حققنا الديمقرااطية الجميلة والشعب قال كلمته
جماعة لاء قالوا : ما يصحش شعب يعمل ثورة ويمشى بدستور مهلهل ..
والثورة تلغى الدساتير االقديمة .. يعنى الثورة تجب ما قبلها
والظاهر انهم اعتبروا ان الثورة اعتبرت الدستور كمان تبع النظام البائد
فاسقطوه هو كمان ...

راح المجلس قايل كلمته : ااعلااااااان دستورى ..
خد البنود االلى الناس فرحت بيها .. ( وتقيد كمان البرادعى ومن لهم نفس ظروفه )
وحطوا عليها صلاحياتهم
وسلملى ع الاستفتاء
-----------

اقتباس :

فهذا اجحاف وظلم وتعدي وتجنى على ارادة الشعب ..

ولو تخلينا عنها باعتبارها لاشئ لفقدنا كل شئ
ولو كانت لا شئ لما حاربو عليها كل هذه الحرب ..

هو ده المقصود .. ارادة الشعب
هيا دى اللى هاتعدل المايلة وتقف قدام كل القوى

وللمرة الالف .. االحرب مش على المادة 2
دى مجرد فقاعة .. ومسمار جحا
وودنى انا اهيه ... قولى بقى ودنكم انتوا فين ؟

الاستعراض بتاع يوم الجمعة الجاية ... عبارة عن الجولة التانية
بعد ما فشلت الجولة الاولى بتاعة التيار العلمانى والقوى الحزبية
( اللى هيا انكمشت وبقت 6 وكفاية وائتلاف ثورة )

الحالة الوحيدة اللى تخلينى اطلع يوم 29 .. ان كل القوى السياسية تشارك
-زى ما حصل يوم جمعة التطهير -
وتوصل رسالة للمجلس .. تقوله :
احنا شعب واعى وذكى .. وايد واحدة
اتفضل حاسب الفاسدين بجد .. وارفع ايدك عن الوزارة
وهات لنا فلوسنا اللى اتنهبت .. وهات حق اللى ماتوا
واحمى حدودنا ... وكتر خيرك على كده
آه .. وحدد موقفك ( زى ما قالوا لك الاخوان فى بيانهم الاخير )

انما بقى الاخوان والسلفيين طالعين يفردوا عضلاتهم
ويا سلام لو قزازتين مولوتوف .. يرميهم مجهولين كالعاده
والاعلام يهلل .. والناس تتفرج وتحتار زيادة
ويطلع المجلس ببيان رقم كذا .. ويقول من اجل مصلحة الوطن
والوفاق الوطنى ..................!!!!!
تعبنا من المشهد ده ..
----------------------
شكرا وتقييم لكل من مروا بالموضوع

جميل جدااااا يا استاذ حسام
ارى انك تتفق معنا في اغلب اقوالنا وهذا ما اريد
واريد ان اصحح ان الموضوع ليس فرد عضلات ابدااا
بل هو تصحيح مساااااااااااار وفقط
وما حدث من شيخنا محمد عبد المقصود وشباب التيار السفي
وائتلاف الشباب الاسلامي الحر بنزولهم للميدان من يوم الاثنين
الماضي وطمانتهم للشباب ولكل التيارات الموجودة
في التحرير انهم قادمون اخوة لهم لا يريدون تطهير الميدان كما يذاع ولا
يريدون اخراجهم بالقوة وقولهم لهم اننا جميعا اخوة والاسلام يحثنا على
عدم التعدي على اي احد طمأن الشباب كثيرا ودل على
الوحدة ان شاء الله والوعي التام والكبير لدى التيار الاسلامي
بضرورة قتل وواد كل اسباب الفتنة وسد الطريق امام المخربين
وامام الاعلام الزائف الذي يريد تزوير الحقائق واظهار
انها جمعة فرد العضلات كما ذكرت او الاستقرار او التطهير
وكلها مسميات اريد بها باطل ...

واريد ان اضيف واطمئنك ان

اقتباس :

الحالة الوحيدة اللى تخلينى اطلع يوم 29 .. ان كل القوى السياسية تشارك
-زى ما حصل يوم جمعة التطهير -
وتوصل رسالة للمجلس .. تقوله :
احنا شعب واعى وذكى .. وايد واحدة
اتفضل حاسب الفاسدين بجد .. وارفع ايدك عن الوزارة
وهات لنا فلوسنا اللى اتنهبت .. وهات حق اللى ماتوا
واحمى حدودنا ... وكتر خيرك على كده
آه .. وحدد موقفك ( زى ما قالوا لك الاخوان فى بيانهم الاخير )

كل هذا اتفق عليه من كافة القوى السياسية الآن
وخرج البيان اليوم بذلك .. فليس هناك خلاف

مستنيك في التحرير يا هندسة