خليك ايجابي وقول رايك ....

جميل يا بيبو
انا عايزة اروح يوم السبت بس عايزة بجد اروح وانا فاهمة
يا ريت لو حد عنده خبرة في الموضوع دة يشرحلنا
انا شايفة ناس كتيييييييير بتعارض في التليفزيون مش عارفة ليه
ومش عارفة دي مصالح ولا ايه
وبعدين انا سمعت قيادي في الاخوان بيقول ان الاخوان موافقين علي التعديلات دي
وان الاحزاب مش موافقين عليها علشان لسة مش عندهم ارضية في الشارع
انا عايزة افهم علشان لو ما فهمتش مش هروح
بتقري افكاري انت يا بيبو انا كنت عايزة حاجة مفصلة كدة
يا ريت يا جماعة اللي فاهم يفهمنا شوية
احلي تقييم لمديرنا العظيم

حاسس ان التعديلات مقصود بيها استبعاد اشخاص بعينهم
وده مرفوض طبعا .. ( بصرف النظر عن رايي فيهم كاشخاص


طيب هو مين اللي قاصد استاذ حسام
مش اللي بيحط دة مجموعة من القضاة؟؟
مصلحتهم ايه من كدة؟؟
معلش انا رديت مع حضرتك في نفس الوقت

للأسف مش مسموح للى اصغر من 18 سنة انه يقول رأيه
بس الحقيقة انا متفقة جدا مع التعديلات الدستورية الجديدة
و بخالفك شوية يا أستاذ حسام لأنه ممكن اللى معاه جنسية تانية ده يكون عميل و لا حاجة و يودى البلد فى دهيه
و بعدين هو لو كان عنده فعلا انتماء للبلد هيعمل أى حاجة بس علشان نجحها و تقدمها
تسلم ايديك بيبو ... مبادراتك كلها هايله

اقتباس :

معلش انا رديت مع حضرتك في نفس الوقت

يعنى هيا اول مرة يا دكتور ...!!؟؟
احنا محتاجين عسكرى مرور بينى وبينك

اقتباس :

مش اللي بيحط دة مجموعة من القضاة؟؟
مصلحتهم ايه من كدة؟؟

شوفى .. انا طبعا مش باطعن فى القضاة ولا حاجة
وف نفس الوقت انا مش متخصص .. لكن هاقولك اللى جمعته من الاعلام

المجموعة اللى عدلت الدستور - برغم ان فيهم ناس فوق مستوى الشبهات -
لكن كمان لا يعبروا عن كافة الاتجاهات والاراء فى مصر .. ولذلك وضعوا التعديلات دى على خلفية معينة :
1- ارضاء الراى العام
2- تعليمات محددة ببنود محدودة
( صحيح ان المجلس الاعلى اعطاهم صلاحية تعديل اى مواد اخرى تخدم نفس المواد المقصودة )
3- اتجاهاتهم الفكرية
وعلشان كده البعض بيطالب بانتخاب لجنة دستورية لوضع دستور جديد
علشان اللجنة تبقى تمثيل لكل قطاعات الشعب واتجاهاته

على سبيل المثال :
انتى ممكن تقبلى ان الرئيس يكون معاه جنسية تانية وتتبنى وجهة النظر دى
وانا اعترض وادعى ان ف مصر كفاءات لا تحصى .. وهى اولى بالمنصب من حامل جنسية مزدوجة
وهكذا ..
اتمنى يكون قصدى واضح ..

اقتباس :

للأسف مش مسموح للى اصغر من 18 سنة انه يقول رأيه

لو كان بايدى .. كنت اخر لك الاستفتاء مخصوص يا منة

وبالنسبة لاختلافك معايا .. انا بارحب بيه طبعا
انما مفيش اختلاف ولا حاجة

بس انتى فاتك جملة معينة انا كتبتها :

التعديل بيشترط ان لا المرشح ( ولا الوالدين ) يكون معاهم جنسية تانية

وانا باقول : نكتفى ان المرشح بس يكون غير حامل لجنسية اخرى
وكمان اعترضت على انه لا يتزوج من غير المصرى ( سواء كان المرشح راجل او ست )

