عزومات رمضان

السلام عليكم ورحمه الله وبركاته
ازيكووووووووا يااحلى اصحاب يارب تكونوا بخيررر
النهادره جيبالكوا فكره موضوع جديد وهى عباره عن انى كل يوم هدخل اكتب لكم طريقه عمل اكلات جديده او طريقه عمل العزومه كلها يعنى العصائر والطبق الرئيسى و السلطات والحلو وكمان ويااارب الفكره تعجبكوووووا

جنــــــــــــــــــــــات

واول عزومه كالاتى

المقادير:-

• 1/2 لفة قمر الدين مقطعة قطعاً صغيرة
• 1/2 كوب مشمش مجفف
• 1/2 كوب سكر
• 3 أكواب مية
• مكعبات ثلج "اختياري"
الطريقة:-

انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كأسات العصير وضيفي إليه مكعبات الثلج.

فيه بنات كتير مش بتحب إنها تاكل الخضار المطبوخ، ودي حاجة غلط جداً خصوصاً مع الصيام طول النهار...

فإيه رأيك لما تتغلبي على المشكلة دي وتعملي طبق شوربة خضار، وعلى فكرة الطبق ده طعمه حلو جداً، وكمان خفيف على المعدة في رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل اللي ممكن يفقدها بسبب الصيام، ودي أسهل طريقة لعمل شوربة الخضار...
المقادير:-

• 1/4 كيلو بسلة
• 1/4 كيلو فاصوليا خضراء
• 2 حبة جزر مقطعة مكعبات متوسطة الحجم
• 2حبة بطاطس مقطعة مكعبات متوسطة الحجم
• 2 حبة كوسا مقطعة مكعبات متوسطة الحجم
• 1/2 كوب شعرية
• معلقتين سمنة
• معلقة ملح وفلفل
• شوربة فراخ أو لحمة
• مكعب مرقة دجاج "اختياري"
• حزمة بقدونس مقطعة قطع صغيرة "للتجميل"
• عصير ليمونة "اختياري"
الطريقة:-

1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة.
2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي.
3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة" وسيبيهم على النار لمدة ربع ساعة أو لغاية ما الشوربة تغلي، بعد كده هدي نار البوتجاز وسيبيها لمدة ربع ساعة أو لغاية ما تلاقي الخضار استوي اطفي البوتجاز، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون.

اخترنا لك النهارده طبق سلاطة الزبادي لأن ده أنسب حاجة للطبق الرئيسي اللي هنعمله النهارده ...
المقادير:-

• 3 فصوص ثوم مدقوق
• علبة زبادي
• ورقة نعناع جافّ أو أخضر
• خيارة مقطعة قطع صغيرة جداً أو مفرومة
• معلقة زيت ذرة
• معلقة فلفل أسود + معلقة ملح + معلقة كمون
الطريقة:-
حطي علبة الزبادي فى طبق السلطة، وضيفي إليها الثوم المدقوق والخيار والملح والزيت والفلفل الأسود والكمون، وقلبيهم كلهم مع بعضهم كويس، وزيني أطراف الطبق بالنعناع أو رشي على الطبق أوراق النعناع.

البط من الأطباق المشهورة جداً في المطبخ المصري واللي كل المصريين بيحرصوا على وجوده على مائدة الإفطار في أول يوم رمضان، وفيه أكتر من طريقة لعمل البط بس إحنا النهارده اخترنا لك الطريقة دي...
المقادير:-

• 1/2 كيلو فريك
• 1حبة طماطم مقطعة قطع صغيرة جداً
• 2 معلقة كبيرة زبدة
• 3 معالق كبيرة زيت عباد الشمس
• 3 بصلات مقطعة قطع صغيرة
• 3 حبات بطاطس مقطعة قطع صغيرة
• ملح وفلفل وبهارات
• 3 بصلات مقطعة شرائح
• ورق لاورو
• 3 أكواب مية دافية
• 1كوب كبير دقيق
• عصير ليمونة

الطريقة:-
1- هاتي الفريك واغسليه كويس وبعد كده حطيه في المصفاة.
2- هاتي حلة وحطي فيها الزبدة والزيت وحطيهم على النار لغاية ما يسخنوا، وبعد كده ضيفي إليهم الفريك مع التقليب المستمر لغاية ما الفريك لونه يبقى ذهبي.

3- لما تلاقي إن الفريك لونه بقى ذهبي ضيفي إليه الطماطم المبشورة والبصل والبطاطس والملح والفلفل والبهارات، وشوحيهم على النار لمدة 10 دقائق مع التقليب المتسمر بس خدي بالك إن النار تكون هادية.
4- هاتي البطة ونظفيها كويس من جوه ومن بره واغسليها بالمية وبالملح والدقيق والليمون وبعد كده اغسليها بالمية وبعد كده حطيها في المصفاة علشان تصفي كل المية اللي فيها.

5- بعد كده هاتي شوكة واغرسي بيها جسم البطة في أماكن مختلفة بعد كده ادهني قلب البطة بالملح والفلفل وابدئي في حشو قلبها بخلطة الفريك.
6- هاتي صينية الفرن وادهنيها سمنة وحطي فيها شرائح البصل المتبل بالملح والفلفل وورق اللاورا، وحطي عليهم البطة ورشي الملح والفلفل والبهارات على سطح البطة.
7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة.
8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص.
9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر.
10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس.

زي ما قمر الدين والبط المحشي من الأكلات الرئيسية على السفرة المصرية في مصر، كمان طبق الكنافة من الأطباق الرئيسية اللي بتلاقيها موجودة في كل بيت في رمضان، ومش محتاجة إني أفكرك إنك بلاش تعملي أكتر من صنف حلويات كفاية صنف واحد بس وتعمليه على قد أفراد أسراتك أو على قد عدد أفراد العزومة علشان ما فيش حاجة تفيض وتترمي.
المقادير:-

• 1/ 2 كيلو كنافة
• 1/ 4 كوباية زيت ذرة
• 1/ 2 كوباية زبدة أو سمنة
• 1/ 4 كوباية عين جمل أو جوز من غير قشرة
• 1/ 4 لوز من غير قشرة
• 1/ 4 كوباية بندق من غير قشرة
• 1/ 4 كوباية فستق من غير قشرة
• 1/ 2 كوباية زبيب

مقادير الشربات:

• 1/ 2 كوباية سكر
• 3/ 4 كوباية مية
• عصير ليمون
• فانيليا.

