وسّع يابنى انت وهوا
قاعدين تكلموا فى عصير وسلطة
شوفوا السمك بقى على اصووووله
عمايل ايديا وغلاوة عنيا
الاكلة النهاردة اسمها صنية سمك فى الفرن
مش عارفة ( فى الفرن ) دى تبع الاسم ولا وصف يعنى
طيب نقول المقادير والطريقة ونعزز الكلام بالصووووور
المقـــــادير
3 بصلات متوسطين الحجم
طماطمتين ونعصرهم فى الخلاط
سمك بلطى متنضف اكيد
زيت
وملح
وكمون
وبهارات لصنية السمك -- دى بتتباع عن العطار
وبـــــــس
الطريقــــــــــة :
نبدأ نقطع البصل مربعات صغيرة .. ودى طبعا يدويا لان عندنا مش بيفضلوها ولا فى الكابة ولا فى اى اَله تعملها
فانا قطعت ال3 بصلات وسط دموعى وشنهفتى
بعدين على الساقع كدة نحط شوية زيت والبهارات دى كلها وعصير الطماطم
وافضل بايدى احركهم وكأنى بخلل البهارات والطماطم جوة البصل
بعدين نساوى البصل اللى بقى دلوقتى بالطماطم والبهارات
ونحط السمك ونزوده بماية
ونبدا نحطهم على النار على العالى الاول
هتبدأ تغلى والشكل هيكون كدة
وبعدين نهدى النار بتعتها .. وكل شوية نزود ماية عشان تستوى
ايه هيا اللى تستوى بقى ؟؟
ما انا سألت مامتى قلتلها اعرف منيين انها استوت
قالتلى لما البصل يستوى يبقى كدة السمك استوى
بعدين بقى بعد ما الدنيا استوت
دخلنها الفرن وحمرناها وكان شكلها اكدة
على فكرة هيا مش محروقة بس الصور غامقة اوووى
اصلى لقطاها على المغرب بالظبط
ودة بقى بعد التوزيع فى الاطباق
وطعمها كااااااااااااان بجد تحفـــــــــــــــــة
اللهم انى صايمة
..
اصل الفطار انا اللى عملته امبارح
فعملت معاها بقى سلطة خضرا .. ودى مش مستاهلة يعنى .. او ممكن نخليها مشاركة لحد من الشباب _ ماشى يا رحال
_
فيها بقى طماطم وجرجير وجزر وخيار وكزبرة
وعملت معاها كمان بدنجان مشوى اللى الناس الألافرانكا بيقولوا عليه بابا غنوج
المهم انا جبت غنوج وظبطه يعنى
المقادير بقى
باذنجانة كبيرة
فلفل اخضر
فصين ثوم
كسبرة خضرا
ليمونة
طحينة حسب الطلب
الطريقة
نشوى الباذنجانة فى الفرن .. ونبدأ نعمل حشوة بالفلفل الاخضر والثوم والكمون
فى الكابة يبقى كدة دى حشوة الباذنجانة
ونحطها فى الطبق ونحط فوقيها الكسبرة متقطعة طبعااااااا
وفوقيهم البادنجانة بعد ما اتقشرت اكيد
ونعصر عليها ليمونة
واحنا بما اننا فريقين فى البيت
ففى فريق مكون من عدد اتنيين عضو مش بيحبوها عليها طحينة
وفريق اخر مكون بردو من عدد اتنيين عضو بيحبوها عليها طحينة
فحقنا للدماء بتتقسم على طبقين
طبق عليه طحينة وطبق معليهوش
وبالهنا والشفا
دة المنتج النهائى
والاكلة دى بقى كان معاها عيش بيتى مخبوووز
وانا كمان اللى عملته مع مامتى
وفلفل مقلى
صحيح طرطشنى ولسعنى وبهدلنى
بس امى قالتلى والله ما انا عملاه اتعلمى انتى
وكان فيه عصاير انا كمان اللى عملاها
بس ملحقتش اصورها
فالنهاردة عملتها تانى وادعوا بقى الحق اصورها قبل ما ينقضوا عليها
وبالهنـــــــــا والشفـــــــــا
مع تحيـــــــــات الشيـــــــف