اقتباس :

لكن ببساطة .. اب وام مصريين .. اوكى
المرشح -فقط- لا يحمل جنسية اخرى .. ماشى حالها

يتجوز بقى مصرية .. يتجوز من جزر القمر .. هو حر

بس .. ده رأيي

شكرا

شكرا ع زوؤك يا أستاذ حسام
بس برده فى نقطة اختلاف و اتفاق
أولا التفاق انه يكون ابويه حاملين جنسية تانية مش مشكلة معاك فى ديه
أما انه يتزوج من غير مصرية برده بتجعل الشبوهات تحوم حواليه زيها زى الجنسية

اممممممممم
فهمت
بس المشكلة بقي
اننا كشباب اغلبنا ما كانش عنده وعي سياسي كافي
علي خلفية ان البعد عن السياسة اسلم
ودلوقت لما عايزين ننزل انتخابات او نقرر مصير بلدنا بنستقي اراءنا وافككارنا
من الاعلام سواء مرئي او مقروء
والمشكلة ان احنا وصلنا لمرحلة للأسف بقينا خايفين من المصالح والاجندات
يعني انا مثلا علشان مش مستريحة للبرادعي
بحس ان اي حاجة بيقولها غلط حتي ولو بيتكلم بطريقة معقولة(ودة غلط جدا(
انا شفت ناس بتقول يا جماعة نعم للتعديلات الدستورية احنا بلدنا بتغرق
والقوات المسلحة لازم تشوف شغلها الاسااسي
لقيت صحيفة اسمها صوت الامة معارضة للتعديلات بشدة لدرجة انهم بيشككوا في الجيش
وبيلمحوا بكدة كتير
انا بقي عايزة افهم حاجة
اللي انا فاهماه ان التعديلات دي مؤقتة وان الرئيس الجديد اول ما يتعين
لازم يتعمل دستتور جديد صح؟؟
ايه علاقة التعديلات دي بصلاحيات الرئيس
اصلي سمعت دكتور البرادعي بيقول ان التعديلات دي هتخلي في دكتاتورية في الحكم وهتوسع
صلاحيات الرئيس؟؟
طيب لو رفضت التعديلات ايه اللي هيحصل؟؟
ودة هيضر البلد من وجهة نظر المؤيدين ازاي؟؟

انا معاكى تماما يا آية .. حالة التردد والتشتت واسعة فعلا

واحنا طبعا بنركز على الاعلام - علشان كل العقول والمفكرين والمتخصصين بيطلعوا ويعرضوا اراءهم -

ومعاكى اننا ماكناش سياسيين واغلب الشباب كان عازف عن السياسة
منه لله اللى كان السبب .. ونحيي الثورة اللى عملت قفزة واسعة ف الاتجاه ده

طيب واحدة واحدة لان الموضوع فيه تفاصيل كتير :

سلطات رئيس الجمهورية :
هو الوحيد اللى يملك عرض تعديل الدستور - بموافقة تلت اعضاء مجلس الشعب المنتخبين
وهو القائد الاعلى للقوات المسلحة
وهو القائد الاعلى للشرطة والشعب
وهو اللى يملك اقالة الوزارة وتكليف غيرها
وهو القادر على فرض حالة الطوارئ والغاءها
وهو اللى بيعين شيخ الازهر
وهو اللى بيعين النائب بتاعه
وهو الحاكم العسكرى
وهو ...
وهو ....

علشان كده مبارك ف اول وتالت خطاب اتك على جملة :
( بموجب السلطات التى خولها لى الدستور )

واضح انه كان عقد ملكية .. مش مواصفات وصلاحيات رئيس دولة

==========

اقتباس :

اللي انا فاهماه ان التعديلات دي مؤقتة وان الرئيس الجديد اول ما يتعين
لازم يتعمل دستتور جديد صح؟؟

صح كده .. بس مع ملاحظة ان مفيش حاجة تلزم الرئيس الجديد بعمل دستور جديد
ده نداء من الراى العام موجه للرئيس الجديد .. انما لا الدستور القديم ولا التعديلات فيها حاجة تفرض عليه ده

وانما المادة اللى بتتكلم عن عمل دستور جديد .. بتقول :
لرئيس الجمهورية الحق فى طلب دستور جديد ........