طريقة عمل الشربات:-

حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.

طريقة عمل الكنافة:-

1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.
2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها.
3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.

4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.
5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق.

الله ايه الاكل ده حرااااام عليكى انا صايمه دلوقتى انتى جوعتينى اكتر ما انا جعانه
مش هتعزمينى بقى فى العزومه دى ولا ايه

هههههه ياعينى معلش بقى ولسسسسسسسسه
بس اكيد انتى مش محتاجه عزومه ودى عزومه النهارده


فيه ناس كتير بيحبوا إنهم يفطروا على البلح بالتمر، علشان كده جبنا لهم النهارده أحسن طريقة لعمل اللبن بالتمر وعلى فكرة كوب التمر باللبن دي مفيدة جداً جداً للجسم.
المقادير:-
• كيلو لبن
• 5 معالق سكر "اختياري"
• 1/4 كيلو بلح منزوع النوى ومقشر
• 1/2 معلقة فانيليا أو نص معلقة قرفة "اختياري"
الطريقة:-
1. انقعي البلح لمدة خمس ساعات في مية وبعد كده قشريه.
2. هاتي كوب كبيرة وحطي فيها اللبن البارد وضيفي ليه البلح والسكر وقلبيهم مع بعض كويس، وبعد كده ضيفي إليهم نصف معلقة الفانيليا أو نصف معلقة قرفة، وقلبيهم كلهم مع بعضهم كويس وبعد كده صبيهم في الكوبايات.

المقادير:-

• كوب لبن
• كوب شوربة فراخ أو لحمة
• بصلة متوسطة مقطعة قطعاً صغيرة جداً
• 1/4 كيلو بسلة
• 3 أكواب مية
• 1/2 1 معلقة كبيرة زبد
• معلقة كبيرة دقيق
• 1/4 حزمة بقدونس مقطعة قطع صغيرة
الطريقة:-

1. هاتي البسلة واسلقيها كويس في المية لمدة ربع ساعة بعد ما تلاقيها استوت اطفي البوتجاز وصفيها من مية السلق وسيبيها لغاية ما تبرد.

2. حطي البسلة في الخلاط وضيفي إليها ربع كوب مية واضربيها في الخلاط كويس علشان تنعم، وبعد كده صفيها بمصفاة دقيقة.

3. هاتي حلة وحطي فيها الزبدة وبعد كده ضيفي إليها البصلة وقلبيها كويس لغاية ما لونها يبقي ذهبي.. بعد ما تلاقي إن لون البصلة بقى ذهبي ضيفي إليها الدقيق وباقي الزبدة، واستمري في التقليب لغاية ما الدقيق يبقى لونه ذهبي.

4. بعد ما تلاقي إن الدقيق لونه بقى ذهبي ضيفي إليه اللبن بالتدريج مع التقليب المستمر، وبعد كده ضيفي ليه المرقة والملح والفلفل والبسلة وقلبيهم كويس مع بعض، وسيبيهم مع بعض لغاية ما يغلوا وبكده إنت عملتي شوربة البسلة وقبل أذان المغرب بربع ساعة سخنيها تاني وصبيها في أطباق الشوربة.

على فكرة ممكن إنك تضيفي شوية مية أثناء الغليان ده في حالة لو لقيتي إن الشوربة سمكية زيادة عن اللزوم.

المقادير:-

• 4 ثمرات بطاطس مسلوقة ومقطعة مكعبات
• 1/2 حزمة بقدونس مقطعة قطعاً صغيرة
• 1/4 حزمة كرفس مقطعة قطع صغيرة
• بصلة مقطعة قطع صغيرة
• فصين ثوم مدقوقين ناعم
• معلقة صغيرة فلفل
• معلقة صغيرة ملح
• ثمرة طماطم مقطعة قطع صغيرة
• قرن فلفل أحمر مقطع قطع صغيرة
الطريقة:-

اخلطي كل المقادير مع بعضها وحطيها في طبق السلطة.


المقادير:-

• كيلو ريش بتلو، أو ريش ضأن
• بصلة كبيرة مقطعة شرائح
• 1 ثمرة فلفل أخضر صغيرة مقطعة قطع صغيرة
• 2 معلقة كبيرة عصير ليمون
• 1/2 كوب بسلة
• 3 ثمرات جزر
• 3 ثمرات بطاطس
• حزمة روزماري
• 1 معلقة كبيرة بهارات
• 1/2 كوب مية مغلية
الطريقة:-
1. قطعي أوراق الروزماري، واخليطها بالفلفل الأخضر وعصير الليمون والملح والفلفل وقلبيهم مع بعض كويس وضيفي إليهم الريش وقلبيهم كلهم مع بعض وسيبيهم لمدة 3 ساعات علشان اللحمة تتبل كويس.
2. بعد مرور الـ 3 ساعات هاتي صينية الفرن وحطي فيها شرائح البصل ورصي من فوقها الريش، وضيفي ليهم باقي الخليط السابق اللي إنت عملتيه.
3. شغلي البوتجاز على نار متوسطة، وحطي الصينية على النار، وسيبيها لمدة 1/ 2 ساعة أو لغاية ما اللحمة تخرّج المية الموجودة فيها وتشربها تاني مع التقليب من وقت للتاني.
4. لما تلاقي اللحمة شربت المية بتاعتها ضيفي ليها 1/2 كوب مية مغلية وغطي الصينية وسيبيها على النار لمدة ساعة ونص كمان أو لغاية ما تلاقي إن اللحمة استوت.
5. بعد مرور ساعة من وجود اللحمة على النار اسلقي البسلة وقطعي الجزر والبطاطس قطع كبيرة، وضيفيهم إلى اللحمة بعد ساعة من مدة طهي اللحمة سيبيهم على النار لغاية ما الاتنين يستووا.
6. بعد ما اللحمة والخضار يستووا اغرفيهم في أطباق التقديم، ممكن مع الطبق ده إنك تعملي طبق رز أبيض أو طبق مكرونة.


