العوافى عليكم يا جماعة
رحال
موضوع جميل بصراحة .. وفرصة
ولو انى خايف الشد يبقى ع الفيومية
اصل الفيوم ليها فلكلور جامد من المصطلحات العجيبة
تحس انهم لسه بيتكلموا هيروغليفى لحد دلوقت
مثــــــــــــــلا :
اشلح بتاعة الصعيد = لأح ( لقح ) بالفيومى
ولما حد يناولك حاجة من البلكونة تقوله : طرطر او دَلدَل .. يعنى (ارمي - احدف - ناول )
فز .. ( بكسر الفاء وتشديد الزين وتحمير العين ) لازم تشخط وانت بتقولها .. فز قوم من مكانك
وتنطق كده : فـــِــززززززز ..
ومعناها انهض وقوم جاك طاعون
( لازم تستحضروا المعنى عشان تعرفوا تقولوا فزززز )
لحظة خوف ...
إتزغفت .. وتنطق إززززغــَـفـَـتْ ( للتسهيل )
ودى معناها اتخرعت ... تعبير عن الخضة الشديدة
اتخضيت
------
صيغ التعجب بين المحافظات
كلنا عارفين ان اسكندرية مشهورة بـــ أيووووووووه .. ويمطوا الواو اوى
فى الصعيد يقولوا : وااااااه .. عادى كل الناس عارفينها من المسلسلات
القاهرة شعبى بيقولوا : يوه ... ( ويخطفوا الواو جامد يعنى ممكن نلغى الواو وتحط ضمة ع الياء فتبقى : يــُــه )
الفيوم بقى بيقولوا : وليه ... وممكن نلغى الياء ونحط كسرة تحت اللام
فتبقى : ولـــِــه ...............!!!! وبكده يبقى تفردنا وخطفنا الياء
==========
طبعا الفيوم بلد زراعى فراااخاوى ع الاخر
فتلاقوا الطيور مأثرة علينا شوية
اى حد مننا لما يحب يريح من غير ما ينام ... بيرقد
ونقول عليه راقد شوية ..( اقتداءا بالفرخة لما ترقد ع البيض من غير ما تنام )
و لما نحب نهزأ ولد صغير فاكر نفسه كبر نقوله :
انت لسه ما طلعتش من البيضة ...
--------
ديك النهار - عامناول - عشية -هئ
ديك النهار = ذاك النهار .. وتم تحريفها لـــ ذيك النهار
وبعدين ديك النهار للتسهيل .. وتنطق كده = دِكالنهار ( بكسر الدال )
غرامنا بالفراخ واضح اهوه
عامناول = عامٌ اول .. وطبقا لنظرية ( العلم نورن ) .. اصبحت عامن اول
وبما اننا بنحب نسهل على الناس بقت = عامناول يعنى العام الاولانى
عشية بقى معروفة .. دى حتى لغة عربية فصحى ومذكورة ف القران
كانهم يوم يرونها لم يلبثوا الا عشية او ضحاها
هئ = دى بقى مش كلمة .. دى نفخة صوت معناها = خد
وتتقال بحزقة شوية لو سمحتوا .. هئ
عشان تدى الايحاء بجدية العزومة وانت بتدى الحاجة ... هئ
------------
ندخل بقى على محافظة بنى سويف .. وحسب النطق المحلى = بنى سويه ..
وعايز فتحة عظيمة على الواو .. علشان تطلع كده : بنى سوايه
ودول بقى الكسل شعارهم .. بيقصوا نص الكلام
( يا محم .. قوم استحم .. الاومية حام )
ودى جملة مفادها .. ان محمد ريحتو طلعت ولازم ياخد موقف بقى ويقوم ياخد حمام
وخصوصا ان المية حامية ومالوش حجة
وبمناسبة الاومية .. تنطق لومية = الميا .. وغالبا يتم استخدام النحاسة فى الحالة دى
والنحاسة هيا الكوز او الدورق او الشفشق
( المهم النحاسة تكون مصنوعة من النحاس او الصفيح ومحمد يستحمى بيها )
مع حبى لاهالى بنى سويه ولاد عمنا وجيرانا
الله يرحمك يا حسن يا عابدين ..
شوفوا مسرحية عش المجانين وانتوا تسمعوا اللهجة البنى سويفى على اصولها
تحياتى للجميع .. وخصوصا رحالو وسواحو
ونلتقى بعد الفاصل .. مع الام الفيومية .. لما تحب تشتم ابنها او تدعى عليه
ما افتكرش فى حد يسمعها ويقدر يقول امين ..