يعنى ده اوبشن للريس .. مش الزام عليه ولا حاجة
والتعديلات الدستورية .. ما فرضتش عليه انتخاب لجنة تأسيسية
===============

اقتباس :

طيب لو رفضت التعديلات ايه اللي هيحصل؟؟

هاتحرجى المجلس الاعلى شوية
وهايضطر الى الدعوة لانتخاب لجنة تأسيسية لوضع دستور جديد
وده طبعا فيلم طويل ..
اولا : الانتخابات ف الظروف الحالية خطر شوية
ثانيا : عامل الوقت .. على ما ننتخب لجنة وبعدين سعادتها تعمل دستور جديد
وبعدين نفكر ننتخب ريس الاول والا مجلسى شعب وشورى

بعد ده كله .. تكون مصر خربت ( بلطجة - واعتصامات - وتحزبات - وفتن طائفية )

كفاية كده .. انا طولت قوى

طيب انا كدة احترت اكتر !!
طيب انا عايزة اسأل حاجة بالنسبة للمادة 99
بتاعة الحصانة
دي نظامها ايه
دي بالنسبة ليا من اهم المواد
انا شايفة ان عضو مجلس الشعب زيه زي اي مواطن
ليه يبقي عنده حصانه نفسي افهم
بيتهيألي لو شالوا الحصانة هيبقي معظم مرشحي مجلس الشعب نازلين فعلا يخدموا
ولا ايه؟؟

معاكى حق طبعا

بس فيه حاجة انتى مش واخدة بالك منها ..
المفترض ان مجلس الشعب ده هو السلطة التشريعية
والمفترض ( نظريا ) انه يراقب الحكومة ويملك حق استجواب الحكومة ..
لاء وايه ؟؟ ومحاسبتها كمان

وبجملة الافترضيات .. المفروض نحميه من السلطة التنفيذية اللى هي تحت امر الحكومة ...

الواقع بقى - اللى كان - بعيد عن الفرضيات

ان الحصانة غاية ومكسب ... اومال النواب يتاجروا ف العملة والسلاح والمخدرات ازاى ؟
سبحان الله ... طيب وشركاتهم ومصالحهم واكل عيشهم .. تمشى ازاى من غير حصانة تحميهم

الا من رحم ربى

اعتقد كده انا جاوبت على الهدف من الحصانة .. الهدف المفترض ليها

حماية النواب من السلطة التنفيذية ( الداخلية يعنى والحكومة عموما )

لضمان حريتهم ف التعبير عن رايهم .. اللى هو افتراضيا بيعبر عن الشعب

شكراااا يا بيبو جداااا على الموضوع الحلو دا



انا قريت ردود احلى اصحاب على عجل..

وان شاء الله اتناقش معاهم فيها

بس اشارك برأيي الأول عشان تناقشوني فيه انتوا كمان

أولا: بالنسبة لشرط الجنسية زي ما قال الباشمهندس حسام.. فعلا انا حسيت انه معمول عشان استبعاد شخصيات معينة

اللي هم البرادعي وزويل وما إلى ذلك

ثانيا : بخصوص الزوجة الاجنبية.. انا حاسة انهم عملوه لانهم عارفين الدور المهيمن للسيدة الاولى.. زي الست سوزان كده

طيب ليه مقيدوش عملها في القانون.. ومنعوها انها تمارس اعمال سياسية ويقتصر دورها في الناحية الاجتماعية فقط؟؟؟
برضه صعب.. فقالوا خلينا في المنتج المصري أضمن

في حاجة بقى انتوا مش واخدين بالكوا منها..

انتوا فاكرين ان المادة دي بتحرم "حامل " الجنسية بس؟؟؟؟؟؟؟ لا النص قال "حمل" والفعل هنا في الماضي.. يعني بتعني من حمل الجنسية أخرى في أي وقت وفي أي زمان سابق.. هو ووالديه.. وزوجته.. ولو الجنسية للوالدين وانتقلت اليه هايتحرم طول العمر هو واولاده كمان..!!! طيب ازاي كده..