المقادير:-

• 1/2 كيلو قطايف عصافيري "صغيرة"
• كوب بندق مجروش
• كوب لوز مجروش
• كوب سوداني مجروش
• 1/2 كوب سكر
• 1 معلقة كبيرة ماء زهر أو ماء ورد
• زيت للقلي
• شربات
الطريقة:-
1. هاتي طبق واخلطي فيه البندق واللوز والسكر، وضيفي ليهم ماء الزهر أو الورد.
2. هاتي القطايف واحشيها معلقة كبيرة من خليط المكسرات اللي عندك، خدي بالك إن الحشو ده يكون في وسط قرص القطايف، واقفلي قرص القطايف بالضغط عليه بإديك، وخدي بالك إنك تتأكدي من عدم وجود أي حشو ظاهر.
3. بعد ما تخلصي حشو القطايف كلها هاتي طاسة وسخني فيها الزيت كويس، وبعد كده اقلي القطايف على درجة حرارة متوسطة، لغاية ما تلاقي إن لون القطايف بقى ذهبي شيليها من الزيت وحطيها في الشربات، وبعد كده طلعيها من الشربات وحطيها في مصفاة علشان تتخلصي من الشربات الزيادة، وبعد كده حطيها في طبق الحلويات.

ودي كمان طريقة عمل شربات القطايف..

مقادير الشربات:

• 1/2 كوب سكر
• 3/4 كوب مية
• عصير ليمونة
• فانيليا

طريقة عمل الشربات:

حطي السكر والمية كلهم مع بعض في إناء على نار هادئة لمدة ربع ساعة، وبعد كده ضيفي الليمون وسيبيه لمدة 5 دقائق لغاية ما يغلي، وحطي الفانيليا وشيليه من على النار وسيبيه لغاية ما يبرد.

احلى عزومه من احلى جنااااااااات

بصراحه احنا مش بنعمل كده خالص

بس انا استفدت كتيييييير
مرسي يا قمرر

وااااااااااااااااااااااااااااااااو فكرة روووووووووووووووعة وخاصة الواحد بيكون محتار يعمل إيه كل يوم

موضوع مميز جنات

رشا كتب:

احلى عزومه من احلى جنااااااااات

بصراحه احنا مش بنعمل كده خالص

بس انا استفدت كتيييييير
مرسي يا قمرر

ميرسى لمرورك ياسكررررر وكويس انك استفدتى

a white rose كتب:

وااااااااااااااااااااااااااااااااو فكرة روووووووووووووووعة وخاصة الواحد بيكون محتار يعمل إيه كل يوم

موضوع مميز جنات

اى خدمه روووز وكل يوم ان شاء الله اجيبلك اكلات جديده
وميرسى لمرورك ياقمررر وميرسى للتميز واحلى تقييم

ودى عزومه النهارده


المقادير:-
• 5 ثمرات موز مقطعة قطعاً صغيرة
• عصير 3 برتقالات
• 3 ثمرات جوافة مقطعة قطعاً صغيرة
• 1 ثمرة كيوي مقطعة قطعاً صغيرة
• مانجة مقطعة قطعاً صغيرة
• ربع كيلو فراولة مجمدة
• عصير ليمونة
• كوب كبيرة مية باردة
• مكعبات تلج
• نص كوب سكر

الطريقة:-
اخلطي كل المقادير دي مع بعضها، وبعد كده حطيها في الخلاط واضربيها مع بعضها كويس، صبيها في كاسات العصير وضيفي ليها مكعبات الثلج..

المقادير:-
• 1/2 كيلو مكرونة لسان عصفور
• 3 أكواب شوربة فراخ أو لحمة
• 1/2 كوب لحمة معصجة
• ملح + فلفل
• 2 حبة حبهان
• 1/2 كوب سمنة
الطريقة:-
1. هاتي حلة وسخّني فيها السمنة، وبعد كده ضيفي إليها لسان العصفور مع استمرار التقليب لغاية ما لون لسان العصفور يبقى ذهبي..
2. لما تلاقي إن لسان العصفور بقى ذهبي ضيفي ليه شوربة الفراخ أو اللحمة، واللحمة المعصجة والملح والفلفل والحبهان وقلبيهم مع بعض، وسيبيهم على النار لغاية ما الشوربة تغلي..
3. بعد ما الشوربة تغلي هدي نار البوتاجاز، وغطي عليها، وسيبيها لمدة ربع ساعة لو لغاية ما لسان العصفور يستوي ممكن أنك تضيفي شوربة تاني إذا لزم الأمر.
4. بعد ما لسان العصفور يستوي اطفي البوتاجاز وحطيه في أطباق الشوربة.

المقادير:-

• معلقة صغيرة ملح
• 1/2 حزمة بقدونس مقطعة قطعاً صغيرة
• 4 جزرات متوسطة الحجم
• 2 فصّ ثوم
• 1/4 كوب زيت زيتون
• عصير ليمونة
• أوراق بقدونس "للتزيين"
• نصف كوب زيتون أسود "للتزيين"
الطريقة:-
1. اغسلي الجزر كويس وابشريه.

2. افرمي الثوم مع الملح كويس وضيفي إليهم عصير الليمون والزيت وقلبيهم مع بعض.

3. ضيفي الخليط السابق إلى الجزر وقلبيهم مع بعض، وبعد كده ضيفي ليهم البقدونس والزيتون الأسود وقلبيهم مع بعض، حطي السلطة في طبق السلطة وزيني الطبق ببعض شرائح الزيتون الأسود وأوراق البقدونس.
المقادير:-
• كيلو لحم بتلو مقطع قطعاً صغيرة
• بصلة متوسطة الحجم مفرومة
• 2 فص ثوم مدقوق
• 2 حبة طماطم متوسطة مقطعة مكعبات صغيرة
• 1/2مكعب مرقة لحم أو مرقة دجاج
• 1/2 1معلقة كبيرة زبد
• 2 معلقة كبيرة زيت زيتون
• 1/2 كوب زيتون أسود أو أخضر منزوع البذر مقطعاً شرائح
• 1 حبة فلفل أخضر مقطعة قطعاً صغيرة
• 1 حبة فلفل أحمر مقطعة قطعاً صغيرة
• 1/2 كوب بقدونس مفروم
• 1 معلقة صغيرة زعتر
• 1 معلقة كبيرة صلصلة طماطم
• ملح وفلفل

الطريقة:-
1. قطعي شرائح اللحمة إلى قطع صغيرة، بعد كده سخني الزيت والزبد فى إناء كبير، وضيفي إليه البصل وقلبيهم مع بعض لمدة خمس دقائق، ضيفي إليهم الثوم واللحمة وقلبيهم مع بعض على النار لمدة ربع ساعة، أو لغاية ما تلاقي إن اللحمة لونها بقى بني.
2. بعد ما تلاقي إن اللحمة لونها بني ضيفي إليها الفلفل والطماطم وقلبيهم مع بعض لمدة ربع ساعة، وضيفي بقية المقادير مع 1/2 1 كوب مية وسيبيها لغاية ما تغلي..