دا بالنسبة لشرط الجنسية....

وعلى فكرة.. الألفاظ في القوانين هي اللي بتحدد أثرها.. لا مجال للنواياا أبدا.. خصوصا لو اللفظ كان صريح كده
::::::::::::::::::

تاني حاجة.. المادة الخاصة بشروط الترشح..

لم يساوي بين المرشح المستقل والمرشح العضو في حزب..

انتوا عارفين ان ممكن مرشح يدخل البرلمان لو 1000 بس انتخبوه؟؟ حسب عدد الناخبين في الدايرة..يعني للو انت مستقل هاتلف تلم في 30000 توقيع.. في حين اللي قدامك عشان اخد مقعد في البرلمان بـ 1000 صوتهايترشح وهو مطمن ومرتاح..

انا مش معترضة على العدد.. لكن معترضة على عدم المساواة الفظيع دا!!!

::::::::::::

تالت حاجة..مدة فترة الرئاسة.. جميلة جداا وموافقة عليها

وإن كان البعض متخوف من امكانية عودة الرئيس مرة اخرى بعد انتهاء مدة رئاسة خلفه.. ومن أن تؤدي إلى اتفاقات خفية ووجود "محلل"

لكني مش مع التخوف دا.. لان ان شاء الله الانتخابات هاتبقى نزيهة..ولو ماثبتش جدارته لو عمل ايه مش هايرجع للحكم تاني

:::::::::::::::

رابع حاجة....الاشراف الكامل على الانتخابات

تمام انا موافقة عليها

لكن برضه كان لازم تراعى الالفاظ اكتر من كده
لان كلمة اشراف كلمة عامة اوي بسمح بالالتفاف حولها ..

بس نعتبرها سهو يمكن تداركه ومش بالاهمية دلوقتي

:::::::::::::::::

خامس حاجة... الفصل في صحة عضوية مجلس الشعب

طول عمرنا نسمع جملة سيد قراره.. عشان المجلس كان بيتحكم في الفصل في مدى صحة عضوية اعضائه!!

جه التعديل بيقول ان المحكمة الدستورية هي اللي بتفصل في الكلام دا (وعلى فكرة المجلس الاعلى للقوات المسلحة اصدر قرار - منفردا - بتحويل الاختصاص لمحكمة النقض)

والطبيعي ان اي حكم في الدنيا بيبقى نافذ من تاريخ صدوره.. لا بيحتاج نشر ولا اعلان في جريدة..
التعديلات بقى الزمت المجلس بالاحكام.. لكن من تاريخ اخطار المجلس بالحكم..! طيب لييييه؟؟؟ طيب ماهي دي تعتبر مماطلة.. لان الحاجات دي بتاخد وقت كبيييييير جداااا.. ناهيك عن اللي بيحصل في الحاجات اللي زي دي..والجدل الفقهي.. اللي بيدور حول تحديد وقت الاخطار.. هل بارساله.. ام باستلامه؟؟ ام أم.. طيب وليه كل دا؟؟ طيب ما نعيد الامور لنصابها!!!!

::::::::::::::::

سادس حاجة..... تعيين نائب

التعديلات قالت.. يعين نائب خلال 6 شهور من تاريخ توليه منصبه.. لحد كده تمام.. بس بعد كده قال" فإذا اقتضى الحال (يعني بحسب وجهة نظر الرئيس)اعفاؤه من منصبه وجب تعيين غيره "(وساب المدة من غير تحديد).. ما ينفعش طبعا نجتهد ونقول ان يمكن قصده نفس المدة اللي فاتت.. لاننا قلنا اللغة في القانون هي الملك.. هي الفيصل.. ولا تفسير مع صراحة النص..!

مش فارقة معايا المادة دي دلوقتي برضه.. لكن حبيت انوه عن الثغرة اللي فيها..

::::::::::

سابع حاجة... مكافحة الارهاب

ودي اكبر زغرووووووطة عشان اتلغت الحمد لله

::::::::::

تامن حاجة..... اعلان حالة الطوارئ (أن أن آآآآآن)

التعديل اعطى لرئيس الجمهورية الحق منفردا (برضه) في اعلان الطوارئ..

وسابه بقى من غير معيار واضح يحدد ايه هي حالات الطوارئ الممكنة
وسابه من غير ما يقوله انها ماينفعش تبقى في جميع انحاء الجمهورية

المهم انه الزمه بعرض الاعلان دا (اعلان حالة الطوارئ )على مجلس الشعب عشان يقرر استمرارها من عدمه

ولو المجلس مش منعقد.. يدعوه للانعقادد خلال 7 ايام

لكن المشكلة بقى لو كان المجلس منحل. هانستنى لحد الدورة البرلمانية الجديدة.. يعني انتخابات وترشيحات.. كل دا في ظل الطوارئ

والمشكلة الاكبر.. ان مفيش اي تقييد على حرية الرئيس في حل البرلمان.. يعني ممكن يعلن حالة الطوارئ وبعدها يحل البرلمان.. ونفضل عايشين في طوارئ (تاني)

::::::::

تاسع حاجة... تعديل الدستور..

ضمانات كويسة وكل حاجة.. بس في غموض لغوي فظيع ممكن يتفسر بكذا شكل..

ودا ممكن اصلاحه بشئ من اليسر مش صعب..

::::::::::::::::

انا اما قلت الكلام دا لبعض الناس.. افتكروني من الثورة المضادة..!!!! واني عاوزة ابوظ الدنيا

ومصدقونيش.. وافتكروني بألف الكلام دا..

لكن الكلام دا نتيجة بحث وانصات للعديد من وجهات النظر الفقهية القانونية..

وكتير من كلامهم اقتنعت بيه لان حجته كانت قوية وبتعتمد على النصوص والسوابق وليس الاراء الشخصية

طبعا انا حبيت اشارككوا العلم اللي ربنا بعتهولي.. ولكم القرار الاخير امام ورقة الاستفتاء

جزاك الله كل خير يا بيبو وأسفة على الاطالة

اللهم صلي عالنبي
اللي بيتكلم دا بيبو ؟؟؟؟؟؟؟؟؟؟؟؟؟؟
ع فكرا يا بيبو انت غيرت رايك مش انت اللي كنت فالتحرير
ومع المظاهرات ومش راضي بالامان بس وليكم مطالب
جاي انهردا تقول :_

اقتباس :

عاوزين يكون في استقرار باي طريقة او بشكل اخر عايزين نلهي الناس
في انتخابات واستفتاءات عن المظاهرات والاعتصامات

منتهي التناقض
فاكر لما كنت بتعارض كل اللي قالوا كدا
فاكر لما قولتك ان امي وابويا عاوزين امان بس
وكانوا معارضين وانت كنت مع المظاهرات لاخر لحظه
_(

اقتباس :

يقولوا الحزب الوطني والاخوان هييجوا

الوطني مش هيرجع
بس الحزب بقي اللي مأهل نفسه كويس هما الاخوان
ولعلم سيادتك الاخوان مابيخدموش الا نفسهم
ودي عن تجربه بقي _اننا مرة اتخبنا واحد منهم ورحناله بطلب صغير
والطلوب ان في بنت يتيمه وليها اخين وعاوزين بس فلوس يبنوا ارض
واحد اتبرعلهم بيها ...بس كان زي خبتها بالظبط مجبشي ولا شلم
حسبي الله ونعم الوكيل فيه ويجيوله يوم وان شاء الله يبقي زيهم محروم ويتيم
_
الدستور حاليا زي مابيقولوا كدا بيت اايل للسقوط
ولازم يتهد ويتبني من جديد
_
الدستور لو اتعدل مافيش حزب مؤهل حاليا ومستعد
غير الاخوان اللي انا بكرهه
وملوش لازمة وبتاع مصلحته ومابيفدشي حد

اختلاف اراء بقي

ياسمينا جايبة الشومة بتاعتها وجاية
حاسب علي راسك يا بيبو
ههههههههه
................
يا جماعة لولا اختلاف الآراء لبارت الدساتير
عامة في الكلية النهاردة الجماعة السلفية وزعت علينا منشور الجماعة السلفية بشأن الدستور
وهما بيحثوا الناس علي التصويت بنعم
وذاكرين الاسباب وان ان شاء الله هحاول انقله هنا علشان الناس يبقي قصادها كل الأراء