3. هاتي طاجن وحطي فيه اللحمة ودخليها الفرن على درجة حرارة متوسطة (190 مئوية) لمدة نص ساعة أو لغاية ما تلاقي إن اللحمة استوت طلعيها وحطيها في أطباق التقديم.
المقادير:-

• 6 أكواب لبن حليب
• كوب سكر
• كوب نشا
• 1/2 كوب ماء
• 1/4 كوب ماء زهر أو ماء ورد
• 1/2 كوب كريمة
• 1/2 معلقة صغيرة فانيليا
• 1/2 كوب فستق مفروم
• 1/2 كوب جوز الهند
الطريقة:-
1. سخني اللبن على نار منخفضة، وبعد كده ضيفي إليه السكر وقلبيه كويس.
2. أثناء ما اللبن بيغلي اخلطي النشا مع شوية مية، وبعد كده ضيفيه إلى اللبن تدريجياً مع التقليب المستمر، وخدي بالك إن في الوقت ده تخلي النار هادية علشان تقدري تتحكمي فيه.. سيبيه على النار لمدة نص ساعة مع التقليب المستمر علشان ما يلزقش.. بعد كده ضيفي إليه الفانيليا وماء الورد والكريمة.
3. سيبي الخليط ده على النار لمدة خمس دقائق، وبعد كده شيليه من على النار، وصبيه في أطباق الحلويات، وسيبيه لغاية ما يبرد، وبعد كده زيني الأطباق بجوز الهند والفستق المفروم، وبعد كده حطيه في التلاجة وطلعي منه وكلي.

الله أكلة لذيذة



تسلم إيدك

روز وفارس تسلمولى على احلى مرور
وادى عزومه النهارده


المقادير:-
• حبة رمان مقشرة
• عصير 3 برتقالات
• 1/4 كوب سكر
• كوب كبير مية باردة
• مكعبات تلج "اختياري"

الطريقة:-
حطي حبوب الرمان مع عصير البرتقال مع المية مع السكر في الخلاط، واضربيهم كلهم مع بعضهم كويس، وقبل أذان المغرب بربع ساعة صبي العصير في كأسات العصير وضيفي إليه مكعبات التلج

المقادير:-
• نصف كيلو جمبري صغير
• ملح
• فلفل أسود
• عصير ليمونة
• 1/2 كوب دقيق
• 3 أكواب مية
• بقدونس مقطع قطعاً صغيرة
• نص رأس ثوم مدقوق
• 1/4 كوب زيت
• معلقة سمنة
• أوراق بقدونس"للتزيين"
• 1/4 حزمة كزبرة مقطعة قطعاً صغيرة
الطريقة:-
1. اغسلي الجمبري كويس، وبعد كده اخلطيه بالثوم المدقوق والملح والفلفل، وقلبيهم مع بعض كويس، وسيبيه نص ساعة علشان يتبل.
2. بعد مرور النص ساعة حطي الجمبري على النار وحطي معاه الزيت والسمنة مع التقليب المستمر لغاية ما الجمبري يبقى لونه ذهبي.
3. أثناء ما الجمبري يحمرّ اخلطي المية مع الدقيق مع التقليب علشان لغاية ما شكلهم يبقى شكل الكريمة السائلة، بعد كده ضيفي إليهم الملح والبهارات والفلفل الأسود وقلبيهم مع بعض كويس.
4. بعد ما الجمبري يحمرّ ضيفي إليه الخليط السابق، وسيبيه على النار لمدة نص ساعة مع استمرار التقليب المستمر علشان ما يكلكعش.
5. بعد مرور النص ساعة اطفي البوتجاز، وصبي الشوربة في الأطباق، وضيفي إليها عصير الليمون، وزيّني الطبق بشوية كزبرة وأوراق البقدونس.


المقادير:-
• 2 حبة طماطم
• 2حبة خيار
• بصلة
• شرائح ليمون
• 1 حبة فلفل أخضر
• 3 فصوص ثوم مبشور
• معلقة كبيرة ملح
• 3 معالق طحينة
• 1 حبة جزرة
• معلقة صغيرة شطةحمراء
• معلقة صغيرة كمون
• معلقة زيت زيتون
• عصير ليمونة
الطريقة:-
1. قطعي الطماطم والخيار والجزر والفلفل قطع صغيرة.

2. قطعي البصلة قطع صغيرة وضيفي إليها عصير الليمون والملح والفلفل والكمون، ضيفي إليها الثوم المبشور والطحينه وزيت الزيتون.. بعد كده ضيفي إليها البصلة وقلبيهم مع بعض كويس.
3. بعد ما تقلبيهم مع بعض كويس حطي السلاطة في أطباق السلاطة وضيفي إليها شرائح الليمون

المقادير:-

• كيلو سمك فيليه "هامور أو أي نوع إنت بتحبيه"
• عصير ليمونة
• كوب دقيق
• كوب بقسماط
• 3 بيضات
• معلقة صغيرة فلفل
• معلقة صغيرة ملح
• زيت للقلي
• 8 فصوص ثوم
• قرن فلفل أحمر مقطعاً قطعاً صغيرة
• ملح وكمون
• معلقة كبيرة بهارات سمك
• أوراق جرجير "للتزيين"
• شرائح ليمون "للتزيين"
الطريقة:-
1. هاتي فصوص الثوم وقرن فلفل أحمر مقطع قطع صغيرة، وحطيهم في الهون، ومعاهم الملح والكمون والبهارات، واطحنيهم كويس مع بعض. ضيفي إليهم الليمون وقلبيهم مع بعض.

2. هاتي السمك واغسليه كويس، وبعد كده رشي عليه الخليط السابق وسيبيه لمدة نص ساعة علشان يتبّل كويس.
3. هاتي طبق كبير وحطي فيه الدقيق والبقسماط والفلفل والملح.
4. هاتي طبق تاني صغير، وحطي فيه البيض المخفوق المضاف ليه رشة فلفل وملح.
5. حطي السمك في البيض، وبعد كده حطيه في الدقيق والبقسماط، كرري نفس الموضوع لغاية ما تلاقي السمك خلص.
6. سخني الزيت كويس قوي، واقلي السمك فيه بعد ما تخلّصي قلية السمك طلعيه وحطيه في أطباق التقديم، وزيني الطبق بأوراق الجرجير وشرائح الليمون؛ ممكن إنك تعملي مع الطبق ده بطاطس محمرة.

المقادير:-

• 1/2 كوب زبدة
• 1بيضة
• 2 كوب دقيق
• 3 معالق كبيرة سكر
• 1/4 كوب تمر مقطع قطعاً صغيرة
• 1/3 كوب ماء

الحشو:-

• 1 كوب تمر
• 1 كوب كسترد
• 2 معلقة كبيرة سكر بودرة "للتزيين"

الطريقة:-

1. اخلطي الدقيق مع السكر، وقطع التمر وقلبيهم مع بعض كويس، وضيفي إليهم الزبد واعجني الخليط ده مع بعضه بأطراف أصابعك.
2. ضيفي للخليط السابق البيض والمية مع استمرار التقليب، لغاية ما تلاقي العجينة بقت لينة افرديها في القوالب الخاصة بالتارت وغطيها بالكسترد والتمر، وبعد كده حطيها في فرن درجة حرارته 160 درجة مئوية لمدة 20 دقيقة وبعدين طلعيه من الفرن وسيبيه لغاية ما يبرد وزينيه بالسكر البودرة.

يا جامد انته ايه الجمال ده
اممممممممممممممممم
موضوع لذيذ اوووووووى
تسلم ايدك علي الاكلات والعزومات الجميلة دي
يلا بقي هنستني الباقي
Goo0goo

انتى جوعتينى جدااااااااااااااااااااا

وتسلم اديكى

إيه رأيك لما تعملي النهارده عصير موز باللبن والوز؟‍!
المقادير:-

• 1/4 كيلو موز
• 3 أكواب لبن حليب بارد
• 1/4 كوب لوز أبيض منزوع القشور ومبشور
• 3 ملاعق سكر
• عصير ليمونة

الطريقة:-

اخلطي كل المقادير دي مع بعضها واضربيهم كلهم مع بعضهم في الخلاط الكهربائي، وبعد كده حطيهم في كوبيات العصير.




النهارده هنستفيد من الجزر في عمل طبق شوربة في منتهى الجمال ودي الطريقة...

المقادير:-

• 1/2 كيلو جزر
• 2 حبة بطاطس كبيرة
• 1 معلقة كبيرة بقدونس مفروم
• 1 معلقة كبيرة زبد
• شوربة فراخ أو لحمة أو مرقة دجاج + كوب مية
• بصلة مقطعة قطعاً صغيرة

الطريقة:-

1. هاتي الجزر والبطاطس واغسيلهم كويس وقشريهم، وبعد كده قطعيهم إلى قطع صغيرة.
2. هاتي حلة وحطي فيها الزبدة، وحمّري فيه البصل والجزر والبطاطس على نار منخفضة لمدة 15 دقيقة مع التقليب المستمرّ.

3. بعد مرور الربع ساعة ضيفي إليهم الشوربة والملح والفلفل، وسيبيهم لغاية ما يغلوا وتلاقي الجزر والبطاطس بقت لينة. بعد كده اطفي البوتجاز، وسييبها لغاية ما تبرد، وبعد كده اضربيهم مع بعض في الخلاط.
4. بعد ما تضربيهم في الخلاط هاتي الحلة وحطيهم على النار، وسخنيهم مرة كمان، وبعد كده صبيهم في أطباق الشوربة، وزيني الطبق بالبقدونس المفروم، وعلى فكرة ممكن لو لقيتي قوام الشوربة سميك ممكن إنك تضيفي المية السخنة أثناء الغليان في المرة الثانية.



المقادير:-

• 1 ثمرة فلفل أحمر متوسطة الحجم
• 1 ثمرة فلفل أخضر متوسطة الحجم
• 1/4 معلقة صغيرة فلفل أسود
• 1 ثمرة فلفل أصفر متوسطة الحجم
• نص حزمة بقدونس "للتزيين"
• 4 فصوص ثوم مفرومين

الطريقة:-

1. هاتي الفلفل واغسليه كويس، وبعد كده نشّفيه واشويه على نار متوسطة الحرارة مع تقليبه من جميع الجوانب.
2. بعد ما يشوى الفلفل سيبيه لغاية ما يبرد، وبعد كده قشريه، وشيلي البذر منه، وبعد كده قطعيه إلى قطع صغيرة.

3. هاتي طبق السلطة وحطي فيه الفلفل المقطع وتبليه بالملح والفلفل الأسود والثوم ممكن إنك تزيني الطبق بالبقدونس.



المقادير:-

• نص كيلو مكرونة اسباجيتي
• نصف كيلو صدور فراخ مشوية ومقطع شرائح بالطول
• فلفل ألوان مقطع شرائح بالطول
• 3 ملاعق كبيرة زيت الزيتون
• 3 فصوص ثوم مهروس
• نصف كوب جوز مدقوق
• ربع كوب جبنة تشيدر مبشورة

مقادير الصلصة:-

• 3 ملاعق كبيرة ريحان مجفف
• 2 معلقة كبيرة زيت الزيتون
• فص ثوم مهروس
• نصف كوب جبنة بارميزان
• نص كباية زيت ذرة
الطريقة:-

1. اسلقي المكرونة في مية سخنة مضاف ليها الملح ونص معلقة زيت، بعد ما المكرونة تتسلق كويس اغسليها بمية باردة، وسيبيها في المصفاة.
2. بعد كده ابدئي في تحضير الصلصة بإنك تحطي كل مكوناتها في الخلاط وتضربيهم مع بعض كويس.

3. هاتي صينية وسخني فيها زيت الزيتون، وحمري الثوم ثم اضيفي ليها الفراخ مع الصلصة المعدة سابقاً وقلبيهم مع بعض لمدة 5 دقيقة، وبعد كده ضيفي المكرونة ونصف كمية الجوز، واتركيها لمدة 4 دقائق على النار.
4. شيلي المكرونة من على النار وحطيها في طبق التقديم وزينيها بباقي الجوز والجبنة المبشورة.



المقادير:-

• نصف لفة قمر الدين
• كباية كبيرة سكر
• 6 أكواب مية
• كباية نشا
• كباية من اللوز المقشّر (أو أي مكسرات موجودة)
الطريقة:-

1. انقعي قمر الدين مدة ليلة كاملة في المية.
2. بعد ما تلاقي قمر الدين ذاب في المية هاتي حلة وصبيه فيها، وضيفي إليه كباية مية كبيرة وسكر مع التقليب، وحطي حلة قمر الدين دي على النار مع التقليب المستمر...