ولا شومة ولا حاجه يا اية
بس استغربت جدااااااااااا لما شوفت كلام بيبو بالتناقض ده

هما لازم يوزعوا منشورات بقولة نعم
وكمان عربيات بتلف يا ايها الناس يا معشر قريش بالله عليكم
استحلفكم بالله قولوا نعم
واكتر م كدا كمان
محتارين يعملوا ايه ولا ايه

_
بصراحه متناهية
مابحبش الاخوان دول خاااااااااااااااااااااالص
وانا ضدهم حتي لو غلط

اقتباس :

محتاج استقرار وده متفق عليه

ومين قال ان الدستور الجديد هخلي الدنيا فوضي
بالعكس بقي احنا لازم نكمل للنهايه مرة واحده
احنا خلعنا الرئيس وحلينا الحزب الوطني وبنحاول نحاكم اصحابه
وكمان مابقاش في امن دوله بالمرة بقي نجيب دستور جديد
مش كدا ولا ايه
وابقي عيش بقي فالامان المتناهي وبدل مانعطل الدوله مرتين
خليها بقي مرة واحده وبالمرة
_

اقتباس :

احنا نقعد تحت رحمة الاحزاب

ايوة نقعد تحت رحمتهم ليه لا
طلاما هيخدمونا احنا
مش زي الحزب اللطيف اللي بيخدم نفسه

اقتباس :

داخلة تردي على ردي

اقولك ليه رديت ع ردك
لاننا بقالنا سنييييييييييييين هنا ومش اعرف من امبارح
وعمري ماتوقعت ان يكون دا كلامك ابدااااااااااا
اندهشت جدا

اقتباس :

واعتقد التعديلات اولى اننا نتكلم عليها

لا الاولي نجيب جديد ولا نعدل ولا غيرو

انا مش شايفة مشكلة خالص ياسمينا وبيبو
فعلا هي وجهات نظر
كل واحد في النهاية هيروح بكامل حريته يحط صوته من غير ما حد يغصبه علي شيء
يعني انا مثلا قد ايه اختلفت مع بيبو ايام الثورة ويمكن بعدها كمان
لكن دلوقت انا رايي لغاية دلوقت اني هصوت بنعم الا اذا لقيت اللي يقنعني بغير كدة
مش مهم مين كان رأيه ايه وغيره ليه
المهم اننا لنا الحرية في التعبير عن اراءنا
انا متفقة معاكي يا ياسمينتي في موضوع الاخوان
بس خلي بالك انهم اصحابنا وقرايبنا وجيراننا ومهما اختلفنا معاهم في وجهات النظر
مش لازن نقول اننا بنكرههم او مش بنطيقهم انتي لو دورتي حواليكي هتلاقي منهم ناس كتير انتي بتحبيهم
الفكرة بقي ان رايهم وسياساتهم مش عاجبانا
دي حاجة تانية احنا دلوقت احرار وبنتكلم ونعبر نصوت بحرية
وان شاء الله كلنا هنقول اللي احنا عايزينه وربنا هيعمل اللي هو عايزه واللي ان شاء الله يكون خير لبلدنا ولينا
وما تقلقيش من الاخوان يا ياسمين
احنا اللي بايدينا نرفعهم او ننزلهم
شعبيتهم قلت قوي من وجهة نظري
وزي ما قيل قبل كدة لو نجحوا بنزاهة يبقي دة حقهم واحنا ديمقراطيين ليه نحرمهم من حقهم

بيان الدعوة السلفية

تحث الدعوة السلفية جموع الشعب المصري عامة وابناءها خاصة علي المشاركة والتصويت بالموافقة علي التعديلات الدستورية المطروحة للاستفتاء يوم السبت القادم وذلك بناء علي ان في هذه المشاركة الايجابية اعمالا لما تقرر في الشرع الشريف من السعي في تحصيل المصالح وتقليل المفاسد قدر الامكان