3. أثناء غليان قمر الدين على النار هاتي كباية مية وحطي فيها النشا وقلبيهم كويس...
4. بعد ما قمر الدين يغلي ضيفي إليه النشا تدريجياً مع التقليب المستمر، وخدي بالك إن في الوقت ده تخلي النار هادية علشان تقدري إنك تتحكمي فيه، وسيبيه على النار لمدة نص ساعة مع التقليب المستمر علشان ما يلزقش.

5. بعد ما تلاقي قمر الدين بقى سميك شيليه من على النار وصبيه في أطباق صغيرة واستني عليه لما يبرد، وبعد كده زينيه باللوز المقشر أو أي مكسرات عندك ودخليه التلاجة وطلعي منه وكلي.

روووووووووووووووووووعة

المقادير:-
• 1/4 كوب لبن حليب
• 1/4 كيلو مشمش مجفف
• فنجان مية ساقعة
• عصير ليمونة
• 4 معالق سكر
• مكعبات ثلج

الطريقة:-
اخلطي كل المكونات دي مع بعضها، واضربيها في الخلاط، صفّيها وصبيها في كوبايات العصير وضيفي إليها مكعبات التلج.




المقادير:-
• 1/4 كوب زيت
• 1/4 قرع صغير مقشر ومقطع مكعبات
• 3 جزرات مقطعة حلقات كبيرة
• 1 ثمرة فجل أبيض مقطع مكعبات
• حزمة كرات مقطعة قطعاً كبيرة
• بصلة مقطعة أربع قطع
• معلقة ورق لورو
• معلقة زعتر
• معلقة روزماري
• 5 أكواب شوربة لحمة أو فراخ
• ملح وفلفل
• جبنة مبشورة "للتزيين"

الطريقة:-
1. شغلي الفرن على درجة حرارة متوسطة.
2. اخلطي الزيت مع الخضراوات، ورشي عليهم الأعشاب اللي عندك، بعد كده رصي الخضراوات في صاج ودخليها الفرن لمدة ساعة إلا ربع أو لغاية ما تلاقيها استوت بس خدي بالك إنك تقلبيها من وقت للتاني.
3. بعد ما تلاقي إن الخضار استوى طلعيه من الفرن وحطيه في حلة فيها الشوربة على النار، وسيبيهم مع بعض لمدة ربع ساعة مع مراعاة التقليب من وقت للتاني.
4. بعد مرور الربع ساعة اطفي البوتاجاز وصبي الشوربة في طبق الشوربة.



أكيد طبعاً كلنا بنحب سلاطة البابا غنوج؛ لأن طمعها لذيذ جداً، وعلى فكرة سلاطة البابا غنوج دي مفيدة جداً لأنها بتمد الجسم بكمية هائلة من الفيتامينات.

المقادير:-
• 1 حبة باذنجان رومي متوسطة الحجم
• 3 معالق كبيرة طحينة
• 3 معالق كبيرة زبادي
• 3 معالق كبيرة عصير ليمون
• 2/1 1 معلقة صغيرة ثوم مدقوق
• 3 معالق كبيرة زيت زيتون أو ذرة
• ملح وفلفل

الطريقة:-

1- اشوي الباذنجان على صاج فوق نار متوسطة، وخدي بالك إنك تقلبي الباذنجان على الوجهتين علشان توزعي الشوي بالتساوي. بعد ما تلاقي الباذنجان اتشوى شيليه من على النار وسيبيه لغاية ما يبرد، وبعد كده قشّريه.
2- هاتي طبق واهرسي فيه الباذنجان بالشوكة. وبعد كده ضيفي إليه الطحينة والزبادي والثوم المدقوق واخلطيهم مع بعض كويس، وبعد كده ضيفي الملح والفلفل وعصير الليمون وقلبيهم تاني مع بعض.

3- بعد كده ضيفي على وش الباذنجان الزيت، ولتجميل الطبق ممكن إنك تحطي أوراق بقدونس وقطع من الزيتون الأسود.



النهارده الطبق بتاعنا من الهند وطريقته بسيطة جداً...

المقادير:-

• 2/1 كيلو لحم ضأن بدون عظم مقطعة مكعبات
• 2 بصل مفروم
• 1 معلقة طعام صلصة طماطم
• ثوم وزنجبيل
• 1 معلقة صغيرة زعفران
• 4/1 كوب ماء ورد
• معلقة طعام كاري
• 1 معلقة صغيرة ملح
• 5 حبات حبهان
• 5 أعواد قرفة
• 2 ثمرة بطاطس مقطَّعة قطعاً صغيرة
• 2 ثمرة فلفل أحمر مقطعة شرائط رفيعة

الطريقة:-
دي ما فيش أبسط منها، كل اللي عليكي إنك تخلطي كل المكونات دي مع بعضها وتسيبيها مع بعضها لمدة خمس ساعات في الثلاجة، وبعد كده تحطيها في صينية ودخليها في الفرن لغاية ما تستوي وتحمر.



المقادير:-

• فواكه مشكلة مقطعة إلى مربعات صغيرة
• 4 علب جيلي (نوع واحد)
• 3 علب بسكويت
• علبة قشطة
• شوكولاتة مبشورة
• كأس من الكريمة المخفوقة

الطريقة:-

1. هاتي الفاكهة اللي عندك وقطعيها إلى مكعبات صغيرة، وبعد كده رصيها في طبق البايركس.
2. فضي محتويات علب الجيلي في إناء كبير فيه 3 أكواب من الميّة المغلية على نار متوسطة الحرارة مع التقليب المستمر لمدة عشر دقائق، أو لغاية ما تلاقي إن الجيلي بدأ يتقل اطفي البوتاجاز.
3. صبي شوية جيلي فوق الفاكهة.
4. بعد كده هاتي البسكويت ورصيه فوق الفاكهة والجيلي، بعد كده صبي باقي الجيلي فوق البسكويت، بعد كده حطي الطبق ده في الثلاجة لمدة 4 ساعات أو لغاية ما الجيلي يتجمد.
5. هاتي علبة القشطة وعلبة الكريمة واخلطيهم مع بعض كويس، وطلعي الطبق من الثلاجة، وادهني وشه بخليط الكريمة والقشطة، وبعد كده رجعيه الثلاجة تاني لمدة ساعة.
6. بعد ما تلاقيه جمد خرجيه من الثلاجة وحطي على وش الطبق شوية فاكهة أو شوية شوكولاتة مبشورة.

الرحمة ياااااااااااااااااااناس

أسيب يعني الكمبيوتر و أروح أعمل الحاجات الحلوة دي ولا إيه

عزوووووووومه النهارده


المقادير:-
• 3 ثمرات موز
• 3 ثمرات جوافة
• كوب كبير لبن بارد
• 1/2 كوب سكر
• عصير ليمونة
• مكعبات تلج

الطريقة:-
قطعي الموز مع الجوافة، مع مراعاة انك تشيلي بذرة الجوافة، حطي الموز مع الجوافة مع عصير الليمون مع اللبن مع السكر مع المية في الخلاط، واضربيهم مع بعض كويس، بعد كده صفي العصير كويس وصبّيه في كأسات العصير وضيفي إليه مكعبات التلج.



المقادير:-
• 1/4 كيلو صدور فراخ مقطعة قطعاً كبيرة ومسلوقة
• 3 بصلات مقطعة قطع صغيرة جداً
• 1 كوب لبن حليب
• 3 أكواب شوربة فراخ
• كوب دقيق
• 1/4 كيلو مشروم مقطع شرائح
• 3 ملاعق كبيرة زبدة
• عصير ليمونة
• 1/2حزمة بقدونس مقطعة قطعاً صغيرة
• فلفل وملح
• 3 أكواب خضار مشكل ومقطع مكعبات صغيرة (جزر - بسلة - بطاطس - جزر)
الطريقة:-
1. سيّحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي.
2. لما تلاقي إن لون البصلة بقى ذهبي ضيفي إليها الدقيق مع استمرار التقليب لمدة خمس دقائق أو لغاية ما الدقيق يحمرّ.

3. بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش.
4. بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسميكة ومش مكلكعة ضيفي إليها الخضار والمشروم.

5. سيبي الخليط علي النار لمدة ربع ساعة، وبعد كده ضيفي إليه عصير الليمون والبهارات والملح، وسيبيه على النار لمدة ربع ساعة كمان أو لغاية ما تلاقي الخضار والمشروم استوى اطفي البوتجاز، وحطي الشوربة في أطباق التقديم وزيّني الأطباق بالبقدونس.






طبق السلاطة اللي معانا النهاردة هو طبق سلاطة على الطريقة الروسية...
المقادير:-
• 1/4 كيلو بسلة
• 5 ثمرات بطاطس مسلوقة
• حزمة فجل
• زيتون أخضر
• كرفس
• ملح
• معلقة مايونيز
الطريقة:-

اسلقي الخضراوات دي مع بعضها ما عدا الفجل بعد ما تسلقي الخضروات حطيها في مصفاة، وبعد كده ضيفي إليها الملح والمايونيز وحلقات الفجل، وقلبيهم مع بعض وحطيهم في طبق السلاطة.






كلنا أكيد بنتفرج على مسلسلات خليجية، وبنسمع اسم "برياني الدجاج "؛ فإيه رأيك لما تعمليه النهارده على السفرة. على فكرة الطبق ده طعمه حلو أوي...

المكونات:-
• بصلة مقطعة حلقات
• قطع من الدجاج مخلي من الجلد والعظم
• 5 فصوص ثوم مفروم ناعم
• زنجبيل مفروم ناعم
• شوربة دجاج
• طماطم مقطعة حلقات
• علبة زبادي
• 3بيضات مسلوقة
• 3 أكواب أرز بسمتي
• معلقة زعفران
• كوب لبن حليب
• بهارات مطحونة عبارة عن (شطة - ملح - فلفل أسود - كمون - حبهان - قرفه - كسبرة - زنجبيل)
• بهارات صحيحة (حبهان - ورق لورا - فلفل أسود - قرنفل - شمر - قرفة)
الطريقة:-
1. تبّلي قطع الفراخ بالبهارات المطحونة وسيبيهم مع بعض لمدة ساعة علشان الفراخ تتبّل.
2. حطي شوية زيت في صينية على النار، وضيفي إليها البصل، وحمّريه لغاية ما لونه يبقى ذهبي.
3. بعد مرور الساعة ضيفي الفراخ إلى البصل مع التقليب المستمرّ، وبعد كده ضيفي إليه الثوم المفروم والزنجبيل المفروم وقلبيهم مع بعض كويس لمدة 20 دقيقة على النار، وبعد كده اطفي البوتاجاز.
4. بعد كده ضيفي إليهم الشوربة، ورصي من فوقه حلقات الطماطم، وضيفي إليه الزبادي وشوية كزبرة الخضراء.
5. اغسلي الأرز كويس وانقعيه لمدة نص ساعة في المية، وبعد كده اسلقيه في حلة على النار فيها مية مضاف إليه البهارات الصحيحة.

6. صفي الأرز من المية بعد ما تسلقيه وضيفيه فوق سطح البرياني، ومن فوقه حطي الزبادي، واغرسي فيه البيض المسلوق.
7. انقعي الزعفران في اللبن الحليب لغاية لون اللبن ما يبقى برتقالي، ورشي اللبن على سطح الأرز، وبعد كده ضيفي إليه قطع من الزبد فوق الوجه.

8. حطي الصينية في الفرن لمدة نص ساعة. بعد مرور النص ساعة خرّجيه من الفرن وحطيه في أطباق التقديم، وعلى فكرة ممكن أنك تُزينيه بالكزبرة الخضراء والكاجو أو اللوز المحمص.



المقادير:-

• 2 معلقة كبيرة عصير ليمون
• 1/3 كوب كريمة لباني
• 1 معلقة كبيرة زبد
• 3/4 كوب سكر بني
• 1/2 كوب لوز مقشر ومقطع نصفين بالطول "للتزيين"
• 1/2 كوب كريمة مخفوقة مثلجة
• 4 حبات موز

الطريقة:-
1- دوبي الزبدة في إناء متوسط فوق نار متوسطة، وبعد كده ضيفي إليها السكر وقلبيهم مع بعض كويس، وسيبيهم على النار لغاية ما يبقى لونهم ذهبي.
2- ضيفي إليهم الكريمة اللباني، وقلبيهم مع بعض باستمرار لغاية ما تلاقي إن الصوص بقى أملس.. اطفي البوتجاز، وسيبيه علشان يبرد.. وخدي بالك إن لو كان قوام الصوص شديد الكثافة يبقى ضيفي إليه معلقتين من اللبن وقلبيهم مع بعض.
3- قطعي الموز بالطول إلى نصفين وحطي كل نصفين في طبق وادهنيهم بعصير الليمون، وصبي فوقهم صوص الكاراميل وزينيه بالكريمة المخفوقه واللوز.