وان الدعوة السلفية رغم يقينها بان الاصلاح الحقيقي هو في الالتزام الكامل بشرع الله المتضمن لكل خير والناهي عن كل شر تبني موقفها من التعديلات الدستورية المطروحة للاستفتاء علي النقاط التالية:

1- تضمنت التعديلات ايجابية كبري في عدم التعرض للمادة الثانية من الدستور التي تنص علي ان دين الدولة هو الاسلاموعلي مرجعية الشريعة الاسلامية رغم وجود اصوات عدة منذ بداية الثورة لتعديلها ولا نشك ان حملة الدعوة لعدم المساس بها كان لها كبير الاثر في عدم التعرض لها وان كنا ننبه الي ان اضافة المادة (189) مكرر الخاصة باعداد مشروع دستور جديد من خلال جمعية تأسيسية منتخبة من اعضاء مجلسي الشعب والشوري المنتخبين قد يطرح من خلالها تعديل هذه المادة ومن اجل ذلك كان تحفظنا عليها فاننا نعلن استمرار حملة التوعية بحقيقة التعديلات التي يطالب بها البعض من الغاء هذه المادة بما يجعل الشريعة الاسلامية في المرتبة الاخيرة كمصدر للتشريع او تعديلها حيث يجعلها مساوية لغيرها من مصادر تشريع اخري وكل هذا يتعارض مع عقيدة كل مسلم المأخوذة من القرآن الكريم (ان الحكم الا لله ) (يوسف : 40) (ومن احسن من الله حكما لقوم يوقنون ) (المائدة :50)

2- تضمنت التعديلات ايجابية عظيمة في الغاء المادة (179) الخاصة بمكافحة الارهاب والتي كانت سيفا مصلتا علي العمل الاسلامي برمته

3- تضمنت التعديلات تحديد مدة حكم رئيس الجمهورية بدتين رئاسيتين كل منهما اربع سنوات ولا شك ان هذا يعد في ظل الظروف الراهنة وموازين القوي الداخلية والاقليمية والعالمية نقطة ايجابية نسبيا اي بالنسبة للوضع السابق الذي كان يسمح باستمرار السلطة الي مدة غير محددة مما يؤدي الي تسلط الطغاه والظلمة وجمع كل الصلاحيات والسلطات في ايدي حفنة من اتباعهم يتمكنون بها من انواع من الفساد لا يحصيها الا الله هذا رغم علمنا ان نظام الحكم الاسلامي لا يحدد مدة معينة للخليفة لكن هذا النظام القائم ليس نظاما لخلافة اسلامية حتي يطالبنا البعض بتطبيق الاحكام الشرعية الخاصة بالخلافة عليه بل هو نظام رئاسي جمهوري هو المتح الممكن حاليا وان لم يكن هو المطلوب شرعا

4- تضمنت التعديلات نقاطا ايجابية في مسائل الاشراف القضائي علي الانتخابات لضمان نزاهتها واختصاص المحكمة الدستورية العليا بالفصل في صحة عضوية اعضاء مجلس الشعب والزام رئيس الدولة بتعيين نائب له ولزوم عرض اعلان الرئيس حالة الطواريء علي مجلس الشعب خلال سبعة ايام وعدم تجاوز مدة حالة الطواريء سبعة اشهر الا باستفتاء شعبي وجملة من اجراءات تسمح بالترشح لرئاسة الجمهورية للمستقلين وهي وان كانت لا تنص علي الشروط الشرعية المعتبرة في هذه الامانة العظيمة الا انها نسبة الي الوضع السابق افضل بكثير من استمرار الطغاة واعوانهم في احتكار السلطة

لكل ما سبق تطلب الدعوة السلفية من جموع الشعب المصري عامة ومن ابناء الدعوة خاصة المشاركة في هذا الاستفتاء كخطوة اولي نحو مشاركة سياسية فعالة وايجابيةالجمعية التأسيسية التي ستنتخب وانا بالنسبة الي باقي اوجه الشاركة السياسية فلا تزال مطروحة للبحث والمشاورة بين اهل العلم والدعاة



دة كان موجود في الورقة اللي وزعوها علينا في الكلية