روووووووووووووووووووووعة جنات تسلم إيدك

مثبت جنات
إستمريييييييييييي بإذن الله

تسلمى يا قمرررررر على التثبيت

عزوووووووووووووومه النهارده


المقادير:-
• 1/4 كيلو مشمش مجفف
• كوب كبير عصير برتقال
• 1/2 كوب سكر
• كوب مية
• 1/4 معلقة قرفة "للتزيين"

الطريقة:-
1. هاتي المشمش واغسليه كويس، وبعد كده انقعيه في مية لمدة 5 ساعات، ضيفي إليه عصير البرتقال قبل أذان المغرب بربع ساعة، وحطيه هو والبرتقال والسكر في الخلاط واضربيهم مع بعض كويس.
2. صبي العصير في كأسات العصير وزيني وش الكأسات بالقرفة.




ده بقى طبق شوربة في منتهى الجمال...
المقادير:-
• حزمة كرفس مقطعة قطعاً صغيرة
• 4 بصلات خضراء مقطعة قطعاً صغيرة
• 3 ثمرات طماطم مقطعة قطعاً صغيرة
• فلفل اخضر مقطعة قطعاً صغيرة
• بصلة مقطعة قطعاً صغيرة
• كيس شوربة بصل "من السوبر ماركت"
• ملح وفلفل اسود
• أوراق خس "للتزين"
الطريقة:-
اخلطي جميع المقادير مع بعضها ماعدا أوراق الخس، واسليقها على النار لغاية ما تستوي، وبعد كده اطفي عليها، وسيبيها لغاية ما تبرد، وبعد كده اضربيها في الخلاط... وبعد كده حطيها في حلة وسخنيها على النار تاني بعد كده حطيها في أطباق الشوربة وزيني الطبق بأوراق الخس.



المقادير:-

• 1/2 كوب طحينة
• 3 حبات طماطم مقطعة قطع صغيرة
• 1/2 كوب فاصوليا بيضا من السوبر ماركت "اختياري"
• فلفل رومي ألوان
• 1/2 كوب مية
• 3 معالق خل
• معلقة صغيرة ملح
• معلقة صغيرة فلفل أسود
• عصير ليمونة
• 3 فصوص ثوم مفرومة ناعم
• أوراق بقدونس مفروم "للتزيين"

الطريقة:-

1. دوّبي الطحينة في المية وضيفي إليها الليمون أو الخل والثوم المفروم وقلّبيهم مع بعض.
2. قطعي الطماطم مكعبات صغيرة وضيفيها للطحينة، وضيفي إليها الملح وقلبيهم مع بعض.



المقادير:-

• كيلو سمك بلطي
• بصلة كبيرة مقطعة قطعاً متوسطة الحجم
• 3 قرون فلفل أحمر مقطعين قطعاً صغيرة
• بقدونس وكسبرة وكرات مقطعين قطعاً صغيرة
• زيت زيتون
• بهارات سمك
• ملح وكمون
• نص راس ثوم مطحونة
• بطاطا مقطعة مكعبات صغيرة
• عصير ثلاث ليمونات
• شرائح ليمون
• جزر مقطع شرائح

الطريقة:-

1. هاتي فصوص الثوم وقرن فلفل أحمر مقطعا قطعاً صغيرة، وحطيهم في الهون، ومعاهم الملح والكمون والبهارات، واطحنيهم كويس مع بعض، وبعد كده ضيفي إليهم الليمون وقلبيهم مع بعض.
2. هاتي السمك واغسليه كويس، وبعد كده ادهنيه من الخارج والداخل بالخلطة اللي إنتِ عملتيها وسيبيه لمدة نص ساعة علشان يتبّل كويس.

3. هاتي البصلة وقطعيها قطعاً صغيرة، وبعد كده تبليها بالملح والليمون، وضيفي إليها قرن فلفل مقطعاً قطعاً صغيرة والبطاطا والكسبرة والبقدونس والكرات، واخلطي كل الحاجات دي مع بعضها، واحشي بيها بطن السمك وراسه.
4. هاتي صينية الفرن وحطي فيها السمك، ودخليه الفرن، وسيبيه لغاية ما تلاقي إن السمك لونه احمرّ واستوى، طلعيه وحطيه في طبق التقديم، وزيّني الطبق بشرائح الجزر والليمون



المقادير:-

• 3 أكواب رز
• 3 أكواب لبن (حليب)
• كوب نشا
• معلقة صغيرة فانيليا
• 6 أكواب ماء
• 2 كوب سكر
• 1/2 كوب جوز الهند
• 1/2 كوب زبيب "اختياري"
• 1/4معلقة صغيرة ماء ورد
• معلقة صغيرة قرفة مطحونة
• أعواد قرفة سليمة "للتزيين"

الطريقة:-

1. هاتي حلة متوسطة الحجم وحطي فيها 5 أكواب مية وحطيها على النار، وأثناء ما المية بتغلي هاتي الأرز واغسليه كويس، وبعد كده صفيه من المية اللي فيه.
2. بعد ما المية تغلي ضيفي إليها الأرز، ولما تلاقي الأرز بدأ يستوي ضيفي إليه السكر، وقلبيهم مع بعض كويس، وخدي بالك إنك في الوقت ده تخلي النار هادية علشان الأرز يستوي من غير ما يلزق.
3. بعد ما الأرز يستوي ضيفي إليه اللبن، وفي الوقت اللي اللبن والأرز بيغلوا هاتي كوباية مية، ودوبي فيها النشا وضيفيه تدريجياً إلى الأرز واللبن مع التقليب المستمر أولاً بأول، وضيفي إليه معلقة صغيرة فانيليا وماء الورد.. سيبيه على النار لغاية ما تلاقي إن الأرز قوامه بقى سميك، اطفي البوتاجاز وهاتي أطباق الحلويات وحطي فيها الأرز.
4. سيبي الأرز لغاية ما يبرد، وبعد كده زيني الأطباق دي بجوز الهند والزبيب.